Imaani angallannermi isumannaallisaaneruneq: Immap assingi pillugit Kalaallit Nunaat, Danmarkilu nutaamik isumaqatigiissusiorput

Kalaallit Nunaanni inuiaqatigiit ataqatigiissinniarneqarnissaanni immap assingi sakkussaapput pingaaruteqartut. 2041 tikillugu immap assingaliortarnissaq, immallu assinginik nutarterisarnissaq Kalaallit Nunaata, Danmarkillu akornanni isumaqatigiissutip nutaap qulakkeerpaa.

Nuuk, Kalaallit Nunaat: Sumukarniaraanni imaatigut aqqut aqqutissaakkajuttartillugu, imaatigut aqqutip assingaliorfigineqarsimanissaa aalajangiisuuvoq. Immallu assingi pissutsinut naapertuullutillu nutartersimasariaqartarlutik.

Kalaallit Nunaanni immap assingi pissutsinut naapertuuttut, ilaatigut imaani angallannermi isumannaallisaanermut, attaveqaasersuutit aamma inuussutissarsiutit ineriartortinneqarnerinut tunngaviupput. Isumaqatigiissutip Kalaallit Nunaanni Ineqarnermut Attaveqaasersuutinullu Naalakkersuisup Hans Peter Poulsen-ip aamma Danmarkimi klima-, energi- og forsyningsministerip Lars Aagaard-ip ullumi Nuummi atsiugaasa, 2041-p tungaanut Kalaallit Nunaanni immap assingaliortarnissaq, immallu assinginik nutarterisarnissaq pillugu suli, kinguneqartussamillu suleqatigiinnissaq qulakkeerpaa.

”Immap assingaliortarnermi naligiimmik atugassaqartitsinissaq anguniarlugu, ilutigisaanillu Kalaallit Nunaata ineriartornerani pisariaqartumik eqaassuseqarnissaq inissaqartillugu pitsaasumik isumaqatigiissuteqaratta nuannaarutigaara. Suliassaqarfimmi matumani Naalakkersuisut, Danmarkimilu naalakkersuisut akornanni nukittunerusumik suleqatigiinnissaq qilanaaraara,” oqarpoq Hans Peter Poulsen, Kalaallit Nunaanni Ineqarnermut Attaveqaasersuutinullu Naalakkersuisoq.

”Imaani angallannermi isumannaallisaaneq pineqartillugu immap assingi pingaaruteqarluinnarput, kisianni aamma Kalaallit Nunaanni attaveqaasersuutit allilissatillugit, inuussutissarsiutinulluunniit nutaanut aningaasaliisoqassatillugu pisariaqarluinnarlutik. Tamanna pillugu Naalakkersuisunik suleqateqarnerput ullumikkut nukittorsarsinnaagatsigu, nutaanillu immap assingaliortarneq ingerlatiinnarsinnaagatsigu nuannaarutigaara,” oqarpoq Danmarkimi klima-, energi- og forsyningsministeri Lars Aagaard.

Massakkut isumaqatigiissutip atorunnaarneranit 2027-mit, 2041 tikillugu immap assingaliortarnissaq pillugu Kalaallit Nunaata Danmarkillu suleqatigiinnissaat isumaqatigiissummi allaatigineqarpoq. Immap assingaliortarnissaq pillugu isumaqatigiissut ilaatigut umiartortunut, sunngiffimminilu angalaartartunut tunngassuteqarpoq.

Isumaqatigiissut uani atuaruk.

Immap assingaliortarneq pillugu paasissutissat

• Kalaallit Nunaata imartaanut immap assingaliortarnissaq danskit oqartussatut suliassaraat. Suliassaq tamanna, Danmarkip aamma Kalaallit Nunaata imartaasa immap assingaliorfigineqarnissaannik akisussaasumut Geodatastyrelsimut Klima-, Energi- og Forsyningsministeriap suliassanngortippaa.
• Kalaallit Nunaanni immap assinginik ineriartortitsinerup siuarsarneqarnissaa, immallu assinginik digitaliserinngorsaanissaq Danmarkip, Kalaallit Nunaatalu 2009-miilli suleqatigiissutigaat, taassumallu ilaatigut kingunerisaanik Kalaallit Nunaata kujammut-kippasissortaanut immap assingarpaaluit Geodatastyrelsip pilersippai, digitaliserinngortippai, nutaanillu saqqummiussilluni. Isumaqatigiissut atuuttoq 2026-mi atorunnaassaaq.
• Geodatastyrelsen aamma Kalaallit Nunaanni Ineqarnermut Attaveqaasersuutinullu Naalakkersuisoqarfik 2024-mi isumaqatigiipput, 2025-mit immap assingaliortarnissami taamaallaat immap assinginik elektroniskiusunik (ENC-t) pilersitsinissaq ukkatarineqassasoq.

Paasissutissanik annertunerusunik piniaruit attavigiuk:

Ineqarnermut Attaveqaasersuutinullu Naalakkersuisoqarfimmi
Immikkoortortaqarfimmi pisortaq Kenneth Lund Bøjler
Mail: kebo@nanoq.gl

Imaluunniit

Klima-, Energi- og Forsyningsministeriaqarfimmi
Tusagassiortunut attaveqarfissaq +45 41 72 38 05