Kalaallit Nunaanni inuiaqatigiit isumannaassusaat sumiiffinnilu paasisimasaqarluarneq isumaqatigiissutip ilaani Issittumut Atlantikullu avannaanut tunngasumi qitiutinneqarput

Isorartunerup sumiiffiillu innuttakissusaasa, Kalaallit Nunaat tamakkerlugu najuunnissaq nukittuumillu upalungaarsimanissaq annertuutut isumagisassanngortippaat. Issittumi nutaanik naammassinnissinnaassutsimut ilapittuutitut isumaqatigiissuteqartut Naalakkersuisullu suliniutinik inuiaqatigiit isumannaatsuunerannik piffinnilu ilisimasanik, piginnaasanik najuunnernillu iluaqutinngortitsinermik suliniutit isumaqatigiissutigaat.

Issittumi tunngaviusumik ilinniarnerup nukittorsarnera Siriusimut kalaallit qinnuteqartut atorfinitsinnissaannik aallussinerup Illersornissaqarfiullu ataani kalaallit Rangersinut immikkoortumik nutaamik pilersitsinissamullu periarfissat misissuataarnissaat. Taakku tassaapput suliniutit ilaat Illersornissaqarfiup Kalaallit Nunaani suliassanik naammassinninnerani sumiiffimmi sulisinnaasunik immikkullu paasisimasaqartunik akuutitsinissaanut qularnaarinnittussat.

Taakku saniatigut Issittumi nakkutilliinermi, alapernaarsuinermi assartuinermillu sulianik piffinni ingerlatsisunik, Issittumi immikkuullarissumik atugassaqarluni timmisartuussinermik misilittagalinnik suleqateqarnissamik pilersitsinissamut periarfissaqassaaq.

“Issittumi umiarsuit, dronit ungasissumut angalasinnaasut qaammataasatigullu naammassisinnaasat nutaat saniatigut isumaqatigiissutip ilaata sumiiffinni inuiaqatigiit nunatsinni isumannaallisaanermut upalungaasimanermullu ilapittuisinnaanerisa nukittorsarnissaannut isumaqatigiissut siunnerfiliivoq. Tamannalu piffissami ornitatsinni pingaaruteqarluinnartuuvoq.” Vivian Motzfeldt, Naalagaaffinngornissamut Nunanullu Allanut Naalakkersuisoq oqarpoq.

“Isumannaallisaanermi politikikkut unammilligassat ilungersunartut ornippavut. Illersornissaqarfiup kilitsisiaqarfiata Issittup Atlantikullu Avannaata aarlerinartorsiornera ajornerulersoq nalilerpaa. Taamaammat Illersornissaqarfiup sumiiffinni najuunnera annertuumik nukittorsassavarput. Kalaallit Nunaanni sumiiffinni ilisimasat ilaatigut Illersornissaqarfiup suliassanik isumaginninnerani, aammali Illersornissaqarfiup inuiaqatigiit isumannaatsuuneranik nukittorsaaneranut ilapittuutitut iluaqutinngortillugit, nukittorsaataassapput.” Illersornissamut ministeri Troels Lund Poulsen oqarpoq.
Aasaanerani sulinngiffeqarnissaq sioqqullugu isumaqatigiissut isumaqatiginninniarnernik nutaanik malitseqartinneqarnissaa illuatungeriit isumaqatigiissutigaat. Isumaqatigiissutip ilaanik uannga suleqatigiinneq Kalaallit Nunaata Danmarkillu akornani annertusisamik qaninnerusumillu oqaloqatigiinnermik ilisimasanillu avitseqatigiinnermik toqqammaveqartoq, Naalakkersuisut danskillu naalakkersuisuisa erseqqissaatigaat.

Isumaqatigiissut qanimut oqaloqatigiinnerit kinguneraat, tamannalu isumaqatigiissutip imaanut iluaqutsiillunilu nukittunerulersitsivoq.

Immikkoortumi suleqatigiinnerup annertunerulernera ilutigalugu, Kalaallit Nunaata Danmarkillu illersornissamut isumannaallisaanermullu politiki pillugu Issittummi NATO-milu iligisat akornanni oqaloqatigiinneq aamma nukittorsarneqarpoq.

”Aatsaat siullermeertumik danskit naalakkersuisuisa Naalakkersuisut taama qaffasissusilimmi illersornissamik isumaqatiginninniarnernut akutippaat. Isumaqatigiissutip ilaanik suleqatigiinneq sillimaniarnikkut politikikkut atugassarititanik ornitatsinnik paasinninnermut ilapittuivoq. Danmarkimik Issittumilu isumannaallisaanermi ilitsinnik oqaloqatigiinnerit nanginnissaat qilanaaraara”, Vivian Motzfeldt, Naalagaaffinngornissamut Nunanullu allanut Naalakkersuisoq oqarpoq.

“Isumaqatigiissutip ilaanik suliaqarnermi Naalakkersuisunik qanimut suleqatigiinneq annertumik iluarisimaarpara. Illersornissaqarfiup Issittumi Atlantikullu Avannaani suliniarnerata suli nukittunerulersinnissaa pillugu qanimut oqaloqatigiinnerit nanginneqarnissaat pingaaruteqarluinnartuuvoq” Illersornissamut ministeri Troels Lund Poulsen oqarpoq.

Paasissutissat erseqqinnerusut pillugit attavigiuk:
Naalakkersuisup allattaa Naasunnguaq Beck Kristensen:
E-mail: nabk@nanoq.gl
Mobil: +299 533684