Naalakkersuisoq nikisiterivoq, sinniisoqarfinnilu pisortassanik nutaanik toqqaalluni

Nunanut Allanut Ilisimatusarnermullu Naalakkersuisoq Vivian Motzfeldt, maanna kikkut Kalaallit Nunaata nunani allani sinniisoqarfiini ukiuni tulliuttuni siuttutut inissisimassanersut aalajangiuppaa. Sinniisoqarfinni pisortanngortussat Kalaallit Nunaata nunarsuarmioqatigiinni soqutigisaat aammalu Kalaallit Nunaata suleqatigisaatinik qanimut patajaatsumillu oqaloqatigiinnissanut qitiusumik inissisimasuupput.

- Juulip aallaqqaataanit 2025 Jacob Isbosethsen Washington D.C.-mi sinniisoqarfimmi pisortassatut inissinneqassaaq. Jacob Isbosethsen maanna Beijingimi sinniisoqarfimmi pisortatut inissisimavoq.

- Septemberip aallaqqaataanit 2025 Tove Søvndahl Gant Bruxellesimi sinniisoqarfimmi pisortanngussaaq. Tove Søvndahl Gant Reykjavikimi sinniisoqarfimmi maanna pisortatut inissisimavoq.

- Septemberip aallaqqaataanit 2025 Karsten Peter Jensen Reykjavikimi sinniisoqarfimmi pisortanngussaaq. Karsten Peter Jensen maanna Nunanut Allanut Ilisimatusarnermullu Naalakkersuisoqarfimmi siunnersortaanertut inissisimavoq.

- Juulip 31-nit 2025 Inuuteq Holm Olsen Nuummut angerlartussanngussaaq, Issittumi Siunnersuisooqatigiit Siulittaasoqarfianni suleqataassalluni. Inuuteq Holm Olsen 2021-miilli Bruxellesimi sinniisoqarfimmi pisortatut inissisimavoq.

- Beijingimi sinniisoqarfimmi pisortatut atorfik inuttassarsiuunneqassaaq, ukioq mannalu kingusinnerusukkut toqqaasoqarumaarluni.

Aprilimi Kenneth Høegh Washington D.C.-mit angerlartinneqarpoq, tassani Kunngeqarfit ataatsimoortoq sinnerlugu Issittumi Aallartitatut atorfinittussanngornini tunngavigalgu.

Nunanut Allanut Ilisisimatusarnermullu Naalakkersuisoq Vivian Motzfeldt ima oqaaseqarpoq:

"Kalaallit Nunaat nunarsuarmioqatigiinni ukkatarineqartorujussuuvoq, piffissamilu aggersumi suliassanik pingaarutilinnik periarfissanillu suliassaqarpugut. Suliassaqarfinnut nukittuunik sulisussaqaratta tanngassimaarutigaara, taakkulu pikkorilluinnarlutik akuutitsillutillu Kalaallit Nunaata soqutigisaannik Kalaallit Nunaannut sinniisorissavavut. Ilutigaluguttaa nuannaarutigalugu oqaatigissavara angerlartitsinitsigut Issittumi Siunnersuisooqatigiinni siulittaasuuffeqarnitsinni sulinissamut nukittorsaasinnaagatta. Qularinngilluinnarpara sinniisoqarfimmi pisortassatut toqqarneqartut Kalaallit Nunaannut iluaqutaasumik piumassuseqarluarlutik pitsaassutsimillu pigisaqarlutik Kalaallit Nunaannut iluaqutaajumaartut."

Annertunerusumik paasisaqarusukkuit Nunanut Allanut Ilisimatusarnermullu Naalakkersuisup allattaa Rosa Thorsen attavigisinnaavat, e-mail: rsth@nanoq.gl