Ministeriunermik naapeqateqarneq

Naalakkersuisut Siulittaasuattut Danmarkimut apriilimi angalaninni pingaarnertut danskit ministeriunerat naapippara. Tassani pingaaruteqarsimavoq naalakkersuisoqatigiilersut nutaat, isumaqatigiissutaannik saqqummiineq aammalu oqaloqateqarneq.

Ministeriunerup naapinnerani nunatut soqutigisagut suleqatigiiffigerusutagullu saqqummiuppakka. Suleqatigiiffippassuaqarpugummi taamaattumik oqaloqatigiiffissaqarluarpugut. Oqaloqatigiinnermi isumaqatigiinniarnernik ingerlatsisoqanngilaq qalleqqissarneqarlunili Naalakkersuisunngortut isumaqatigiissutaani anguniarneqartut piffissami aggersumi naapeqatigiisssutigineqartarnissaat naatsorsuutigineqassasoq.

Naalakkersuisoqatigiit isumaqatigiissutaat aallavigalugu aamma namminiilivinnissamut aqqut nanginneqartussaasoq erseqqissaatigineqarluni.

Nunarsuarmi pissutsit tunngavigalugit Danmarki aammalu NATO suleqatigilluartussaavagut. Suleqatigiilluarneq isumaqanngilaq Danmarkimut pituttornerusoqalernissaanik, nunattami soqutigisaraa namminersulivinnissaq taamaattoq aamma soqutisaralugu nunarsuarmiooqataalluni sillimaniarnissamut suleqataanissaq.

Danmarkimilli suleqateqarnermi nunatta illersornissakkut nunanullu allanut pissutsit pillugit annertusarnissaa sulissutigineqarpoq.

Inussiarnersumik inuulluaqqusillunga
Jens-Frederik Nielsen
Naalakkersuisut Siulittaasuat