Atuartiguk2025-mi Attaveqaasersuutit pillugit Isumasioqatigiinnerup ingerlanneqarnera iluatsilluartoq
Nassiussisuuvoq: Ineqarnermut Attaveqaasersuutinuullu Naalakkersuisoqarfik28. januaari 2025-mi Ineqarnermut Attaveqaasersuutinullu Naalakkersuisoq Hans Peter Poulsen attaveqaasersuutit pillugit isumasioqatigiissitsinermik, ukioq manna Nuummi ingerlanneqartumik ingerlatsisuuvoq, tassani nunatsinni ilaasunik angallassinermi kiffartuussinermut isumaqatigiissutit immikkut ittumik sammineqarlutik.
Ineqarnermut Attaveqaasersuutinullu Naalakkersuisoq Hans Peter Poulsen oqarpoq:
”Ukiuni makkunani nunatsinni attaveqaasersuutinut, aammalu nunatsinni angalasarnitsinnut allannguuterpassuit atuupput. Silap pissusiata allannguutai aammalu mittarfinnut nutaanut aningaasaliissutigut atugassarititaasunik allannguipput. Atugassarititaasut allanngornerisa pilersitsiviusumik, nunatsinnilu innuttaasunut iluaqutaasumik oqaasertalernissaat pingaaruteqarpoq.”
Attaveqaasersuutit pillugit isumasioqatigiissitsinermi assartuussisartut, kommunini borgmesterit, inuussutissarsiortut aammalu Inatsisartut Sanaartornermut Ataatsimiititaliaanniit aallartitat katersuutsinnissaat, taamaalillunilu ilaasunik angallassinermi unammilligassat pioreersut aammalu siunissami pisussat pillugit oqaloqatigiittoqarnissaa siunertarineqarpoq.
Siunissami nunatsinni attaveqaasersuutit annertuumik allannguuteqartussaapput. Ilaatigut Nuummi, Ilulissani Qaqortumilu mittarfiit nutaat peqqutigalugit. Ilaatigut silap pissusiata allannguutai peqqutigalugit. Taamaattumik ilaasunik angallassinermi periarfissat nutaat, angalasunut iluaqutaasinnaasut ilanngullugit eqqarsaatigineqartariaqarput.
Taamaattumik aamma peqataasut unammilligassanik qanoq misigisaqartarnerlutik isummaminnik saqqummiussinissamut Naalakkersuisuniit kaammattorneqarput. Tamatuma saniatigut aamma sullissisut akunnerminni oqaloqatigiinnissamut periarfissinneqarput.
Isumasioqatigiinnermi oqallisigineqartut kiffartuussinermut isumaqatigiissusiassat suliarineqarnerisa ingerlateqqinneqarnerini tunngaviliissapput.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl