Naalakkersuisut utoqqaat pillugit oqaaseqartartup ernumanera paasilluarpaat: Utoqqarnut suliassaqarfik naalakkersuinikkut salliutinneqarpoq – utoqqaat pillugit inatsit nutaaq qinigaaffimmi matumani suliarineqassaaq

Naalakkersuisut utoqqaat pillugit oqaaseqartartup, Kiista P. Isaksenip, tusagassiorfinnut utoqqarnut suliassaqarfik pillugu ernumassuteqarnerminik, nalunaaruteqarnera eqqumaffigilluinnarpaat.

Kissaatigaara erseqqissassallugu, utoqqarnut suliassaqarfik puigorneqanngilluinnarmat tunulliunneqaraniluunniit. Akerlianik Isumaginninnermut, Suliffeqarnermut, Nunamut Namminermut Avatangiisinullu Naalakkersuisup, Bentiaraq Ottosenip, suliassaqarfiani qitiulluinnarpoq.

Alloriarnissat siulliit ilagaat, suliniutit siunnerfillit nukittorsarnissaannut atatillugu utoqqaat pillugit oqaaseqartartoq, kommunit aamma utoqqaat kattuffii kinguneqartussamik oqaloqatigerusukkatsigit. Isumaginninnermut, Suliffeqarnermut, Nunamut Namminermut Avatangiisinullu Naalakkersuisup, Bentiaraq Ottosenip, utoqqarnut inatsissap sinaakkusernissaanut suliaqarnermi inuk qitiutinneqassasoq erseqqissarusuppaa.

• Utoqqaat pillugit inatsisip ilusilersorneqarnerani utoqqaat kattuffii, inuiaqatigiit kommunillu ilanngutitinneqarnerat annertusisaq
• Utoqqarnut aningaasaqarnikkut, peqqissutsikkut isumaginninnikkullu unammilligassalinnut suliniutit siunnerfillit
• Utoqqalinersiaqarnissamut ukiorititat qaangerneranni suliniarlutik kissaateqartunut utoqqaanerusutut eqeersimaartumik inuuneq pillugu pisinnaatitaaffik
• Suliniutit ataatsimoortitsisut najukkamilu sammisassat aqqutigalugit kiserliornermik akiuiniarneq

Naalakkersuisut isumaqatigaat utoqqaat ataqqineqassasut, aamma nipaat inuiaqatigiit akornanni oqallinnermi tusaaneqassasut. Utoqqaat eqimattaanngillat assigiiaartut, kisianni innuttaasut inuttut immikkoorutillit assigiinngitsunik pisariaqartitallit – aamma tamannarpiaq sulinitsinni ersersinneqassaaq.

Utoqqaat pisinnaatitaaffii, atugarissaarnerat pitsaasumillu inuuneqarnerat naalakkersuinikkut sulinitsinni ersarissuunissaat takussaanissaallu qulakkeerniarpara.

Eqqaamallugu utoqqaat pillugit oqaaseqartartoq ataatsimeeqatiginiarlugu Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq, Bentiaraq Ottosen, Qaqortumut angalaniarluni pilersaaruteqarmat.

Inussiarnersumik inuulluaqqusillunga

Bentiaraq Ottosen