KNR-ip kollegianik sanaartornerit pillugit allaaserisaanik naqqiut

KNR-i allaaserisani arlalinni Nuummi kollegianik nutaanik sanaartornerit ingerlasut pillugit allataqarpoq. Allaaserisat taakku, sanaartornernik taamaatitsinertut ajoraluartumik innuttaasunit paasineqarsinnaapput, tamannali eqqunngilaq.

Aningaasaqarnermut Akileraartarnermullu Naalakkersuisoq tamatumunnga tunngatillugu ima oqaaseqarpoq:
”Tusagassiorfitsinni suliat pillugit atuartoqarnerani, innuttaasut paasissutissanik eqqortunik pissarsinissaat pingaartippara. Taamaammat aamma uggorivara, KNR-i Naalakkersuisunngooq kollegianik sanaartornernik taamaatitsinerarlugit allammata. Tamanna eqqunngilaq. Kollegianilli sanaartornernut aningaasartuutit aningaasaqarnermut inatsit missingersuutaanni (tassa pisortat aningaasartuutaasa annertusinnginnissaannik killissaq) ilaannginneri eqqorpoq, tamanna Aningaasaqarnermut Akileraartarnermullu Ataatsimiititaliap akuersinera tunngavigalugu pivoq , sanaartornerilli suli ingerlapput, Naalakkersuisoq Erik Jensen oqarpoq”.

Naalakkersuisoq ima nangippoq:
“Nunani arlalinni kukkunersiuisartup aamma siunnersuinermut suliffeqarfiup KPMG-p innuttaasut aningaasaqarnerannik misissueqqissaarnerani, imminut akilersinnaasutut nalilermagu, kollegianik sanaartornermut aningaasartuutit missingersuutinit ilaatinneqannginnissaat pisinnaasimavoq. Imminut akilersinnaaneq taanna, innuttaasut aningaasaqarnerannut aningaasaliinerni, suliap piffissami ingerlaarnera apeqqutaatinnagu, imminut akilertunut aamma qanorluunniit iluanaaruteqartigineri apeqqutaatinnagit atuuppoq. Periutsit taakku nunani allani innuttaasut aningaasaqarnerannut kingunerisassanik misissuinernut aamma assingupput. Taamaasilluta nunatsinni tamarmi suliniutinik pisariaqartunik aallartitsinissamut aningaasaliinissamullu, kiisalu kommuninut aningaasaliinerput qaffannissaanut periarfissippugut Naalakkersuisoq Erik Jensen oqarpoq.”

KPMG-p misissueqqissaarnera Inatsisartut nittartagaanni takuneqarsinnaavoq, tamannalu Aningaasaqarnermut Akileraartarnermullu Ataatsimiititaliap atortussiat ilanngussannut ilassutitut isumaliutissiissutaannut ilaalluni.

Paasissutissat:
Ilinniartunut inissiat suliassamut ‘Ilinniartunut inissiat nalinginnaasut’ imm. 2-mut, illoqarfinni ilinniartoqarfiusuni pingaarnerni tallimani: Ilulissat, Aasiaat, Sisimiut, Qaqortoq aamma Nuuk, ilinniartunut inissiat naammannissaannik qulakkeerinissamut siunertaqarfiusumut ilagitillugu sanaartorneqassapput. Ilulissani, Aasianni, Sisimiuni aamma Qaqortumi imm. 2-mi sanaartugassat sanaartorneqarput, taakkulu 2025 tikillugu ingerlaavartumik atulersinneqartarnissaat naatsorsuutigineqarpoq. Ilinniartunut inissiat 2027 tikillugu ingerlaavartumik tunniunneqartarnissaat atulertarnissaallu naatsorsuutigineqarpoq.

Inussiarnersumik Inuulluaqqusillunga

Erik Jensen

_____________________________________________

Ataatsimiititaliap suliami aalajangiinera uani takuuk 01.31.06/24-1107 www.Inatsisartut.gl