AtuartigukPineqartilluta ilaassaagut
Nassiussisuuvoq: Nunanut Allanut Ilisimatusarnermullu Naalakkersuisoqarfik
Danmarkillu Kinallu aallartitaqarnikkut ukiunik 75-nngortorsiorneranik malunnartitsinermut atatillugu danskit nunanut allanut ministeriata Lars Løkke Rasmussenip Kinamut tikeraarneranut, ataatsimiinnerit arlallit ingerlanneqarput, taakkunanilu Danmarkip Kalaallit Nunaannut tunngatillugu oqartussaanera innarligassaannginnera, Kinami tikeraakkanit oqaatigineqarpoq.
Nunanut allanut Ilisimatusarnermullu Naalakkersuisup Vivian Motzfeldtip danskit naalakkersuisuisa Naalakkersuisullu akornanni Kalaallit Nunaata siunissaanut namminersortuuneranullu apeqqutip inuiannit kalaallinit taamaallaat aalajangigassaanera tamakkiisumik isumaqatigiissutaasoq naqississuserpaa:
- Namminersorneq pillugu inatsit Naalakkersuisullu nunanut allanut, sillimaniarnermut illersornissamullu politikikkut periusissiaata toqqammaviunera, politikikkullu ingerlatsineq peqatigalugu ingerlaavartumik ineriartortinneqartoq kiisalu nunatta siunissaa pillugu siusinnerusukkut oqariartuutit oqallinnerillu, inuiannit kalaallinit aalajangerneqartussaanera ilisimaarilluarneqarpoq, Vivian Motzfeldt oqarpoq.
Danmarkimut nunarsuullu sinneranut siunissami attaveqarnissarput danskit naalakkersuisuinik ingerlaavartumik oqaloqatigiissutigisarparput, Naalakkersuisut aallaavigaat Kalaallillu Nunaata siunissaa pineqartillugu, kalaallit peqataasussaanerput, taamaattumik toqqammaveqarnani Kalaallit Nunaata oqallisiginissaa pisariaqanngilaq.
Paasissutissat erseqqinnerusut pillugit attavigiuk: naalakkersuisup allattaa Rosa Thorsen, rsth@nanoq.gl +299553303