AtuartigukPuukunik utertitsisarnermi nunaqarfiit ilanngunneqassapput
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
ESANI A/S-ip puukunik utertitsisarfiit 17-inik ilallugit puukunik utertitsisarneq annertusiniarpaa. Puukunik utertitsisarfiit nunaqarfinnut, pingaartumik Kalaallit Nunaata Avannaaniittunut Tunumilu, maannamut assaannaat atorlugit puukunik puusianut immikkoortiterillutik isumaginnissimasunut ikkussuunneqassapput. Puukunik utertitsisarfik siulleq Saattuni atulereerpoq, sinnerilu piffissami qaninnermi malinnaassapput, amerlanerit januaarip naannginnerani atulissallutik.
Puukunik utertitsisarfiit innuttaasut puukuutiminnik utertitsisarnerannik ajornannginnerulersitsissapput. Tamanna aamma puukunik utertitsisarnerup nutaap aallarnisarnerani pisiniarfiit suliassatigut ajornartorsiutigisaasa ilaannut iluaqutaassaaq. Tamatuma saniatigut puukunik utertitsisarfiit nutaat aamma puukut minnerit pinngortitamut pinnginnissaannut, taamaalillutillu avatangiisinut uumasunullu ajoqutaasinnaajunnaarnissaannut qulakkeerissutaassapput.
”Puukunut utertitsisarfinnut utertitat aallaqqaammulli procentinngorlutik ingerlalluartorujussuupput. Taamaattumik innuttaasut suli amerlanerusut poortuutinik imaqanngitsunik ajornanngitsumik piiaanissamut, tamatumalu peqatigisaanik pinngortitamik avatangiisinillu najukkatsinnik paarsisinnaalernissamut periarfissinneqarneri nuannaarutigaara”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Pisiniarfinnut pitsaassutsimik qaffatsitsissapput
Puukunik utertitsisarfiit peqqutigalugit unammilligassat iluarsiiffigineqartussat ilaat sumiiffinni sikusartuni puukut katersuutiinnartarnerannut tunngasuuvoq. Pisiniarfiit puukunik utertitsisarfeqanngitsut inissaaleqititsisarput, aammalu piffissani ESANI-p umiarsuaasa taliffigisinnaanngisaanni puussiat puukunut utertitanut poortuutigineqartartut tipiliortarput. Puukunik utertitsisarfiit nutaat poortuutinik aserorterisarput naqitsisarlutillu. Taamaalilluni pisiniarfiit toqqorsivimminni inissamik sipaagaqartarput, aammalu poortuutit aserortikkat uterteqqinneqarnissamut ulorianartorsiorfiunatik silami uninngatinneqarsinnaapput.
Pisiniarfiit puukunik utertitsisarfeqanngitsut ikilisarnerisigut aamma puiaasanik utertitsisarfiit nutaat pisiniarfinni sulisunit tiguneqarnerminni qanoq innissaannik nalornissuteqarnerit annikillisinneqartussaapput. Puukut stregkodii atuarneqarsinnaatillugit, aammalu puukut ilusii oqimaassusii takuneqarsinnaatillugit maskiinat puukkunik tigusisarput.
”Puukunik utertitsisarfiit nutaat nittartakkakkut attaveqalerpata, tamanna pinngitsuunngilluinnarluni pisiniarfinni, taamatullu aamma innuttaasuni pitsaassutsimik qaffatsitsissaaq. Maskiinat nutaat pisiniarfiit utertitsisarnerullu akornanni aningaasat sukkanerusumik ingerlaarnissaannik qulakkeerissaaq, tamatumalu peqatigisaanik puukunik utertitsisarfiit puukut eqaannerusumik suliarineqartarnissaannik kinguneqassaaq”, ESANI A/S-imi pisortaq Frank Rasmussen oqarpoq.
Ilaatigut puukunik utertitsisarfinnik, Pilersuisup pisiniarfiinut mikisunut naleqquttunik nassaarniarneq ESANI-mut unammillernarsimavoq. Tamanna maanna Norgemiit Tomra mikisoq, qillertuusanik puiaasanillu tigusisinnaasoq atorlugu iluatsinneqarpoq.
”Puukunik utertitsisarfiit nutaat ingerlanerini misilittakkat naliliiffigineqariarpata, utertitsisarfiit taamaattut aamma nunaqarfinnut, suli puukunik utertitsisarfilersorneqarsimanngitsunut ikkussuunneqassanersut aalajangiiffigineqassaaq. Aallaqqaammulli utertitsisarnerup ineriartortinneqarnissaa, aammalu ajornartorsiutit naammattoorneqartartussat iluarsiiffigineqarnissaat pisariaqartinneqartoq eqqumaffigineqarpoq. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup, ESANI-p niuertarfiillu suleqatigiilluarnerisigut utertitseriaaseq, innuttaasunut pinngortitamillu illersuinermik oqinnerulersitsisussaq angujumaarparput”, Naalakkersuisoq Kalistat Lund naggasiivoq.
Puiaasanik utertitsisarfiit nutaat sumiiffinni ukunani ikkussuunneqassapput:
Avannaata Kommunia – Aappilattoq, Ikerasak, Innaarsuit, Kangersuatsiaq, Nuussuaq, Qaarsut, Qeqertaq, Saattut, Saqqaq, Tasiusaq, Ukkusissat, Upernavik Kujalleq.
Qeqqata Kommunia – Kangerlussuaq.
Kommuneqarfik Sermersooq – Kulusuk, Kuummiut, Sermiligaaq, Tiilerilaaq.
Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.