Toqqaannartumik avammut annissuinermut malittarisassat

Toqqaannartumik avammut annissuinermut tunngasut pillugit Kalaallit Nunaanni Aalisarnermut Piniarnermullu Nakkutilliisoqarfik (KANUAPNA) piffissami uani saaffiginnissutinik tigusisaqattaarpoq. Uku tulliuttut eqqaamajuaannakkit:

Avammut annissuinissamut akuersissummik atuuttumik tamatigut peqartassaatit. Inuussutissarsiornermut, Nukissiuuteqarnermut, Aatsitassanut, Inatsisit Atuutinneqarnerannut Naligiissitaanermullu Naalakkersuisoqarfimmut Sullissivikkut avammut annissuinissamut akuersissummik qinnuteqassaatit. Aalisakkanut aalisakkanillu tunisassianut allattorsimaffik, avammut annissuisinnaanermut akuersissummik qinnuteqaat nittartakkatsinni nassaarisinnaavatit. Tunisassiaq avammut annikkusutat allattorsimaffimmiinngippat mailerput gfjk-certificates@nanoq.gl atorlugu allaffigaluta qinnuteqaatigisinnaavat.

Avammut annissuisutut KANUAPNA-mi pilersinneqartussaavutit. Suliap aallartinnissaanut immersugassaq immersorlugu qinnuteqassaatit, taanna nittartakkatsinni nassaarisinnaavat. Periuutsit pillugu aamma ugguuna atuarsinnaavutit. Immersugassaq mailitsinnut gfjk-certificates@nanoq.gl-imut nassiutissavat .

Pisatit uuttaavimmit akuerineqartumit tamatigut oqimaalutarneqartassapput. Tulaassinermut nalunaarummik taassuma saniatigut aamma immersuissaatit, taanna nittartakkatsinni nanisinnaavat mailitsinnullu gfjk@nanoq.gl-imut nassiullugu.

Pisavit Danmarkimut imaluunniit EU-mi nunanut allanut nassiunneqarnissai kissaatigigukkit, EU-mut eqqussinermut uppernarsaammik KANUAPNA-mut qinnuteqaammik nassiussissaatit. Eqqussinermut uppernarsaat nunanut allanut nassiussinermi aamma atorneqarsinnaavoq. Ingerlanera pillugu paasisaqarnerorusukkuit nittartakkatsinni taanna pillugu atuarsinnaavutit.

Taakkua saniatigut makkua malugeqquneqarput:

Uillut, suaat, sinnikunik tunisassiat soorlu niaqqut pamiullu pillugit eqqussinermut uppernarsaammik EU piumasaqaateqarneq ajorpoq. Taamaakkaluartorli tulaassinermut nalunaarut suli immersortussaassavat KANUAPNA-mullu nassiullugu, taamaalioruit illit pisatit pisassiissutinit ilanngaatigineqarsinnaalissapput. Taamaaliunngikkuit Kalaallit Nunaata MSC-imik meqqiutaanut kingunerlutitsisoqarsinnaavoq. Nunani allani ilanngaaserisutut oqartussaasoq arlaatigut uppernarsaammik piumasaqassappat, soorunami eqqussinermut uppernarsaammik suli pissarsisinnaassaatit.

Sumilluunnit apeqqutissaqaruit, sianerfigisinnaavatsigut imaluunniit allaffigisinnaavatsigut. Nuummi qullersaqarfitsinnut imaluunniit nunap immikkoortuini allaffitsinnut, Sisimiuniittumut Ilulissaniittumulluunniit, siumoortumik isumaqatigiissuteqareernikkut alakkaanissannut aamma tikilluaqqusaavutit. MSC-p meqqia pillugu imaluunniit tunisassiat MSC-p meqqianik nalunaaqutsikkat pillugit apeqqutissaqaruit, Sustainable Fisheries Greenland-imut (SFG)-imut, Kalaallit Nunaanni MSC-p meqqianik nalunaaqutsiisarnermut suliarinnittartumut, attaveqarsinnaavutit. Nittartagaanni aamma atuarsinnaavutit, tassani attavigineqarsinnaasut aamma nanisinnaavatit.

Annertunerusumik paasisaqarusunnermi saaffigineqarsinnaavoq Jens Lykke Borch (Kalaallit Nunaanni Aalisarnermut Piniarnermullu Nakkutilliisoqarfik) gfjk@nanoq.gl +299 345000