Imigassaq aalakoornartortalik pillugu siunissami politikkissaq – Isummersorfigiuk

Imigassaq aalakoornartortalik pillugu ukiunut arlalinnut politikkissaq, ilisimatusarnermit tunngavilik, tamanut tusarniutigineqarpoq. Tusarniaanerup ingerlanneqarnerata nalaani apeqqutit akisassat atorlugit misissuinerit marluk, meeqqanut inuusuttunullu, aamma inersimasunut sammitinneqartut ingerlanneqassapput. Misissuinermit inerniliussat inaarutaasumik inassuteqaatigineqartussanut ilanngunneqassapput.

- Imigassaq aalakoornartortalik pillugu siunissami politikkissamut inassuteqaatigineqartussat ineriartortinneqarneranni siammasissumik peqataatitsinissaq pingaaruteqartorujussuuvoq. Imigassaq aalakoornartortalik inuiaqatigiinni innuttaasunut tamanut sunniuteqartarpoq, taamaattumik imigassap aalakoornartortallip inuiaqatigiinni atorneqarnera siunissami qanoq initutigissanersoq tamatta isummersorfigisariaqarparput. Imigassaq aalakoornartortalik pillugu ukiunut arlalinnut politikkissaq maanna tamanut tusarniutigineqarpoq, kikkullu tamarmik tusarniaanermut akissuteqarnissaminnik periarfissaqarput, Peqqissutsimut Naalakkersuisoq, Agathe Fontain, oqarpoq nangillunilu:

- Imigassap aalakoornartortallip inuiaqatigiinni atorneqarnerata qanoq initutiginera pillugu innuttaasut misigisaat, aamma suliat ilisimatusarnermit tunngavillit, imigassamit aalakoornartortalimmit ajoqusiisarnernik annikillisitsisinnaasut, eqqunneqarnissaat inuiaqatigiinnit qanoq isumaqarfigineqarnersut tusarniaanerup nalaani misissorusuppavut. Neriuppunga isummersornissamut periarfissaq tamanna amerlasuunit atorneqarumaartoq.

Imigassamik aalakoornartortalimmik imernerup aarlerinaatigisinnaasai pillugit peqataasut ilisimasaat misissuinermi apersuutigineqassapput. Tassunga ilanngullugu nakuusernerit, kinguaassiuutitigut innarliinerit, ajoqusernerit aamma imminut toqunnerit peratarsinnaanerinut imigassap aalakoornartortallip annertunerulersitsisarnera, kiisalu eqqarsartaatsikkut aamma timikkut peqqissutsimik arlalitsigut ajoqusiisarnera pillugu ilisimasat.

Misissuinermut peqataasut imigassamut aalakoornartortalimmut tunngatillugu siunissami qanoq pisoqartariaqarnera pillugu isumaqarnerlutik akissuteqarnissaminnik periarfissinneqassapput.

Misissuinermut peqataanissamut killiliussaq tassaavoq 26. januaari 2025.

Una toorlugu isummersorit:

Misissuineq inersimasunut tunngasoq: https://sammivik.typeform.com/alkoholpolitik

Misissuineq meeqqanut inuusuttunullu tunngasoq: https://sammivik.typeform.com/barnogunge

Apeqqutit qarasaasiakkut akissuteqarfigisinnaanngikkukkit, mobilikkut akissuteqarsinnaavutit. Atuisoq ataaseq ataasiinnarmik akissuteqarsinnaavoq.

Imigassaq aalakoornartortalik pillugu ukiunut arlalinnut politikkissamut, ilisimatusarmit tunngavilimmut, inassuteqaatinnik suliaqarneq pillugu annertunerusumik paasisaqarit, uani: www.paarisa.gl

Paasissutissanik arlaqarnerusunik pissarsiniarlutit naalakkersuisumut allatsi Nivé Lynge Biilmann e-mailimut: nilb@nanoq.gl imaluunniit oqarasuaammut: +299 34 52 84 attaveqarfigiuk.