AtuartigukQamuteralaat (snescootere) puisinniarnermi atoqqusaanngillat
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoq
Assi: Jesper Krogh Johansen
Aalisarnermut, Piniarnermut Nunalerinermut Imminut Pilersornermullu Naalakkersuisoqarfik Tunumi qamuteralaat motoorillit puisinniarnermi unioqqutitsilluni atorneqartartut saaffigineqarneq tunngavigalugu paasisimavaa.
Tamatumunnga atatillugu naalakkersuisoqarfimmit kajumissaarutigineqassaq piniarnermi inatsisit malittarisassallu malinneqarnissaat, uani pisumi pineqarluni puisit pillugit nalunaarut: Puisinik illersuineq piniarnerlu pillugit Namminersorlutik Oqartussat nalunaarutaat nr. 16, 12. Novembari 2010-meersoq.
Erseqqissaatigineqassaaq puisinniarnermi qamuteralaat atorneqaqqusaanngimmata nalunaarummi § 6 naapertorlugu. Taamaattoq immap sikuani immikkullu aqqutigineqarsinnaasutut toqqarneqarsimasukkut pisanik assartuutigineqarsinnaallutik, uuttorniarneq minillugu.
Kommuneqarfik Sermersooq qamuteralaat pillugit ileqqoreqqusaqarpoq, uani aaneqarsinnaavoq.
Eqqaasitsissutigineqassaaq kommunit arlaqartut qamuteralaat motoorillit pillugit kommunimi ileqqoreqqusaqarmata, kommunerisat paasiniaaffigisinnaavat najugarisanni ileqqoreqqusaqarnersoq.
Sukumiinerusumik paasisaqarusukkaanni immikkoortortaqarfimmi pisortaq Amalie Jessen, e-mail: Amalie@nanoq.gl, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq