Naalakkersuisut eqqumiitsuliortunut pinngorartitsisunut ataqqinaammik tunniuttagaat pillugu
Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Assiliisoq: Malik Brøns
Tallimanngornermi marsip 28-ani 2025-imi Kalaallit Nunaanni Eqqumiitsuliornermut Aningaasaateqarfik eqqumiitsuliortunut sisamanut ataqqinaammik tunniuttakkanik nalliuttorsiorpalaartumik tunniussivoq, taamaasilluni Kalaallit Nunaanni eqqumiitsuliortunik ataqqinninnermik killiffik pingaarutilik malunnartinneqarpoq. Ataqqinaammik tunniuttakkat eqqumiitsuliornermik ingerlatsineq pillugu inatsisartut inatsisaata allanngortitsisoqarnerata kinguneraa 2023-mi akuerineqartoq, taannalu ataqqinaammik tunniuttagaqarsinnaanermik aammalu eqqumiitsuliortunik akissarsisitsisinnaanermut periarfissiisuuvoq.
Inatsisip allanngortinneqarnerata kingorna ataqqinnilluni tunniuttakkat pillugit Namminersorlutik Oqartussat nalunaarutaat suliarineqarpoq, novembarillu aallaqqaataani 2024-imi atuutilersinneqarluni. Ataqqinaammik tunniussisoqartarpoq eqqumiitsuliortunut pinngorartitsisunut, suliaminnik suliaqarnerminnillu eqqumiitsuliornermut annertuumik sunniuteqarsimasunut aammalu eqqumiitsuliornerup iluani qitiusumik inissisimalersimasunut.
Ataqqinaammik tunniussineq eqqumiitsuliortup suliarisimasaanik pitsaassusaanillu nalilersuineq kisiat tunngavigalugu pisarpoq. Nalilersuinermi piumasaqaatit tallimat tunngavigineqartut tassaapput:
• Inuttut pigiliussineq
• Paasinninneq
• Alapernaanneq
• Nutaanik isumaliorneq
• Eqqumiitsuliortarnermik ineriartortitsineq.
Ataqqinaammik tunniuttakkat ukiuni qulini tunniunneqartarput, ukiumut aningaasat tunngaviusut 250.000 koruuninik naleqarlutik. Pilersitsinermi matumani siunertaavoq eqqumiitsuliortut eqqumiitsuliornermikkut Kalaallit Nunaanni eqqumiitsuliornermik ilusilersueqataasimasut ineriartortsiseqataasimasullu ataqqinneqarnissaat.
Ataqqiniarneqartut siulliit sisamat tassaapput:
Filmiliortartoq Inuk Silis Høegh,
Atuakkiortoq Niviaq Korneliussen,
Assiliisartoq Inuuteq Storch aammalu
Nipilersortartoq Ole Kristiansen.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik tamassinnut annertuumik ataqqiniarneqarnersi pillugu pilluaqqusivoq.
Sukumiinerusumik paasisaqarusukkaanni Eqqumiitsuliornermut Aningaasaateqarfimmut saaffiginnittoqarsinnaavoq: Inger Heilmann, allatsi, Toqq/direkte 34 57 51, kultur@nanoq.gl