Nalunaarutit pingasut aalisarnermut tunngasut akuerineqarput

Aalisarneq pillugu inatsisip januaarip aallaqqaataani 2025-mi atuutilersup malitsigisaanik nalunaarutit pingasut nutaat februaarip sisamaanni 2025-mi akuerineqarput. Nalunaarutit tassaapput aalisarnerup teknikikkut iluarsartuussivigineqarnera pillugu nalunaarut, aalisarnerit aalisarnermi pisassiissutit niuerutigineqarsinnaasut pillugit aaqqissuussamiittut pillugit nalunaarut aamma aalisarsinnaanermut akuersissutit pisassiissutillu pillugit nalunaarut.

Aalisarnerup teknikikkut iluarsartuussivigineqarnera pillugu nalunaarut nutaaq
Aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaata Aalisarneq pillugu Inatsisartut inatsisaanni nr. 29, 23. maj 2024-meersumi (aalisarnermut inatsimmi) piginnaatitsinermik aalajangersakkat, aalisarnerup teknikikkut iluarsartuussivigineqartarneranut, pingaartumik piffissanik, nunap immikkoortuinik aamma atortunut tunngasunik malittarisassaqartitsisut atuutilersissavai. Taamaalilluni nalunaarutip inatsisip ilaaniittut, malittarisassaqartitsinermut tassunga tunngasut eqquutsippai, taamaakkaluartorli allaffissornikkut ilanngunneqartut immikkuullarissortai tamakkernagit.
Nalunaarut nutaaq kakkiussammiittoq atuarsinnaavat

Nalunaarut apriilip aallaqqaataani 2025-mi atuutilissaaq

Aalisarnerit aalisarnermi pisassiissutit niuerutigineqarsinnaasut pillugit aaqqissuussamiittut pillugit Namminersorlutik Oqartussat nalunaarutaat nutaaq
Nalunaarut Kalaallit Nunaata aalisarnermut oqartussaaffiani pisassanik aalisartartunut aamma pisassiissutinik niuerutigineqarsinnaasunik aaqqissuussami ilaasunut atuuppoq, PNNP tunngavigalugu aalisarnermut tunngassuteqarluni.
PNNP-t pillugit nalunaarutissatut missingiummi ilaatigut aalisagaqatigiinnik ataasiakkaanik pisassiissutinik nammineq pigisanik tunniussinermi naatsorsueriaaseq malittarisassiorneqarpoq.
Nalunaarutip aamma ingerlatsisut akornanni pisassiissutinit pigisanik niueruteqartarneq pillugu malittarisassiorneqarpoq, tassungalu ilaalluni nuunneqartussatut kissaatigineqartut minnerpaaffissaat allaqqavoq. Missingiummi ingerlatsisut siunnersuummi atuisussaatitaanermik malittarisassamik eqqortitsinngitsut pinngitsaaliissummik tunniussisarnissaat aamma malittarisassiorneqarpoq, aalisarneq pillugu inatsimmi allassimasutut.
Nalunaarut nutaaq kakkiussamiittoq atuarsinnaavat

Nalunaarut marsip aallaqqaataani 2025-mi atuutilissaaq

Aalisarsinnaanermut akuersissutit pisassiissutillu pillugit nalunaarut nutaaq
Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaa, kapitali 5-imi aamma 6-imi piginnaatitsinermut aalajangersakkat Aalisarneq pillugu Inatsisartut inatsisaat nr. 29 23. maj 2024-meersoq (aalisarneq pillugu inatsimmik) imaqassapput, taamaasillunilu aalisarsinnaanermut akuersissutinut pisassiissutinullu tunngasunut inatsisinik imaqassalluni, taamaakkaluartorli allaffissornikkut ilanngunneqartut tamakkernagit.
Siunnersuut annertuutigut nutarsaaneruvoq aalisagaqatigiillu pillugit nalunaarutit aammalu aalisarsinnaanermut akuersissutit pisassiissutillu pillugit nalunaarutinik eqikkaanerulluni. Akuersissutip tunniunnissaanut aamma pisassiissutit pillugit atortunut aalajangersakkanut atuutereersunut tunngatillugu nalunaarummi allassimasut annertunerusumik allanngunngillat.
Nalunaarut nutaaq kakkiussamiittoq atuarsinnaavat


Nalunaarut apriilip aallaqqaataani 2025-mi atuutilissaaq

Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl