Vivianip Frankrigip nunanut allanut ministeria naapippaa

Nunanut allanut ilisimatusarnermullu Naalakkersuisoq Vivian Motzfeldt Frankrigllu nunanut allanut ministeria ullumi 20. maj 2025 Parisimi ataatsimeeqatigiipput.

Parisimi upernaakkut kialaartumi Nunanut allanut Ilisimatusarnermullu Naalakkersuisoq Vivian Motzfeldt, angalaqatiminik danskillu Parisimi aallartitaannik Hanne Fugl-Eskærimik ingiallorneqarluni, Frankrigip nunanut allanut ministereqarfiani nunanut allanut ministerimit Barrotimit pisortatigoortumik tikilluaqquneqarput.

Naalakkersuisut nutaat ivertitsinneqareerlutik erngertumik kissaatigaat nunat tamat akornanni oqaluttuarisaanermi pingaarutilimmik ataatsimiinneq ingerlanneqassasoq. EU-p, ingammillu Frankrigip Kalaallit Nunaat piffissami ilungersunartorsiorfimmi tapersersorpaa, taamaammallu Naalakkersuisut tamarmiusut Vivian Motzfeldt Europami aalajangiisartunik naapitsilluni ataatsimeeqateqartarnissaanik qinnuigaat, tassani Frankrigip politikikkut naalakkersuinermi sinniisai ilanngullugit.

- Frankrig nunat tamat akornanni naapitsinissanik siunertalinni nunatut siullertut tikeraarparput, maanilu Naalakkersuisut sinnerlugit Frankrigip piffissami ajornarkusoorfiusumi tapersersuineranut qujaniarnerput oqaatigaara.

- Peqatigisaanillu EU-mik attaveqarnitta ineriartortinnissaanik, kiisalu nunat tamat akornanni suleqatigiinnitta ineriartortinnissaanik kissaateqarnitsinnik oqariartuut apuupparput. Oqaloqatigiinnerit suleqatigiinnerillu nunat assigiinnik naleqartitaqartigisatut ilisimasavut siulliullugit aallartitsiffigissavagut. Aatsitassarsiornermik aatsitassanillu qalluinermi peqataasinnaanermut periarfissaq, ingammik nunanik inatsisinik toqqammaveqarluni periutsinik, tamat oqartussaanerannik, innuttaminnillu pisussaaffimminnik eqqortitsinermik ileqqoqartunik oqaloqatigiissutigineqassapput, aatsitassanillu qalluineq pillugu suleqatigiinnissamut ammanitsinnik oqariartuut nassarpara. Kalaallit tungaannit Issittumi Siunnersuisooqatigiinni siulittaasuuffimmik tiguseqqammernerput, Kunngeqarfiullu siulittaasuutitaqarnerani pingaarnerutitavut, ilanngullugit ilisimatitsissutigaavut.

Issittumissaaq isumannaallisaanikkut pissutsit, ilisimatusarnermut immikkoortumi suliniutit, Kalaallit Nunaata EU-llu akornanni ineriartortitsisinnaaneq aamma oqaloqatigiissutigaavut, tassani pissutsit qanoq uatsinnit isigalugit innerat ilanngullugu. Nunanut allanut ministerip Barrotip oqariartuutivut tigulluarpai, Vivian Motzfeldt oqarpoq.

Taamattaaq nunanut allanut ministeri Barrot Kalaallit Nunaannut tikeraarnissaanut qaaqquneqarpoq, qaaqqusissullu ilassilluarneqarpoq.

Trumpip Kalaallit Nunaannik tiguserusunnerminik oqariartornerata kingorna, Frankrig nunanut siullernut ilaalluni kalaallinik innuttaasunik tapersersuinerminik erseqqilluinnartumik oqariartorpoq, Vivian Motzfeldt oqarpoq.

Paasissutissat erseqqinnerusut Rosa Thorsenimut, rsth@nanoq.gl +299553303 attaveqarnikkut pissarsiarineqarsinnaapput.