Qaqqat innartai arlallit nakutigineqassapput

Qaqqat innartai annertunerusumik nakkutigineqartariaqartut

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup Umiammakku Nunaanni aamma Kangerluarsummi qaqqat innartai qajannartortallit ullut tamaasa nakkutigai. Qaammatit tamaasa sumiiffinni nakkutigineqartuni taakkunani qaqqanik sisoortoqarnissaanik aarlerinaataasunik nalilersuinermik nutartikkamik Naalakkersuisoqarfik nittartakkami https://govmin.gl/ka/qaqqat-sisoorneri saqqummersitsisarpoq.

Nunap immikkoortuini misissuineq
2024-miilli Umiammakku Nunaata aamma Kangerluarsuup saniatigut Kalaallit Nunaanni sumiiffiit inoqartut qaqqanik sisoortoqarnerani sunnerneqarsinnaasut allat aamma ilaatilerlugit misissuiffigisaminnik ujarassiuut annertusititsipput.

Qaqqat innartaasa allat annertuunik qajannartortallit, innuttaasunut navianartorsiortitsisinnaasut, takkuitsoorneqannginnissaat qulakkeerniarlugu, taamaaliortoqarpoq. Taamaaliornermi ujarassiuut suliat ingerlaneri ingerlanneqartut pillugit paasissutissanik katersissapput aammalu innuttaasunut taakkua qanitaanni toqqissisimatitsissallutik.
Nunap immikkoortuini misissuineq maannamuugallartoq Uummannap sulluani, Sullorsuarmi kiisalu Nuup kangerluani Qaarusuup Qaqqaani, katillugit 15.000 km² missaanniittuni, ingerlanneqarpoq.

Nakkutiginninnerup annertusitinnissaanik pisariaqartitsineq
Sumiiffinni sivinganerit qajannartortallit hunnorujut sinnillit nalunaarsorneqarput, tassani amerlanersaat Sullorsuarmi sivinganerni inissisimallutik. Sivinganerit qajannartortallit amerlanersai nalilerneqarput saattuinnarmik issussuseqartutut, aammalu nunami qeriuaannartumi pisoqarnerulerneranik pissuteqarlutik. Taakkua sumiiffinnut najugaqarfigineqartunut navianartorsiortitsinngillat.

Taamaattoq sumiiffiit tallimat annertunerusumik nakkutigineqartariaqartut ujarassiuut toqqarpaat:

• Aappaluttukassak: Qaarsoq Saattuniit 12 km missaannik ungasissusilimmi Uummannap kangiani Salliarutsimi inissisimasoq. Qaarsumi nikikkiartuaartut nalunaarsorneqarsinnaanngillat, kisianni iloqisseriartortoq imaluunniit siusinnerusukkut iloqissersimaneq qaarsup qaavani ilutsit tikkuussipput, taamaattumillu nakkutigineqartariaqarluni.
• Innarsuaq: Nuussuup avannamut sineriaani qaarsut innaaqqissut Ikerasaap kujataani 10 km missaanni ungasissusilimmiittut. Sajuppillatsitsisarluni misissuinerit takutippaat quppat qajannarsisimanerat takussutissaqartoq, erseqqinnerusumillu nakkutigineqartariaqarluni.
• Illorsuaasaq: Qeqertarsuup avannaata sineriaani Saqqap kujammut kitaani 24 km missaanni ungasissusilimmi basaltit ujararujussuit. Naalakkersuisoqarfimmi ujarassiuut qaammataasanit nunap nikikkiartuaarnerinik uuttortaariaaseq atorlugu sivinganeriup pineqartup ukiuni kingullerni qulini nikikkiartorsimanera takussutissaqartippaat. Sumiiffik 3,5 x 2,5 km-sut annertutigisoq nikikkiartorpoq sisoorsinnaasortaatalu annertussusaa paasiniarlugu orniugulluni misissuinerit pisariaqartinneqarput. Tamanna
• Paatuut: Nuussuup kujammut sineriaani sumiiffik, ukioq 2000 Qullissat eqqaanni qaqqap sisoorfiatut aammalu tassaarsuup qarsutsiffiatut ilisimaneqartoq. 2024-p naajartornerani sumiiffimmi sisoortoq annikinnerusoq takkuneqarpoq. Radarimik misissueqqissaarnerup takutippaa qaqqap iluani itinerusumi iloqisseriartorsinnaasoq. Qaqqap sisoorsinnaasup annertussusaa paasiumallugu pisariaqarpoq allanngornerit qaqqap iluani pisut itissusaat ilisimanissaat, taamaammallu ornigulluni misissuinissaq pisariaqarluni. Paatuuni qaqqap sivinganera nikikkiartortoq annersaa tassaavoq sioqqat ujaqqallu kaanngarnikut. Sivinganerit taamak ittut piffissap sivisunngitsup ingerlanerani sakkortuumik sialleqqammertillugu aputillu aattupallannerata nalaani imaluunniit qatsinnerusumit ujaqqanit nakkartunit tuffigineqarnermikkut annertunngitsumik sisuulersinnaapput.
• Qaarusuup Qaqqaa: Nuup kangerluaniippoq, taannalu tassaavoq sisoortut kinneri annertunerusut pisoqqat, ukiut qulikkaat kingulliit ingerlaneranni, sivisunerusumik ilimanarluni. nikikkiartuaarsimasut. Taamaattumik pisariaqarpoq misissoqqissallugu qajannaassusaa erseqqinnerusumik paasiumallugu. Qaarusuup Qaqqaani sivinganeq sisoorsinnaasoq sisujaaqarfiuvoq ujaqqanik qatsinnerusumit nakkaasunit eqqorneqaruni masannarujussuarnerataluunnit kingornagut sisoorsinnaasoq. Ukiut tulliuttut aasaanerini dronet atorlugit misissuinerit ingerlanneqartassapput.

