Vivian Motzfeldtip EU-p Nunanut Allanut Sillimaniarnermullu Qaffasissumik Sinnissaa Kaja Kallas, Nunani tamalaat akornanni suleqatigiinnermut Europa-kommissæri Jozef Síkela kiisalu Nukissiuutinut Inissianullu Europa-kommisæri Dan Jørgensen Kalaallit Nunaata EU-llu akornanni suleqatigiinnerup nukittorsarlugulu ineriartortinnissaanut periarfissat nukittorsarniarlugit ataatsimeeqatigai.

Vivian Motzfeldip Nunanut Allanut Ilisimatusarnermullu Naalakkersuisutut pisortatigoortumik siullermeerluni angalanermini ulluni 14-16 maj Bruxellesimi Kalaallit Nunaata qanimut EU-mi NATO-milu suleqatai ataatsimeeqatigai.

Vivian Motzfeldtip tassani EU-p Nunanut Allanut Sillimaniarnermullu Politikimut Qaffasissumik Sinnissaa Kaja Kallas ataatsimeeqatigaa, tassanilu EU-p aalajangersimasumik Kalaallit Nunaannut pingaarutilittut tutsuiginartutullu suleqatitut tapersersuinera qujassuteqarfigai.

Qaffasissumik Sinniisuutitap Kallasip Vivian Motzfeldt-illu nunarsuarmi pisut kingulliit ineriartornerisa kingunerini unammillernartut, Kalaallillu Nunaata EU-llu suleqatigiinnerisa nukittorsarnissaannik pisariaqartitsineq oqaluuseraat. Tassani aatsitassanut immikkoortoq suleqatigiinnerup ineriartorfigisassaatut, Kalaallillu Nunaannut EU-mullu illuatungeriinnut iluaqutsiisinnaasoq pingaarutilittut erseqqissarneqarpoq. Vivian Motzfeldtip Qaffasissumillu Sinniisup immikkoortumi tassani peqatigiinnerup ineriartorteqqinnissaata sukumiisunik oqaloqatigiinnissat aallartinneqarnissaat isumaqatigiissutigaat.

Ilanngullugu Naalakkersuisup Nunani tamalaani suleqatigiinnermut Europa-kommissæri Jozef Síkela kiisalu Nukissiuutinut Inissianullu Europa-kommisæri Dan Jørgensen naapippai, tassanilu EU-p ukiunut arfineq marlunnut missingersuutissai immikkut isumaqatiginninniutigineqarnissaat oqaloqatigiissutigineqarpoq. Missingersuutini Kalaallit Nunaata EU-llu suleqatigiinnerani aningaasaliissutigineqartartut eqqartorneqarput. (225 mio. EUR miss.)

Kalaallit Nunaata EU-llu akornanni suleqatigiinneq immikkoortuni soorlu ilinniartitaanermi mingutsitsinngitsumillu siuariartornermi, aatsitassani aalisakkanilu immikkoortunik aallussiffiuvoq, ukiullu ingerlaneranni pisariaqartitanut kiisalu Kalaallit Nunaanni EU-milu pisariaqartitanut pissutsinullu nalimmassarneqartarpoq. Kommissærit Síkela, Jørgensen Vivian Motzfeldtillu pitsaasumik pingaarutilimmillu peqatigiinneq uppernarsarpaat, maannalu suleqatigiinnerup annertusarnissaanut piffissanngornera isumaqatigiissutigalugu.

Nunanut allanut Ilisimatusarnermullu Naalakkersuisoq Vivian Motzfeldt ima oqarpoq:

”EU Kalaallit Nunaata pingaarutilimmik suleqatigiuarpaa. Piffissamilu Kalaallit Nunaata ajornartoorfiani tatiginartunik suleqatitsinnut, uatsitulli naleqartitaqartunut qanillinissarput pingaaruteqarpoq. Taamaammat EU-p Nunanut Allanut Sillimaniarnermullu Politikimut Qaffasissumik Sinnissaa Kaja Kallas aamma EU-kommisærit Jozef Síkela Dan Jørgensenilu Kalaallit Nunaata EU-llu akornanni pitsaasumik suleqatigiinneq naqissuserniarlugu ataatsimeeqatiginerat nuannaarutigaara. Kalaallit Nunaata EU-llu akornanni peqatigiinnerup suli nukittorsarnerunissaa peqatigiilluta isumaqatigiissutigaarput. Taamaammat Kalaallit Nunaannut EU-mullu iluaqutaasumik annertusisamik suleqatigiinnissamik oqaloqatigiinnerit nanginnissaat qilanaaraara.”

Vivian Motzfeldt Bruxellesimi tikeraarnermi danskit Europa-Parlamentimi ilaasortaatitaat arlallit kiisalu S&D-gruppimi Siulittaasoq Siulittaasullu tullia Iratxe García Pérez aamma Christel Schaldemose aamma ataatsimeeqatigai.

Vivianip tikeraarnini naggaserlugu NATO-mik ataatsimeeqateqarpoq, tassani NATO-mi suleqatigiinneq pillugu oqaloqatigiittoqarpoq Issittumi Avannaarsuanilu pissutsit eqqartorlugit.



Annerusumik paasisaqarusukkuit saaffiissaq: Naalakkersuisup allattaa Rosa Thorsen, rsth@nanoq.gl +299553303