Issittumi Aallartitamik toqqaaneq

Kunngeqarfik Danmarkip Issittumi Aallartitatut nutaatut Kenneth Høegh Nunanut Allanut Ministerip Lars Løkke Rasmussenip toqqarpaa. Kalaallit Nunaanniit innersuussineq malillugu toqqaaneq pivoq.

Issittumi Siunnersuisooqatigiinni siulittaasoqarfinngortussami suliassanik agguataarineq pillugu december 2024-mi Kalaallit Nunaata, Savalimmiut aamma Danmarkip akornanni isumaqatigiittoqarnerata malitsigisaanik toqqaaneq pivoq. Nunatsinni Naalakkersuisut Issittumi Aallartitamik innersuussuteqassasut Savalimmiormiuniillu aammalu danskinit akuerineqarnerata kingorna Nunanut Allanut Ministerimit toqqarneqarnissaa suliassanik agguataarinerup ilaatigut nassataraa.

Issittumi Aallartitatut suliami saniatigut, maj 2025-miit siumut ukiuni marlunni Kunngeqarfiup Issittumi Siunnersuisooqatigiinnut siulittaasoqarfimmik tigummisuunerani, qaffasissumik atorfilittanut eqimattanut siulittaasutut (Chair of the Senior Arctic Officials-itut imaluunniit SAO Chairitut) suliaq Kenneth Høeghip tigummissavaa. SAO Chairitut suliaq, Issittumi Siunnersuisooqatigiit sulinerata aammalu maanna sumiissutsimik politikkikkut pisoqaraluaqisoq, ingerlaannarnissaanik qulakkeerinissamik pingaarnertut imaqarpoq.

Siulittaasoqarfimmik tigumminninnerup nalaani Savalimmiut Deputy SAO Chair-itut inissisimassapput, tamatumani Danmarkip suli National Senior Arctic Official-itut suliaq tigummissallugu.

Kenneth Høegh maanna Washington DC-mi Kalaallit Nunaata sinniisoqarfiani pisortaavoq. Siusinnerusukkut ilaatigut Kalaallit Nunaanni Nunanut Allanut Naalakkersuisoqarfimmi pisortaasimalluni, tamannalu suli sioqqullugu DANIDA-p immikkoortortaqarfiini Nepalimi aamma Bangladeshimi sulisimalluni.

Nunanut Allanut Ilisimatusarnermullu Naalakkersuisoqarfimmi soorluttaaq Københavnimi Nunanut Allanut Ministerieqarfimmi Kenneth Høegh allaffittaassaaq.

Kunngeqarfiup piffissami aggersumi Issittumi Siunnersuisooqatigiinnut siulittaasuutitaqalernissaanut pilersaarusiap Nuummi apriilip aqqarnani saqqummiunneqarnissaanut peqatigitillugu Issittumi Aallartitamik toqqaaneq pissaaq. Pilersaarusiaq pillugu uani annertunerusumik atuartoqarsinnaavoq: https://arctic-council.org/news/presentation-kingdom-of-denmarks-arctic-council-chairship-program/

”Ullumi Kenneth Høegh Issittumi Aallartitatut toqqarsinnaagatsigu iluarisimaaqaara. Tassuugunnguaq Issittumi Siunnersuisooqatigiinnut siulittaasoqarfik tigugutsigu Kunngeqarfiup avammut kiinnertarnera ingerlatarilissavaa. Kalaallit Nunaanniit tunulequttaminik aammalu ukiorpassuarni nunani tamalaani misilittakkaminik, Kunngeqarfiup issittumi saqqumilaarnera nukittorsalertussaavaa.

Nuannaarutigaara suleqatigiissitaasussat inissitsitermata, taamaalilluta Issittumi Siunnersuisooqatigiinnut siulittaasoqarfiup tigunissaanut piareersimalerluta, peqatigiillutalu ukiuni tulliuttuni marlunni sulineq siulersussallutigu,” Nunanut Allunut Ministeri Lars Løkke Rasmusseni oqarpoq.

