AtuartigukNaalakkersuisup Vivian Motzfeldtip franskit ministeriinik, atorfilittaannik inatsisartuinillu pitsaasunik ataatsimeeqateqartareerluni, Frankrigimi pisortatigoortumik tikeraarnini naammassivaa
Nassiussisuuvoq: Nunanut Allanut Ilisimatusarnermullu Naalakkersuisoqarfik
Nunanut allanut Ilisimatusarnermullu Naalakkersuisup iluatsilluartumik Frankrigimi tikeraarnini naammassivaa, tikeraarnermini Frankrigip nunanut allanut ministerianik Jean-Noel Barrotimik ataatsimeeqateqarnermi saniatigut, Frankrigip ilinniartitaanermut ilisimatusarnermullu ministerianik Philippe Baptistemik ilisimatusarnermut immikkoortumik suleqatigiinneq oqaloqatigiissutigaa.
Vivian Motzfeldtip Kalaallit Nunaata ilisimatusarneq pillugu inatsimmik suliaq maanna ingerlanneqartoq, Kalaallit Nunaanni eqqaanilu ilisimatusarnermik nakkutilliinerunermik qularnaarinnittussaasoq ilisimatitsissutigaa.
”Ilisimasaqarneq pissaanermik qulakkeerinnittarpoq, Kalaallillu Nunaanni ilisimatusartut tamarmik ilisimasaminnik uatsinnik avitseqateqartarnissaat kissaatigaarput. Kalaallit Nunaannut Issittumullu samminnittumik paasissutissanut qitiusoqarfimmik pilersitsisoqarnissaa, ilisimatusartullu nunarsuarmit tamarmeersut Kalaallit Nunaannukarlutik sinaakkutit Kalaallit Nunaanni innuttaasunik pinngortitamillu illersuillutillu eqqummaariffiginnittunik sinaakkuteqarnissaat kissaatigaarput”, Nunanut allanut Ilisimatusarnermullu Naalakkersuisoq oqarpoq.
Ilinniartitaanermut ilisimatusarnermullu ministerip Philippe Baptistep Naalakkersuisullu Vivian Motzfeldtip Frankrigip Kalaallillu Nunaata akornanni ilisimatusarnikkut suleqatigiinnerup nukittorsarnissaa isumaqatigiissutigaat.
Frankrigimi ministerinik ataatsimeeqateqarnermi saniatigut Vivian Motzfeldtip Nationalforsamilingimi Senatimilu franskit inatsisartui, qalasersuarnut immanullu ambassadøri Oliver Poivre d’Avor kiisalu præsidentimut Macronimut Europa pillugu siunnersuisoq Alex Dutertre naapippai.
Ataatsimeeqatigiinnerni ingammik nunarsuarmi politikikkut pissutsit kiisalu Kalaallit Nunaata Frankrigillu attaveqatigiinnerannik suleqatigiinnerannillu nukittorsaanissamut periarfissat immikkut oqaluuserineqarput.
Frankrigimut tikeraarneq naggaserlugu Vivian Motzfeldt ima oqaaseqarpoq:
”Nunanut allanut Ilisimatusarnermullu Naalakkersuisutut siullermeerlunga pisortatigoortumik angalaninni pingaartissimavara Frankrigimut tikeraarnissara, qaammatinimi kingullerni piffissami ajornakusoorfimmi Kalaallit Nunaannut pingaarutilimmik Frankrig ersarissumik tapersersuisuuvoq. Frankrigimi suleqatitsinnik ataatsimeeqateqarnerit pitsaasumik inerneqarput, ataatsimeeqatittalu annertuumik tapersersuernertik oqariartuutigaat. Tikeraarneq Kalaallit Nunaata Frankrigillu nunat tamat akornanni qaninnersumik suleqatigiinnissaannut pitsaasumik alloriarneruvoq, pitsaasumillu qanimullu oqaloqatigiinnerit nanginnissaat qilanaaraara.”
Paasissutissat erseqqinnerusut pillugit naalakkersuisup allattaa Rosa Thorsen, rsth@nanoq.gl +299553303 attavigiuk.