Atuartiguk”Kalaallit Nunaanni Imminut Pilersornermut Periusissiaq 2025-2030”-p tamanut ammasumik saqqummiunneqarnera Katuami malunnartinneqarpoq
Nassiussisuuvoq:
2024-p naalernerani “Kalaallit Nunaanni Imminut Pilersornermut Periusissiaq 2025-2030”, nunatta oqaluttuarisaanerani imminut pilersornermut periusissiani siullersaasoq Naalakkersuisunit tamanut ammasumik saqqummiunneqarpoq. Tamatumunnga atatillugu Nunalerinermut, Imminut Pilersornermut, Nukissiutinut Avatangiisinullu Naalakkersuisoq 15. januaari 2025-mi sammisaqartitsivoq, tassanilu imminut pilersornermut periusissiap pilersinneqarnera aammalu tamanut ammasumik saqqummiunneqarnera malunnartinneqarpoq.
15. januaari 2025-mi nal. 15:00 aamma 17:00 akornanni “Kalaallit Nunaanni Imminut Pilersornermut periusissiaq 2025-2030”-p tamanut ammasumik saqqummernera nalliussineqarmat, Katuami Inersuaaraq innuttaasunik, soqutiginnittunik inuussutissarsiutinillu ingerlataqartut aallartitaannik najuuttoqarluarpoq. Ualip ingerlanerani pilersaarut malillugu Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund, Naalakkersuisoqarfimmi pisortaaneq Natuk Lund Meire, Ilisimatusarfimmi ilisimatusartoq aamma immikkoortortami pisortaq Avijaja Hauptmann Lyberth, aalisartoq piniartorlu Anthon Egede aamma Nalik Ventures-imi pisortaaneq Thomas ’Tyt’ Mogensen oqalugiarput saqqummiussillutillu.
”Inuppassuit nunatsinni imminut pilersornermut periusissiap siulliup tamanut ammasumik saqqummiunneqarneranik nalliuttorsiornitsinnut atatillugu Katuamut aqqusaarniarlutik – aammalu Facebook-ikkut toqqaannartumik malinnaaniarlutik – aalajangersimammata ataqqinaataalluartutut tiguara qujamasuutigalugulu. Imminut pilersornermut periusissiaq pissutsinik atukkatsinnik piviusunik aallaaveqarnissaa, aammalu pisariaqartitanik periarfissanillu inuiaqatigiinni najukkatsinni takusinnaasatsinnut naleqqunnissaa uannut pingaaruteqarsimavoq. Periusissiaq, angisuunik pilersitsisinnaanitsinnik aallussiffiusoq saqqummiussinnaagakku tulluusimaarpunga. Isumassarsiani periarfissarititaasut malersussavagut, taamaalillutalu innuttaasut najukkani inuussutissiarineqarlutik naatsinneqartunik, piiarneqartunillu aammalu maani tunisassiarineqartunik pissarsisinnaanerisa pitsaanerulernissaa qulakkeersinnaalissavarput. Nioqqutissanik tikisitanik pinngitsuuisinnaannginnitta annikinnerulernissaa, aammalu suliffissanik nutaanik pilersitsinissaq sulissutigissavarput. Inuussutissarsiortut imminut pilersornermi atugarisaminnik ineriartortitsinissaannut, taamaalillunilu tamatumunnga aningaasaliinissap pilerinarnerulernissaanut sinaakkusiussassanik pilersitsissaagut. Nerisaqarnitsinni kulturerput, aamma imminut pilersornermi ileqqut, ukiut untritillit ingerlanerini atuussimasut tulluusimaarutigissavagut illersussallugillu. Maanna imminut pilersornermut periusissiami takorluukkat, anguniakkat isumassarsiarpassuillu piviusunngortinniarneqalissapput. Taamaattumik sinerissamut angalaarlunga oqartussaasut inuillu attuumassutillit assigiinngitsut sammisaqartissavakka. Sammisaqartitsineq siulleq Neqi A/S-ip tunisassiaanut tunngassaaq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund sammisaqartitsinerup kingorna oqarpoq.
Kalaallit Nunaanni Imminut Pilersornermut periusissiaq uani atuarneqarsinnaavoq.
Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqarsinnaavoq.
Sammisaqartitsinermit assit uani takuneqarsinnaapput.
