AtuartigukTakornariartitsinermik ingerlataqarnissamut akuersissummik qinnuteqarsinnaanngorputit
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Nunatsinni takornariartitsineq pillugu inatsit siulleq Inatsisartuni 2024-mi akuerineqarpoq, 1. januaari 2025-milu atuuttuulersinneqarluni.
Inatsimmi allassimasut aallaavigalugit takornariartitsinermut ingerlataqarsinnaasut tassaalerput inuit suliffeqarfiilluunniit akuersissummik pissarsisimasut.
Takornariartitsinermut ingerlatsisinnaanermut akuersissummik pissarsiniaruit isumannaallisaanermut pilersaarummik suliaqarsimassaatit, tassanilu navianaataasinnaasut pinartuusinnaasullu pillugit suliffeqarfik qanoq iliorniarnersoq nassuiarneqassaaq. Taamaaliornikkut takornarissat toqqissisimassapput aammalu ingerlatsilluartunit sullinneqartutut misigissapput kiisalu inuiaqatigiit illersorneqassallutik. Taamatuttaaq Naalakkersuisut inatsisinik malinnittoqarnersoq nakkutilliisinnaalissapput, aammalu suliffeqarfinnut piumasaqaatinut naammassinninngitsunut akiligassiillutillu akuersissutinik utertitsisinnaalissapput. Iliuuserineqartut aallaavigalugit Kalaallit Nunaat takornarissanut isumannaannerulissaaq tikikkusunnarnerulissaaq kiisalu takornarissanut sullissisut pitsaanerusumik inissisimalissapput akisussaassuseqarnerulissallutillu.
Inatsisip atuuttuuilersinneqarnera 1. januaari 2025 sioqqullugu takornariaqarnermik sullissisoq ingerlatsereersimaguni, akuersissuteqarnissamut piumasaqaat aatsaat 1. januaari 2027 atuutilissaaq.
Suliffeqarfiit nutaat 1. januaari 2025 kingorna pilersinneqartut ingerlatsilersinnaanngillat akuersissummik peqqaartigatik. Taamaattumik takornarissanut sullissiniat aallartinnginnerminni akuersissummik qinnuteqaqqaassapput.
“Takornariaqarnermik inerisaanissamut sumiiffinnut tapersersuineq sumiiffinnullu naleqqussarneq pingaaruteqarluinnarpoq. Takornariaqarneq nunamut tamarmut iluaqutaassaaq, soorlu aamma takornarissat toqqissisimanartumik misigisassarsiorsinnaanissaannut akisussaaffeqartugut. Takornarialerisut takornariartitsinermut akuersissummik pigisallit sillimaniarneq akisussaassuseqarnerlu eqqarsaatigalugu uppernarsaasinnaasariaqarput.
Akuersissummik pigisaqarnermi qulakkeerneqarsinnaavoq takornarissat avatangiisillu ataqqinnittumik pilersinneqarsinnaasut. Naalakkersuisunit anguniarsaraarput qinnuteqarneq ingerlatsisunut pisariitsuunissaa allaffissornikkullu pisariunnginnissaa,” taama oqarpoq Naalakkersuisoq, Naaja H. Nathanielsen.
Akuersissummik qinnuteqarneq akeqanngilaq.
Takornarissanut qinnuteqarneq www.sullissivik.gl aqqutigalugu pissaaq.
Paasissutissat:
Takornariartitsinermik ingerlataqarneq tassaasinnaapput inuit imaluunniit suliffeqarfiit Kalaallit Nunaanni takornarissanut kiffartuussinissamik neqerooruteqartartut, aammalu ulluinnarlugu unnuinertaqanngitsumik imaluunniit ulluni arlalinni angallassinerit.
Takornarialerisoq akuersissummik pigisaqartuuvoq.
Akuersissut takornarissanik ingerlatsinissamut akuersissutaavoq. Taannalu Naalakkersuisunit tunniunneqartarpoq.
Sillimaniarnermut pilersaarut qinnuteqarnissamut piumasaqaataavoq, tassanilu navianaataasinnaasut nalilersorneqassapput upalungaarsimanissamullu pilersaarusiaqassalluni. Sillimaniarnermut pilersaaruteqarnissamut siunertaq tassaavoq takornarissat navianaataasinnaasunik eqqumaffeqarnissaat, sulisullu ajutoortoqartillugu allatigulluunniit assingusunik pisoqartillugu iliuusissaminnik ilisimaarinninnissaat.
Sukumiinerusumik paasissutissat pillugit saaffissaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut, Naligiissitaanermullu Naalakkersuisoqarfik, Mail: isiin@nanoq.gl Oqarasuaat: +299 34 50 00