AtuartigukAvannaata Kommuniata illoqarfinni nunaqarfinnilu 25-ni immikkut ittumik ammaannartumi ikuallaanissamut akuersissuteqarallarneq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Naalakkersuisut Avannaata Kommuniata illoqarfinni nunaqarfiinilu 25-ni eqqakkanik immikkut ittumik ammaannartumi ikuallaasoqarnissaa aalajangiuppaat.
Eqqakkanik ikuallaasinnaasunut ikuallaavinni avatangiisinut akuerisanut ikuallaasoqassaaq.Taamaakkaluartoq Naalakkersuisut kommunimi siulersuisut ikuallaavinni eqqakkanik immikkut ittumik ammaannartumi ikuallaasoqarallarnissaanik qinnuteqarneratigut immikkut ittumik 31. juuli 2025 tikillugu akuersissuteqarpoq.
Immikkut ittumik akuersissuteqarnerup pissutigaa, Avannaata Kommuniata eqqagassalerinermut pilersaarusiaat siunissaq ungasinnerusoq eqqarsaatigalugu aallartimmassuk. Eqqakkanik immikkut ittumik ammaannartumi ikuallaasoqarallarnissaanik, aamma nunami namminermi ikuallaavinnut nutaaliaasuni Sisimiuni Nuummilu atorsinnaalerneranut, kommunini ammaannartumik ikuallaasinnaanissaq 1. august 2025-p kingorna atuunnissaa naatsorsuutigineqanngilaq.
”Eqqagassalerineq kommunip suliassaqarfigivaat. Naalakkersuisut suliassaqarfik salliutippaat aamma kommunit tamaasa 2024-2025-mi 3 mio. koruunit tikillugit taperserpaat, eqqagassalerisinnaanissaanut pitsanngorsaaniassammata.” - Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
”Nuummi ikuallaavik nutaaq atuutilereerpoq, Sisimiuniittorlu ikuallaavik aasamut atuutilernissaa naatsorsuutigineqarpoq. Ikuallaavik eqqagassalerinermut siunissamut pitsaanerulertussaanerat qularnaassavaat, ammaannartumi ikuallaasarneq pisariaqarunnaarsillugu.Tamanna ammaannartumi ikuallaasarneq peqqissutsimut avatangiisinullu isumakuluutinut ilaalluinnarmat”, Kalistat Lund ilassuteqarpoq.
Sumiiffinni immikkut ittumik ammaannartumi ikuallaasarallarnissamut nalunaarutigineqarpoq:
- Qaanaaq aamma nunaqarfiit Qeqertat, Savissivik aamma Siorapaluk.
- Upernavik aamma nunaqarfiit Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.
- Uummannaq aamma nunaqarfiit Ikerasak, Niaqornat, Qaarsut, Ukkusissat aamma Saattut.
- Ilulissat aamma nunaqarfiit Oqaatsut, Qeqertaq, Saqqaq aamma Ilimanaq.
2020-2031-mut Eqqagassalerinermut pilersaarut
Nuna tamakkerlugu ikuallaaviit nutaaliaasut qanoq iliorlutik nuna tamakkerlugu eqqagassanik suliaqartassanersoq 2020-2031-mut eqqagassalerinermut pilersaarummi allassimavoq.
2020-2031-mut eqqagassalerinermut pilersaarut uani atuaruk.
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisup allattaa Manasse Berthelsen oqa.: 345603-mut imaluunniit e-mail mabr@nanoq.gl imaluunniit pan@nanoq.gl aqqutigalugit attaveqarfigineqassapput.