Kunngeqarfiup Danmarkip Savalimmiut, Danmarkip aamma Kalaallit Nunaata maajip aqqaneq-aappaat 2025 Issittumi Siunnersuisooqatigiinni siulittaasuuffik tigussavaa

Nuummi Katuami siulittaasuunissamut pilersaarut apriilip aqqarnani 2025 Nunanut Allanut Ilisimatusarnermullu Naalakkersuisup saqqummiuppaa. Siulittaasuunissamut pilersaarusiaq, Kunngeqarfiup Issittumi Siunnersuisooqatigiinni piffissami aggersumi siulittaasuunissaanut takorluukkanik imaqarpoq.

Kunngeqarfiup siulittaasuunissaanut pilersaarummi pingaarnertut qilequttat makku pingaarnersiugaapput:

• Issittumi nunap inoqqaavi aamma inoqarfiillu
• Piujuartitsisumik aningaasaqarnikkut ineriartortitsineq aamma nukissiuutitigut ikaarsaarnermi aaqqiissutit
• Imartat
• Issittumi silap pissusaata allanngoriartornera
• Uumassusillit amerlaarsuunissaat
  
  

Pingaarnersiuinerit tamarmik, nunap inoqqaavinik, nunap inoqqaavisa ilisimasaannik kiisalu inuusuttunik peqataatitsinermik akimuisumik ukkatarinniffiussapput. Tamatumunnga atatillugu eqqarsartaatsikkut peqqissuuneq aamma imminortarnermik pitsaaliuineq immikkut ukkatarineqassapput.

Issuaaneq:

Nunanut Allanut Ilisimatusarnermullu Naalakkersuisoq Vivian Motzfeldt: “Kiisami ukiunut tulliuttunut marlunnut Kunngeqarfiup politikkikkut pingaarnersiuineri saqqummiussinnaanngorlutigit Naalakkersuisuniit tulluusimaarutigingaarparput. Nunani tamalaanni piffissami najummassimanartorsiorfiusumi issittormiunut kiisalu avatangiisinut aamma silap pissusaanut neriunnartumik iluaqutaajumaarneranik pingaarnersiuinerupput. Savalimmiunik aamma Danmarkimik tamanna pillugu suleqatigiinnermut pitsaasumut qujavunga ukiunilu marlunni aggersuni Danmarkimi Nunanut Allanut Ministerimik suleqatigiinnissamut qilanaarlunga aammalu Savalimmiuni Nunanut Allanut tunngasunut Naalakkersuisunut Ilaasortamik.”

Siulersuisoqarfimmut pilersaarut link-imi tulliuttumi tamakkerlugu atuarneqarsinnaavoq:
https://arctic-council.org/news/presentation-kingdom-of-denmarks-arctic-council-chairship-program/

Saqqummiineq, toqqaannartumik tamanut aallakaatinnissaanut periarfissaligaasumik, matoqqasumik ingerlanneqarpoq.

Annertunerusumik paasisaqarusukkuit attavigiuk: Naalakkersuisumut allattaagallartoq Rosa Thorsen, +299553303 rsth@nanoq.gl