AtuartigukKalaallit Nunaat - Najugaqarfitsialak - Tikitassaqqissoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Asseq: Rebecca Gustafsson, Visit Greenland
Takornariaqarnermi ineriartorneq innuttaasut ilorrisimaarnerannut kaalluaannginnissaa qanoq qulakkiissavarput?
Tamanna Naalakkersuisut akiniarlugu Takornariartitsinermut immikkoortumi pilersaarut 2025-2035 suliarineqarsimavoq. Immikkoortumi pilersaarut aqqutigalugu takornariaqarnermi ineriartorneq avatangiisinut, pinngortitamut, inuuniarnermi atugassarititaasunik pitsanngorsaatitut aammalu inuiaqatigiinnik piujuartitsinermik tunngaveqarluni ineriartorfiunissaa qulakkeerniarneqarpoq, aammalu nunarput suli najoruminarnerulersinniarneqarluni. Najugaqarfitsialak tikitassaqqissuuvoq.
Immikkoortumi pilersaarut takornariaqarnerup iluani inuussutissarsiutillit, kattuffiit, kommunit, ataatsimiisitsinerit, ataatsimeersuartitsinerit tusarniaarnerillu aqqutigalugit innuttaasut peqataatillugit suliarineqarsimavoq. Takornariaqarnerup iluani kissaatigineqartut unammilligassallu qanoq aaqqiiffigineqassanersut taakkua oqariartuutigisimavaat. Immikkoortumi pilersaarummi oqaatigineqartut katersorneqarsimapput, ukiunullu qulinut pilersaarusiarineqarsimallutik, taakkualu katillugit suliniutaapput 69-nik amerlassusillit. Suliniutit ilaat aallartisareerput, ukiunilu tulliuttuni ilaat aallartisarneqassallutik.
”Nunarsuarmit soqutigineqarnerulerneq takornarissallu amerleriaateqarneri malugilereerpagut. Tamannalu nuannaarutigaarput. Takornariaqarnerullu iluani nuannersumik misigisaqaannassagutta, takornariaqarneq aqussinnaasariaqarparput, taamaalilluni takornariaqarneq aningaasaqarnermut, kulturimut pinngortitamullu nuannersumik kinguneqartissallutigu. Aammattaaq takornariaqarnerup nunatsinnut sumiiffinnut assigiinngitsunut ukiullu qanoq ilinerinut assigiinngitsunut siaruarneqarnissaa qulakkeertariaqarparput. Tamannalu qulakkeerniarlugu ukiuni arlalinni iliuuseqartoqartariaqarpoq. ´Pilertortumik´ iliuuseqarneq tamatigut pitsaaneruneq ajorpoq. Takornariaqarpallaarneq sukkasuumillu ineriartorneq immikkoortumi pilersaarusiornermi matumani anguniagaanngilaq. Uanili anguniarneqarpoq takornariaqarnermi ineriartorneq inuussutissarsiorfittut nappatsisutut ineriartornissaa, tamattalu malinnaasinnaassalluta. Kalaallit Nunaat najugaqarfitsialaavoq, takornarissanullu tamanna aamma piujuartitsinermik tunngaveqarluta – takornarissanut uatsinnullumi Kalaallit Nunaanni tulluusimaaqaluta najugaqartuusugut – misigitikkusupparput”, Naaja H. Nathanielsen oqarpoq.
”Takornariartitsinermut immikkoortumi pilersaarut 2025-2035” maanna naalakkersuisut.gl -imi tamanut takuneqarsinnaasunngorluni saqqummernikuuvoq.
Sukumiinerusumik paasisaqarusunnermi attavissaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut, Naligiissitaanermullu Naalakkersuisoqarfik, mail: isiin@nanoq.gl Oqarasuaat: +299 34 50 00