Greenland Anorthosite Mining-ip anorthosit-isiorfissaa pillugu tusarniaalluni ataatsimiititsinerit

Naalakkersuisunut ilaasortaq, Naaja H. Nathanielsen aamma Kalistat Lund, ulloq 20. aamma 22. januar 2025 Qeqertarsuatsiaat avannaata kangiani anorthosit-isiorfissaq pillugu tamanut ammasumik tusarniaalluni ataatsimiititsinermut peqataapput.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:

”Innuttaasut, oqartussat suliassamillu piginnittut akornanni oqaloqatigiinneq, aatsitassarsiorfimmik ingerlatsilernissap tungaanut suliap pitsaasumik ingerlanissaanut aalajangiisuulluinnarpoq. Piffissap ingerlanerani tusarniaalluni ataatsimiititsinerpassuarni peqataasimavunga, tamatigullu pitsaasunik apeqquteqarluartartorujussuuvoq aammalu qulequttat naleqquttorpassuit qaqinneqartarlutik. Naalakkersuisut innuttaasut akuulluarnerat qujaruppaat, tamannami suliassanik pitsaanerulersitsisarpoq, tamatsinnullu paasisimasaqarnerulersitsisarluni. Aatsitassarsiorfimmik ingerlatsinerup inuiaqatigiinnut iluaqutaanissaanut tamanna qulakkeereqataasarpoq. Najukkami nunamilu namminermi.”

Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, oqarpoq:

”Pingaaruteqarpoq tusarniaassutit ingerlaarneri ammasuunissaat aamma paasiuminartuunissaat qulakkiissagipput, tamatumani innuttaasut apeqquteqarnissaminnut, ernummassutiminnik aamma isiginnittariaasiminnik avitseqatigiinnissamut periarfissaqartinneqarput. Innuttaasunik ataatsimiissitsinermut pineqartumut uannut ersarippoq, innuttaasut tusarnaarneqartut misiginissaat. Taakkuami isumaat uagut ilungersornitsinnut qitiupput aningaasaqarnikkut ineriartornermut aamma avatangiisinut mianerinninnermut oqimaaqatigiinnissaat nassaarinissaanut. Uagut nunarput nallerneqarsinnaanngitsoq pinngortitap nalingi siunissami kinguaariinnut aserutsaalinissaa aamma illersornissaa anguniagarivarput.”

Tusarniaalluni ataatsimiititsinerit
Tusarniaalluni ataatsimiititsineq ingerlatseqatigiiffiup VSB-imut aamma VVM-imut nassuiaataannut missingiutinut, ulloq 19. februar 2025 tikillugu tamanut ammasumik tusarniaassutigineqartumut, tunngassuteqarpoq. Tusarniaalluni ataatsimiititsinernut siunertaavoq, Naalakkersuisut najoqqutassanut inaarutaasumik isummertussanngunnginneranni, ingerlatseqatigiiffiup najoqqutassaminik saqqummiussisinnaanissaa aammalu innuttaasut apeqquteqarsinnaanissaat oqaaseqaateqarsinnaanissaallu.

Qeqertarsuatsiaani, Paamiuni aamma Nuummi ornigullutik takkuttoqarluni tusarniaalluni ataatsimiititsinissaq pilersaarutigineqaraluarput. Ajoraluartumik tusarniaalluni ataatsimiititsinerit pilersaarutigineqartutut ingerlanneqarnissaat silap aqqutissallu ajornakusoortippaat.

Nuummi tusarniaalluni ataatsimiititsineq Katuami, ataasinngorneq ulloq 20. januar 2025 ingerlanneqarpoq. Ataatsimiinneq toqqaannartumik qarasaasiatigut malinnaavigitinneqarpoq.

Qeqertarsuatsiaani Paamiunilu tusarniaalluni ataatsimiititsineq pingasunngornermi ulloq 22. januar 2025 ataatsimoortumik qarasaasiatigut ataatsimiinnertut ingerlanneqarpoq. Nipit aamma videuliat Nuummiit Qeqertarsuatsiaani nunaqarfimmi aqutsisut ataatsimiittarfiannut aamma Paamiuni katersortarfimmut aallakaatinneqarput.

Tusarniaalluni ataatsimiititsinernit videuliat ingerlatseqatigiiffiup YouTube-kanal-iani takuneqarsinnaapput. Ataatsimiinnernit imaqarniliat Naalakkersuisut tusarniaanermut nittartagaanni tamanut saqqummiunneqassapput.

Tusarniaalluni ataatsimiititsinerit naammassereeraluartut, piffissaq tusarniaaffiusoq ingerlaannarpoq. Tusarniaanermut akissuteqaammik nassiussinissamut killigitinneqarpoq ulloq 19. februar 2025. Tusarniaanermut akissuteqaatit tiguneqartut ingerlaavartumik tamanut saqqummersinneqartassapput, taamatullu tusarniaanermut akissuteqaatit nutserneqarneri aamma nutserinerit piareertarneri ilutigalugit tamanut saqqummiunneqartassapput.

Tusarniaanermut nittartagaq
Suliassaq, tusarniaanermut najoqqutassat il.il. Naalakkersuisut tusarniaanermut nittartagaanni annertunerusumik atuarsinnaavatit.

Qulequtaq taanna pillugu siusinnerusukkut nutaarsiassanut linkit

• 21.01.2025: Greenland Anorthosite Mining-ip anorthosit-isiorfissaa pillugu tusarniaalluni ataatsimiititsinissat allanngorteqqinneqarnerat
• 20.01.2025: Greenland Anorthosite Mining-ip anorthosit-isiorfissaa pillugu tusarniaalluni ataatsimiititsinerni allannguutit
• 20.12.2024: Greenland Anorthosite Mining-ip anorthosit-inut suliassaanut VSB-imut aamma VVM-imut nassuiaatinut missingiutit tamanut ammasumik tusarniaassutigineqarnerat
• 21.07.2022: Qeqertarsuatsiaat eqqaanni anorthosit-inut suliassamut VSB-imut aamma VVM-imut suliakkiissutinut najoqqutassat Naalakkersuisut akueraat

Attaveqarfissat

Tusagassiortunit saaffiginninnerit:
Naalakkersuisoqarfimmi pisortaaneq, Jørgen T. Hammeken-Holm, 346800
Naalakkersuisup allattaa, Manasse Berthelsen, 345603

Saaffiginnissutit allat:
Aatsitassanut Ikummatissanullu Aqutsisoqarfik, mlsa@nanoq.gl