Nuna tamakkerlugu kigutissarnermut ullorititaasoq 7. maj 2025 – Kigutit saligutaat inuunermik annaassisarpoq

Ukioq manna kigutissarnermut ullorititaasoq, maajip ulluisa arfineq aappaanni 19-issaannik malunnartinneqassaaq.

Ullut tamaasa qarnup eqqiluitsuutinnissaata kigutillu salittarnissaassa pingaaruteqassusaat qitiutillugu, nuna tamakkerlugu sammisaqartitsinissaq pilersaarutaavoq.

”Nuna tamakkerlugu kigutigisarnermut ulloqartitsisarnermi, meeqqat qanerminnik eqqiluitsuutitsinissaannik ukkassinissaq siunertaavoq. Nuannisarnissaq ataatsimoorussinissarlu pineqarput, aammali ilungersunartortaqarnerata oqariartuutigineqarneranik erseqqissaanissamut tunngassuteqarluni. Kigutigissartarnerup ukkanneqarneragut, meeqqani angajoqqaanilu pitsaasunik ileqqoqarnermik nukittorsaanissaq kissaatigaarput”, kigutilerisut qullersaat Helena Holm oqarpoq.

Ukioq manna kigutigissarnermut ullorititaasumi sammisassatut qulequtsiunneqartoq tassaavoq”Kigutit saligutaat inuunermik annaassisarpoq”, tamatumani qarnup ajoquteqannginnissaata nalinginnaasumillu peqqissutsip imminnut ataqatigiilluinnarnerannik erseqqissaanissaq, kigutileriveqarfimmiit kissaatigineqarpoq.

”Qarnup eqqiluitsuutilluarneragut kigutit pututsaalineqaannaratik ikkikkullu aseruuttoorsinnaaneq pitsaalisineqaannarani – timilli tamakkerluni peqqissuunissaanut sunniuteqarnera nalunngilarput.

Assersuutigalugu qarnup qanoq innera nappaatillu soorlu; diabetes, uummatikkut taqqatigullu nappaatit, gigti assigisaallu imminnut attuumassuteqarput. Taamaammat oqariartuut ersarissuussaaq; Kigutit saligutaat timivit tamakkiisup paarinissaanut sakkussaasinnaavoq pingaarutilik”, Helena Holm oqarpoq.

Kigutigissartarnermut tunngatillugu; atuarfinni, paaqqinniffinni kigutilerivinnilu, ullormi kigutigissarfimmi meeqqanik inersimasunillu pitsaanerusunik ileqqoqalernissamut soqutiginnilersitsisussanik paasititsiniaasoqassaaq ilinniartitsisoqarlunilu.

Tusagassiorfinnut nalunaarut una pillugu apeqqutissat uunga saaffiginnissutaassapput: Sundhedsledelsen@peqqik.gl.