Suila-tapit – sulinermut ilanngaat tunniunneqarpoq - tunniunneqartussanngorpoq

Katillugit 17.395.615 kr.-it tunniunneqartussanngorput. Innuttaasut 21.298-it Nem-kontoannut 101 kr. 1.313 kr.-llu tikillugit aningaasanik ikisisoqassaaq.

Inatsisartut akileraarusiisarnermik iluarsaaqqinneq akuersissutigaat 1. januar 2025-milu atortuulersillugu.

Akileraarusiisarnermik iluarsaaqqinnermi allannguutaanerpaaq tassaavoq sulinermut ilanngaat. 2025-mi innuttaasunut sulinerminniit ukiumut 70.000 - 500.000 kr.-it akornanni isertitaqartut pissarsisalissapput. Suila-tapit-nik taagorparput.

Akileraartarnermut Aqutsisoqarfik ilisimatitsivoq Suila-tapit siullermeersumik tunniunneqartussanngortut. Suila-tapinik tunniussineq siulleq makkuninnga pisuupput; suliner-miit aningaasarsiat, tunisinermiit isertitat, akileraarutit B-t aammalu suliffeqarfinni iluanaarutisiat januaarimut tunngasut.

Akileraartarnermut Aqutsisoqarfimmiit tunniussinermi siullermi innuttaasut ataasiakkaat 2025-mi katillugit isertitassaattut naatsorsuutigineqartut tunngavigineqarput.

Akileraartarnermut Aqutsisoqarfik isertitatit pillugit nalunaarfigineqarpat ukiumullu isertitassatit 160.000 kr.-it aamma 250.000 kr.-it akornanni isertitaqartussatut naatsorsutigineqarpat Suila-tapinik qaffasinnerpaanik pissarsissaatit. Qaffasinnerpaaq qaammammut 1.313 kr.-iuvoq.

Ukiumut isertitassatut naatsorsuutigigukku 70.000 – 160.000 kr.-it imaluunniit 250.000 – 500.000 kr.-it akornanniippat, appasinnerusunik Suila-tapisisassaatit.

Suila-tapit innuttaasunut tunniunneqartassapput, qaammatit tamaasa marlunngornerit pingajuanni. Innuttaasut sulisitsisuminniit qaammatit marluk sioqqullugu nalunaarutigi-neqarsimasut kisimik Suila-tapinik pissarsisinnaapput.

Nalunaarutit ukuupput:

Suliffeqarfiit aningaasarsiat pillugit nalunaarutaat.

Tunitsiviit tunisanit isertitat pillugit nalunaarutaat.

Akileraarutinik B-nik akiliinerit.

Sinneqartoorutinit iluanaarutisiat nalunaarutigineqarneri.

Akileraartarnermut Aqutsisoqarfiup erseqqissaatigissavaa Suila-tapisissaguit Nemkontoqarnissat pisariaqarpoq. Aningaaserivippit Nemkontonnik ikiorsinnaavaatit. MitID NemKontotaarnissannut amigaatigigukku kommunimit ikiorneqarsinnaavutit.

Suila-tapit pillugu paasissutissat amerlanerusut Suila.gl-kkut imaluunniit Sullissivik.gl-imi atuarsinnaavatit. Tassani ilaatigut Suila-tapinik tigusaqarsimannginninnut suut pissutaa-sinnaanersut atuarsinnaavatit.

Pissutsit piviusut

• Aningaasarsiat A-t pillugit paasissutissat Akileraartarnermut Aqutsisoqarfiup, sulisitsisut akissarsiat pillugit nalunaarutaannit aamma tunisat pillugit paasissutissat tunitsiviit nalunaarutaannit pissarsiarai. Akileraarutit B-t aki-lersimasat pillugit paasissutissat illit 2025-mut siumoortumik nalunaarsukkatit tunngavigalugit akileraarutinik B-nik akiliininneersuupput. Iluanaarutisiat pillugit paasissutissat selskabit ilinnut iluanaarutisiaqartitsisimanermin-nik nalunaarutaanneersuupput.
• Inatsisitigut tunngavigisat: Inatsisartut Inatsisaat nr. 51, 25. november 2024 pillugu Aningaasarsianit akileraarutit pillugit Inatsisartut inatsisaata, akileraaruserinermik ingerlatsineq ingerlatsineq pillugu Inatsisartut inatsisaata aamma sulisoqarnermut akitsuut pillugu Inatsisartut inatsisaata allanngortinneqarnerat pillugu Inatsisartut inatsisaat (Akileraarusiisarnermi iluarsaaqqinnerup piviusunngortinneqarnera il. il.)
• Inatsimmi anguniagaavoq innuttaasut akornanni aningaasaqarnikkut assigi-inngissut annikillisarniarlugu aammalu sulinermik kajumilersitsinissaq.
• Uani paasisaqarnerusinnaavutit: www.sullissivik.gl imalt. www.suila.gl

Siuliani allassimasunut apeqqutissaqaruit (innuttaasunit)
Attaveqarfissat; Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, oqarasuaat + 299 34 65 00, E-mail: tax@nanoq.gl
Siulianiittunut tunngatillugu tusagassiortunit apeqqutit
Attavissaq Søren Würtz, Akileraartarnermut aqutsisoqarfik, oqarasuaat. + 299 236223 maili: swrt@nanoq.gl