Timmiarniarnermi, mannissarnermi, aalisarnermi saniatigut pisarisuukkat kiisalu pisanik nalunaaruteqarneq

Piniarneq aalisarnerlu pileruttulerput. Taamaattumik makku eqqaasitsissutigissallugit inissaminiippoq:

Mitit siorakitsullu Qaanaaq-mi (zone 1):
Mitit siorakitsullu zone 1-imi piffissami septembarip 15-ianiit juunip 15-ianut piniarneqarsinnaapput, takuuk nunap immikkoortuinut / zone-nut aggornilersuineq ilanngussaq.

Mitit manniinik katersuineq:
Piffissami mannissarniarfiusinnaasumi apriilip aallaqqaataaniit juunip 15-iata tungaanut inuit piniarnermut allagartallit nammineq atugassatut mitip siorartuup imaluunniit mitip siorakitsup ulluanit ataatsimit amerlanerpaamik marlukkaarlugit mannissarsinnaapput. Mitip ullua tukernikuunngitsunik mannittalik mannissarniarfiup nalaani mannii nungullugit imaarneqassanngilaq.

Qaanaami eqqaanilu (zone 1-imi) piniarnermut allagartallit nammineq atugassatut mitit siorartuut aamma mitit siorakitsut manniinik manniusiornermut piffissami juni-p 15-ianiit junip 25-at ilanngullugu mannissaqqusaapput.

Qaanaami eqqaani (zone 1), Tasiilap eqqaani (zone 4) aamma Ittoqqortoormiini eqqaanilu (zone 5-imi), appaliarsuup manniinik piffissaq manniliorfiusoq tamaat mannissarneq akuerisaavoq.

Mannissarniarnermi allunaasat, majuartarfiit, allunaasat innartornermi atortartut innartornermilu atortut allat atornissaat inerteqqutaavoq.

Tasiilami eqqaanilu (zone 4-mi) aamma Ittoqqortoormiini eqqaanilu zone 5-mi, nerleq siggukitsoq aamma nerlernarnaq piffissami 1. septembarimiit majip 31-anut piniaqqusaapput.

Upernavimmi eqqaanilu aamma Uummannami eqqaanilu (zone 2) aqissit piffissami septembarip 1-ianiit maj-p 31-anut piniaqqusaapput.

Timmissat piaqqiorfiup nalaani eqqissisimatinneqarnissamik pisariaqartitsipput:
Timmissat ineqarfiisa eqqaanni aallaammik eqqarneq allatulluunniit ajoqusersuineq angallammillu knob-inik 3-nik sukkanerusumik angalaneq sunaluunniit piffissami apriilip 15-ianiit septembarip 15-ianut inerteqqutaavoq, timmissat ineqarfii ima ungasitsigalugit qaninnerullugilluunniit:

1) 1000 meter, timmissat ineqarfiat appanit, appanit sigguttuunit, apparlunnit, qilannganit, appaliarsunnit, taateraanit, qaqullunnit oqaatsunilluunniit najorneqarpat, aamma
2) 200 meter, timmissat ineqarfiat timmissanit allanit najorneqarpat.

Angallammik knob-inik 3-nik sukkaannerusumik angalasoqaqqusaavoq, tamanna pisariaqanngitsumik akornusersuinermik pilersitsinngippat.

Timmisartumik suluusalimmik qulimiguulimmilluunniit timmissat ineqarfiat appanit najorneqarpat siumut sanimulluunniit 3000 meterinit qaninnerullugit timmisartorneq inerteqqutaavoq, aammalu timmissat ineqarfiat timmissanit allanit najorneqarpat siumut sanimulluunniit 500 meterinit qaninnerullugit timmisartorneq inerteqqutaavoq.

Timmissat ineqarfii drone-t atorlugit timmissat ineqarfiinut siumut sanimulluunniit 100 meterinit qaninnerutillugit timmiffiginissaat inerteqqutaavoq.

Sumiiffinni timmissanut illersuiffiusuni 500 meterimik ungasitsigisumi qaninnerusumiluunniit, nunamut ikaarneq angallannerlu sunaluunniit piffissami maj-p 1-ianiit augustip 31-anut inerteqqutaavoq. Nalunaarutit.gl-imi nunap assingi pineqartut nassaarisinnaavatit.

Timmissat assersuutigalugu mitit aalisarnermi qassusersornermi ningittagarsornermilu saniatigut pisarisuukkat tuniniaqqusaanatik, taamaallaat nammineq atugassatut atorneqaqqusaapput.

Timmissat pisarineqartut, taakkununnga timmissat aalisarnermi saniatigut pisarisuukkat ilanngullugit, ukiumoortumik Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut nalunaarutigineqartassapput. Nalunaarute–qarneq nammineerluni www.sullissivik.gl aqqutigalugu imaluunniit piniakkanut nalunaarsuisarfik PINIARNEQ aqqutigalugu immersugassaq immersorlugu nassiunneratigut pisinnaavoq.

Manniit katersukkat pillugit nalunaaruteqarneq Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut ukiumoortumik pisassaaq, nammineerluni www.sullissivik.gl aqqutigalugu imaluunniit piniakkanut nalunaarsuisarfik PINIARNEQ aqqutigalugu immersugassap immersorlugu nassiunneratigut pisinnaavoq.



Sukumiinerusumik paasisaqarusukkaanni immikkoortortaqarfimmi pisortaq Amalie A. Jessen, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik saaffiginnittoqarsinnaavoq, e-mail: amalie@nanoq.gl, tlf. + 34 53 04