AtuartigukQallunaat naalakkersuisui Naalakkersuisullu Kalaallit Nunaanni Utoqqarmiut Kangerluarsunnguanni erngup nukinganik innaallagissiorfimmik suliniummut qallunaat naalagaaffiata aningaasaleeqataanera pillugu tunngaviusumik isumaqatigiissut atsiorpaat
Nassiussisuuvoq: Aningaasaqarnermut Akileraartarnermullu Naalakkersuisoqarfik
Finansministeri Nicolai Wammen nunatsinnilu Aningaasaqarnermut Akileraartarnermullu Naalakkersuisoq Erik Jensen, ullumikkut Kalaallit Nunaanni Utoqqarmiut Kangerluarsunnguanni erngup nukinganik innaallagissiorfimmik suliniummut qallunaat naalagaaffiata aningaasaleeqataanera pillugu tunngaviusumik isumaqatigiissut atsiorpaat.
Utoqqarmiut Kangerluarsunnguanni erngup nukinganik innaallagissiorfimmik suliniutip piviusunngortinnera Nuup mingutsitsiviunngitsumik innaallagissamik pilersorneqarneranut qulakkeerinneqataallunilu, Kalaallit Nunaanni mingutsitsinngitsumik nukissiamik tunisassiornermik annertusaanissamik Naalakkersuisut anguniagaannut ilaavoq.
Taamattaaq erngup nukinganik innaallagissiorfimmik suliniutip piviusunngortinneratigut Kalaallit Nunaata CO2-mik aniatitaata annikillisinnera anguneqarlunilu, ilaatigut Parisimi isumaqatigiissut naapertorlugu inuiaqatigiinnik piujuartitsinerusunik anguniagaqarnermi pingaarutilimmik alloriarnerussaaq.
Finansministeri Nicolai Wammen ima oqarpoq:
”Qallunaat kalaallillu naalakkersuisui immikkoortuni arlalinni qanimut, pitsaasumik siunnerfeqarluartumillu suleqatigiipput, silap pissusia kiisalu mingutsitsinngitsunut ikaarsaarneq pillugu suliniarnermi suleqatigiinnerup nukittorsarnissaa kissaatigalugu.
Oktobarimi 2024-mi tunngaviusumik isumaqatigiissutigisatta maanna atsiorsinnaanera qujanarpoq, tamannalu Kalaallit Nunaanni mingutsitsinngitsunut ikaarsaarnermi suleqatigiissuteqarlutalu ataatsimut tunuliaqutsiinitsinnik takutitsisuuvoq.
Aningaasaqarnermut Akileraartarnermullu Naalakkersuisoq Erik Jensen ima oqarpoq:
” Isumaqatigiissut una Utoqqarmiut Kangerluarsunnguanni erngup nukinganik suliniutip piviusunngortinneqarnissaanut annertuumik uatsinnut alloriartitsisoq piviusunngortikkatsigu nuannaarutigeqaara. Suliniut piujuartumik nukissiuutinik siuarsaanermi suliniarnermi orsussanillu imerpalasunik pinngitsuuisinnaannginnitsinnik annikillisaanitsinni pingaaruteqarpoq. Peqatigisaanik taanna kinguaariinni aggersuni aningaasaqarnikkut periarfissanik pilersitsillunilu patajaatsumik nukissiamik pilersitsivoq. “
Erngup nukinganik innaallagissiorfimmik suliniutip piviusunngortinnissaa ikorfartorniarlugu, atsioqatigiittut tunngaviusumik isumaqatigiissutikkut qallunaat naalagaaffiata – tunngavissarititat arlallit sillimmartaarutigalugit – erngup nukinganik innaallagissiorfimmut suliniummut taarsigassarsianut aningaasalersuinermilu aningaasartuutinut attuumassuteqartunut 95 procentinik qularnaveeqqusiinissaq neqeroorutigaa.
Tunngaviusumik isumaqatigiissut oktobarimi 2024-mi isumaqatigiissutigineqarpoq, maannali isumaqatigiissuteqartunit pisortatigoortumik atsiorneqarluni.