Ulloq meeqqanut tunngatitaq – meeqqat meeraanissamut pisinnaatitaaffeqarput

Sapaammi meeqqat nalliuttorsiutigissavavut uagullu inersimasut ilisimasassatsinnik ataqqisassatsinnillu meeqqat pisinnaatitaaffiinik eqqaasinneqassaagut.

Sapaammi juunip aallaqqaataani Meeqqat Ulluat malunnartissavarput. Ulloq taanna silarsuaq pissanganartutut, toqqissisimanartutut nuannaarnermillu imaqarluartutut misigisaqarfiussaaq.

Ulloq taanna meeqqanut nalinginnaasuunngilaq. Namminnermi ullorivaat. Ulloq qungujunnernik, pinnguarnernik, asanninnermik malugineqarnermillu ulikkaartoq. Ulloq uagut inersimasuusugut meeqqat qanoq pingaaruteqartiginerannik qanorlu inuunitsinnik pisuunngortitsinerannik unikaallalluta eqqaasinneqarfissarput, inersimasutullu akisussaassuseqarnitsinnik aamma eqqaasinneqarfissarput.

Meeqqat Ulluat meeqqat pisinnaatitaaffeqarnerannik aamma eqqaasitsiffiuvoq, pisinnaatitaaffiit uagut inersimasuusugut ullumikkuinnaanngitsoq kisiannili ullut tamarluinnaasa ilisimasassagut, ataqqisassagut illersugassagullu.

Asasakka meeqqat,

Asaneqarnissarsi isumassorneqarnissarlu pisinnaatitaaffigaarsi.
Pinnguarnissamik, ilikkagaqarnissamik inuulluataarnissamillu periarfissaqassaasi.
Nerisassaqarnissaq, toqqissisimanartumik angerlarsimaffeqarnissaq napparsimalissagussilu ikiorneqarnissaq piumasarisinnaavarsi.
Aamma qanoq eqqarsarnissinnik misiginissinnillu oqarsinnaasarnissarsi pingaaruteqarpoq aammattaaq uagut inersimasuusugut tusarnaartarnissarput pingaaruteqarpoq.

Aamma kinaanersi, suminngaanneernersi sunalu upperinerissi apeqqutaatinnagu ilissi namminiujuaannarsinnaatitaavusi.

Neriuppunga nuannersumik ullorsiorluassasusi.



Meeqqat ulluannut atatillugu meeqqat inuusuttullu tamarmik oqariartuutiminnik Naalakkersuisumut apuussisinnaalissapput. Tamanna pillugu paasissutissiissut immikkut ittumik aamma nalunaarutigineqarumaarpoq.



Attavissaq
Sukumiisumik paasisaqarusukkuit naalakkersuisup allattaa Luutiveeraq Lyberth e-mailikkut luti@nanoq.gl imaluunniit oqarasuaatikkut: +299 34 50 00 attavigiuk