Nunanut Allanut Ilisimatusarnermullu Naalakkersuisoq Vivian Motzfeldt tulliuttunik oqaaseqarpoq:

”Kenneth Høeghimik Kunngeqarfimmut Issittumi Aallartitatut nutaatut ilisarititsinermut peqataasinnaagama nuannaarutigaara. Issittumi Siunnersuisooqatigiinnut siulittaasoqarfimmi nunarput qitiusumik inissisimaffeqalermat tulluusimaarutigaara. Kunngeqarfimmi nunarput issittortaavoq, taamaammallu tamanna Issittumi Aallartitamik nutaamik toqqaasoqarnerani ersersinneqarmat nuannaarutigaara. Nunatta pingasuusut akornanni pitsaasumik suleqatigiinnerup ingerlateqqinnissaanut qilanaarpunga.”

”Issittumi Aallaartitamik toqqaanermik Issittumi Siunnersuisooqatigiinni siulittaasoqarfimmik tigusinissamut maanna atortussarissaarpugut. Aallartitaq, Kalaallit Nunaanniit, Savalimmiuniit aammalu Danmark-imiit sinniisunik ilaqartut, issittumi suleqatigiit tunniusimasut nukittorsarnissaannut tapersiissaaq. Peqatigiilluta siulittaasuutitaqarnissamut sumiiffiullu siunissaanut aalajangiisuusoq suleqatigiinnermut akisussaaffik tigussallutigu qilanaarpugut,” Nunanut Allanut aamma Inuussutissarsiornermut Naalakkersuisoq Sirið Stenberg, oqarpoq.

Issittumi Siunnersuisooqatigiit pillugit paasissutissaq
Issittumi Siunnersuisooqatigiit issittumi naalagaaffinnik arfineq-pingasunik kattuffinnillu arfinilinnik (ataavartumik peqataasartunik), Issittumi inoqqaajusunik sinniisuutitalinnik ilaasortaqarput.

Taakku issittumi naalagaaffiit arfineq-pingasut tassaapput: Canada, Kunngeqarfik Danmark, Finland, Island, Norge, Rusland, Sverige aamma USA.

Issittumi Siunnersuisooqatigiit nunani tamalaani oqalliffiuvoq, Issittumi qitiusumik apeqqutinik siammasissumik sulialik. Silarsuarmi allanngorluinnartumi issittumi innuttaasunut ilaatillugit pingaartumik nunap inoqqaavinut inuuniarnermi atugassarititaasut Siunnersuisooqatigiit suliaanni qitiupput. Allanngornerit, pingaartumik silap pissusaani aamma avatangiisini annertoorsuarmik allanngornernit sunnerneqartartut. Issittumi kissassutsit, maanna nunarsuaq tamakkerlugu ukiumoortumik agguaqatigiinneranniit pingasoriaammik sukkanerusumik, suli tassa qaffakkiartussaqqaarput. Silap pissusaani, imaani avatangiisini, uumassuseqassutsip assigiinngisitaartuunerani, ajunaarnersuarnik passussisarnermi il.il., ineriartornerup allakkianngortiterlugu Issittumi Siunnersuisooqatigiit suliaat, aammattaaq nunani tamalaani suleqatigiinnerni assigiinngitsuni, assorsuaq sunniuteqarpoq.

Siunnersuisooqatigiinni sulinermik unamminiagassiivoq. Nalunaarsugaasunik atorfilittatigoortunik (SAO-nik ataatsimiinnernik) imaluunniit politikkimik qaffasissusilinnik (minister-it ataatsimiittarnerinik) ataatsimiittoqassaaqqavoq, akerlianilli atortorissaarutitigut (teknikkikkut) suleqatigiissitani, qarasaasiatigut naapittarsinnaanermikkut suliaminnik pingaarutilinnik ingerlasseqqinnisamut periarfissaqarlutik.

Paasisaqarnerorusuttoqartillugu tulliuttut attavissaapput:

Nunanut Allanut Ministerie-qarfik pressevagten@um.dk imaluunniit +45 61 97 92 47 (SMS’ikkuunngitsoq)

Nunanut Allanut Ilisimatusarnermullu Naalakkersuisoqarfik rsth@nanoq.gl imaluunniit +299 553303

Nunanut Allanut- aamma Inuussutissarsiutinut Ministerie-qarfik press@mfa.fo imaluunniit +298 556075