Qaqqanik annertoorsuarmik sisoortoqaqqajaanera takussutissaqanngilaq
Sumiiffiit taakku tallimat arlaannaaniluunniit annertoorsuarmik qaqqanit sisoortoqalerneranik takussutissaqanngilaq. Sumiiffinnik pineqartunik nakkutiginninneq sumiissusersiutinik GNSS-stationik inissiinikkut, nunap sajuppillattarneranik misissuinikkut kiisalu dronet atorlugit uuttortaanikkut ingerlanneqassaaq. Tamanna ukiormanna aggustusip qaammataanerani pissaaq. Atortorissaarutit sumiiffinnut inissinneqartut ukiuni tulliuttuni paasissutissanik ujarassiuunut nassiussuissapput.

Suliaqarneq nunani tamalaani tassaarsuarnut qaqqallu sisoortarnerinut immikkut ilisimasallit qanimut suleqatigalugit, kiisalu ataatsimut suleqatigiissitat tassaasut Namminersorlutik Oqartussani ujarassiuut aamma upalungaarsimanermik suliallit. Tassanittaaq ilaasortaatitaqarput Kalaallit Nunaanni Politiit, Issittumi Illersornissaqarfik, Aningaasaqarnermut Akileraartarnermullu Naalakkersuisoqarfik, Peqqissutsimut inunnullu Innarluutilinnut Naalakkersuisoqarfik, Ineqarnermut Attaveqaasersuutinullu Naalakkersuisoqarfik kiisalu Avannaata Kommunea.

Sisoortunik imaluunniit sivinganerni nalinginnaasuunngitsunik pisoqarnerinik takusaqassaguit ujarassiuut tusagaqarfigerusuppaatsit. Tamanna linki una iluaqutsiullugu pisinnaavoq: https://govmin.gl/da/fjeldskred/indberetning/

Ujarassiuut akuttunngitsumik paasissutissanik nutaanik attuumassutilinnik nutaarsiassaqartitsisassapput.

Qaqqat taaneqartut inissisimaffiinut nunap assinga

Apeqqutit upalugaarsimanermut tunngasut pillugit saaffigisassaavoq Avatangiisinut Pinngortitamullu Naalakkersuisoqarfik pan@nanoq.gl.

Apeqqutit ujarassiornermut tunngassuteqartut pillugit saaffissaavoq Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfimmi pisortaq Jørgen T. Hammeken-Holm, joeh@nanoq.gl