Naalakkersuisut Pride malunnartippaat

Qaammammut junimut Prideqartitsiviusumut atatillugu, pisortatigoortumik nunatsinni inunnut LGBT+-iusunut pisortatigoortumik Naalakkersuisut tapersersuinertik malunnartippaat. Tamanna Naalakkersuisut nittartagaanni aamma inoqatinut attaveqaatini neriusaap ilisarnaqutaatut ilusilimmik internetimut attaveqaatitigut ilusiliinikkut saqqummersinneqarpoq. Aammattaaq ulloq 28. juni Nuuk Pridep ingerlanneqarneranut atatillugu neriusaap erfalasua Naalakkersuisut saani illoqannginnersami erfalasoqarfimmi amuneqassaaq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen ima oqaaseqarpoq:

”Ukiup ataatsip matuma siorna, nunatsinni naligiissitaaneq assigiinngisitsinnginnissarlu pillugit inatsit siullerpaaq Inatsisartut akuersissutigaat. Aalajangiineq taanna suli tulluusimaarutigaara. Tassami aalajangiineq piffissami, sumiiffinni arlalinni inuit LGBT+-iusut pisinnaatitaaffii uteriartorput aamma amerlasuut suiaassutsikkut kinaassusertik imaluunniit kajungissusertik tunngavigerpiarlugu assigiinngisinneqarneq misigisarpaat. Taamaammat nunatsinni naleqartitatta Naalakkersuisunit avammut takutinneqarnissaat pingaaruteqarpoq. Assigiinngiiaassutsimik, ataatsimoornitsinnik aamma nammineq inuunerup ilusilersornissaanut kiffaanngissuseqarnitsinnik pingaartitsinitsinnut tamanna ersersitsivoq. Sipineq+-ip suliniutaa tapersersorparput aamma ukioq manna Nuummi ulloq 28. juni prideqartitsinermi amerlasuut peqataajumaartut neriuutigaarput. Pride tassaavoq asanninneq initussuserlu pillugit nalliuttorsiorneq aamma ukioq manna sammisaq: Asanninneq ajugaali - Let's get critical, Love is political Naalakkersuisut tapersersorpaat”

Piviusut:

• Prideqartitsinikkut assigiinngisitaarneq, paasinninneq aamma ataatsimoorneq ukkatarineqarpoq. Pride tassaavoq takutitsineq aamma inuit LGBT+-iusut maaniinnerannik aamma allatulli pisinnaatitaaffeqartariaqarnerannik silarsuarmut takutitsineq.
• Neriusaap erfalasua assigiinngiiaassutsimut, initussutsimut aamma assigiinngisitaarnermut ilisarnaataavoq. Inuit LGBT+-iusunut pisinnaatitaaffeqarnerisa tapersersorneqarnerannut atorneqartarpoq.
• Nuuk Pride ulloq 28. juni ingerlanneqassaaq aamma peqatigiiffik LGBT+-mit Sipineq+-imit aaqqissuunneqarluni.
  
  

Paasisaqarnerorusukkuit naalakkersuisup allattaa Jeanette L. Petersen, jalp@nanoq.gl-ikkut imaluunniit oqarasuaatikkut angallattakkakkut 265476-ikkut attaveqarfigiuk.