Naalakkersuinikkut Ataqatigiissaarisoqatigiit Nuummi ataatsimiissapput

Naalakkersuinikkut Ataqatigiissaarisoqatigiit ataatsimiinnerat ukioq manna siulleq Nuummi januaarip ulluanni 29.-30.-anni ingerlanneqassaaq. Naalakkersuinikkut Ataqatigiissaarisoqatigiit, Naalakkersuisut borgmesterillu tamarmik inuttaralugit, nalinginnaasumik ukiumut marloriarlutit ataatsimiittarput sammisat pisortat ingerlatsinerannut ataatsimoortumik tunngassuteqartut pillugit naalakkersuinikkut oqallisiginiarlugit.

Taamaattoq ataatsimiinneq manna pisussaq ataasiinnarmik immikkoortumik imalimmik nutaamik ilusilerlugu sammisaqassaaq: Kommunit aaqqissuussaanerat nutaaq. Naalakkersuinikkut Ataqatigiissaarisoqatigiit Aaqqissuusseqqinnermik Ataatsimiititaliamik, siunissami kommunit aaqqissuussaanerat pillugu isumaliuutissiissummik inassuteqartussamik, pilersitsinissaq pillugu isummissapput. Ataatsimiititaliap suliassai ilaatigut makkuussapput:

• Pisortat ingerlatsinerannut aaqqussuussamut nutaamut, qanimut oqartussaaqataanermik nukittorsaasussat nunamilu inoqarfinni najukkami aalajangersinnaanermik annertusaasussat kiisalu innuttaasunut iluaqutaasumik suliassanik aaqqiissuteqartarneq pitsaanerusumik tapertaasussanik inassuteqaatit.
• Kommunit aaqqissuussaanerannut atugassarititaasunut sinaakkusiussat.
• Suliassat sorliit naapertuunnerpaamik qitiusumik isumagineqarnissaat, aamma suliassat sorliit najukkami aalajangerneqarlutillu ingerlanneqarnissaat pillugit inassuteqaatit.
• Pisortat ingerlatsiviisa akornanni suliassat agguataarnerat qanoq aaqqissuunneqassanersoq pillugu inassuteqaatit.
• Siunissaq ungasinnerusoq eqqarsaatigalugu piujuartitsisumik aningaasaqarnerup attanneqarsinnaanerata qulakkeerneqarnissaa pillugu inassuteqaatit.

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, ataatsimiinnermik qaaqqusisuuvoq.

"Naalakkersuinikkut Ataqatigiissaarisoqatigiit ataatsimiittarneranni ataatsimiinnissaq tullinnguuttoq qularnanngitsumik pingaarnerpaat ilagivaat. Naalakkersuisut borgmesterillu peqatigiilluta kommunit aaqqissuussaanerat pillugu apeqqut qanoq ililluta suliarissanerlugu aalajangissavarput. Suliassaq inuiaqatigiit ineriartornerannut ataatsimullu siunissatsinnut annertuumik kinguneqartussaavoq" Jess Svane oqaaseqarpoq.

Ataatsimiinneq aamma naalakkersuinikkut immikkut sammisaqarfiussaaq, pisortat ingerlatsineranni aaqqissuussamut apeqqutit qitiulluinnartut suliarineqartussaallutik.

“Pingaaruteqarluinnarpoq, Naalakkersuisut borgmesterillu naalakkersuinermik oqallinnissaq aamma kommunit aaqqissuussaanerat nutaaq pillugu sulinermi sammiviliinissaq pillugit ataatsimiinnissaat. Kommunit suliassarpassui ilaatigut pillugit oqallinnissatsinnut aamma innuttaasut kommunit sullissinerat pisinnaatitaaffigisaat pillugu najukkami qanoq oqimaaqatigiississaneripput qilanaarivakka” Jess Svane nangilluni oqaaseqarpoq.

Kommunit aaqqissuussaanerat pillugu suliassaq annertussammat naalakkersuinikkut ataqatigiissaarisoqatigiit ullut ataatsimiiffiusut pingaasut atorneqassasut pilersaarutaavoq, nalinginnaasumik marluinnaasaraluartut.

Paasisaqarnerorusukkuit Nunamut Namminermut Immikkoortortaqarfimmi pisortaq, Brandur F. Karlsson, brka@nanoq.gl atorlugu attavigineqarsinnaavoq.