Norgep nunanut allanut ministeria Saamillu Inatsisartuisa siulittaasuat Vivian Motzfeldtip Tromsømi ataatsimeeqatigivai

Nunanut Allanut Ilisimatusarnermullu Naalakkersuisup Vivian Motzfeldtip Norgep nunanut allanut ministeria Espen Barth Eide Tromsømi ataatsimeeqatigivaa Saamillu Inatsisartuisa siulittaasuat Silje Karine Moutka aamma ataatsimeeqatigalugu.

Norgemi nunanut allanut ministeri peqatigalugu ataatsimeeqateqarnermi nunatut ataatsimoorussat soqutigisallu suleqatigiinnissarlu oqaloqatigiissutigineqarput. Ataatsimiinnermi Norgep Issittumi Siunnersuisoqatigiini siulittaasuuneranit misilittagai Kalaallit Nunaatalu siulittaasuunissaa eqqartorneqarput ilaatigut Kalaallit Nunaata EU-mut attaveqarnera.

Saamit inatsisartuisa siulittaasuata ataatsimeeqatiginerani Kalaallit Nunaata nunanut allanut attaveqarnera oqaluuserineqarpoq, Kalaallit Nunaata FN-ip oqartussaaffiini peqataanera Issittumilu Siunnersuisoqatigiinni nunat inoqqaavi oqaluuserineqarput. Helsinkimi isumaqatigiissut aallaavigalugu nunat avannarliit suleqatigiinnissaat aamma eqqartorpaat.

Nunat akornanni suleqatigiinneq ataatsimullu soqutigisat pillugit soqutigisaat oqaloqatigiissutigisimasaasa saniatigut Vivian Motzfeldtip aamma nunanut allanut ministeri Espen Barth Eide Issittoq pillugu Institutti Norgemi (Polarinstitutt) aamma Imartat Issittorlu pillugu Centeri (Senter for Hav og Arktis) takornariarpaat.

Oqaaseqaat:

”Norgip nunanut allanut ministerianut Espen Barth Eidemut aamma Saamit Inatsisartuisa siulittaasuannut Silje Karine Moutkamut tikilluaqqusingaarnerannut aammalu ammasumik pitsaasumillu oqaloqatigiinnitsinnut qujavunga. Tromsømi tikilluaqqusilluarnerup aammalu suleqatigiinnitsitta nukittorsarnissaanik piumassuseqarnerup nunatta inuisa akornanni qanoq atatiginersugut uppernarsarpaat. Tassa ataatsimiinnerit aqqutigalugit Issittoq pillugu ataatsimoorluta piumassuseqarnerput tunngavigaarput aammalu nunat tamalaat akornanni suleqatigiinnermi issittumi innuttaasut kissaatigisaasa tusarneqarnissaat qulakkeerneqartarput” - Vivian Motzfeldt.

”Kunngeqarfiup Danmarkip Issittumi Siunnersuisoqatigiinni siulittaasuuneq Norgemiit tigummagu iluatsilluarnissaalu kissaapparput. Tamanna nunap immikkoortuani piffissaavoq pingaaruteqartoq, issittumi suleqatigiinnermut piujuaannartitsinermullu pingaarutilimmik suliassaqarluni” - Espen Barth Eide

Paasisaqarnerorusuttoqartillugu tulliuttut attavissaapput:
Nunanut Allanut Ministerie-qarfik pressevagten@um.dk imaluunniit +45 61 97 92 47 (SMS’ikkuunngitsoq)
Nunanut Allanut Ilisimatusarnermullu Naalakkersuisoqarfik rsth@nanoq.gl imaluunniit +299 553303
Nunanut Allanut- aamma Inuussutissarsiutinut Ministerie-qarfik press@mfa.fo imaluunniit +298 556075