2025-2029-mut aatsitassarsiornermi periusissiaq nutaaq

Naalakkersuisut 2025-2029-mut Aatsitassarsiornermi periusissiaq nutaaq 14. januarimi akueraat. Periusissiap siornatigut periusissiaq 2024-p naanerani qaangiuttoq taarserpaa. Periusissiami nutaami Naalakkersuisut nunatta aatsitassatigut periarfissaasa ineriartorteqqinnissaannut anguniagaat allaaserineqarput.

Aatsitassarsiornermi periusissiami qitiutinneqartut sisamaapput, taakku piffissami periusissiap ingerlanerani arlalinnik aalajangersimasunik suliniuteqarnikkut kivinneqassapput. Qitiutinneqartut sisamat tassaapput: 

1. Piujuartitsineq inuiaqatigiillu, najukkani inuiaqatigiinnut peqataatitsinermik, paasissutissanik pitsaaqutinillu qulakkeerinnittussat
2. Aningaasaliinissamut tunngavissat pilerinartut, matumani nammineq tunngaviliussatta pilerinarsarneqarnissaat sulissutigineqassaaq, aammali nunat aatsitassanik pisiortortut nunatsinni suliniutinik kivitseqataanissaat sulissutigineqassaaq.
3. Aatsitassat pinngitsoorneqarsinnaanngitsut, nunatsinni aatsitassat, nunarsuarmioqatitsinnit pingaartumik piumaneqartut isiginiassavagut
4. Nunamik assiliorneq geodatalu, pisuussutitsinnik ilisimasaqarnerulernikkut siunissami nutaanik suliniuteqarnissamut aamma tunngavissaqarneranik qulakkeerinnittussat.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq: ”Aatsitassanut suliassaqarfiup nunatsinnut isertitat annertusarnissaannut anguniakkatsinnut tapersersuisinnaanera inuiaqatigiinnit paasineqarsinnaalluarpoq. Periusissiap atuunnerani piffissami kingullermi inatsit nutarterneqarpoq nunanillu aatsitassanik pisiortortunik assigiinngitsutigut suleqatigiittoqalersimavoq kattuttoqarlunilu. Suliaq taanna ukiuni aggersuni ingerlaqqissaaq. Kalaallit Nunaannit aatsitassanik piiaanissamut nunanit aatsitassanik pisiortortunit tapersersorneqarnissarput pingaaruteqartupilussuuvoq. Soorunami avatangiisimut mianerinnittumik aamma najukkani inuiaqatigiinnik kulturimillu ataqqinnittumik akisussaassusilimmik aatsitassarsiorneq ukkatarilluinnarlugit". 

Aatsitassarsiornermi periusissiaq ilanngussartalik linkimi uani nassaarineqarsinnaavoq.


Aatsitassarsiornermi periusissiaq pillugu paasisaqarnerorusukkuit Naalakkersuisoqarfimmi pisortaq Jørgen T. Hammeken-Holm joeh@nanoq.gl-ikkut attavigiuk