Titartaanermik unammisitsineq: Siunissaq, arlaannaalluunniit imigassamit aalakoornartortalimmit ajoquserneqarsimanngitsoq

Imigassap aalakoornartortallip tamatta sunnertarpaatigut – imigassamik aalakoornartortalimmik imertartut kisiisa pinnagit, aammali meeqqat, ilaqutariit aamma inuiaqatigiit. Nuna tamakkerlugu meeqqat atuarfiini tamani klassit tamarmik maanna titartaanermik unammisitsinermut peqatiserineqarput, qulequtaralugu: Siunissaq, arlaannaalluuniit imigassamit aalakoornartortalimmit ajoquserneqanngitsoq.

Unammisitsineq Peqqissutsimut Naalakkersuisoqarfimmit, Innuttaasut Peqqissusiannik Ilisimatusarfimmit, Paarisamit, WHO Europamit aamma UNICEF Kalaallit Nunaannit aaqqissuunneqarpoq. Titartakkanik nassitsinissamut killiliussaq tassaavoq ulloq 24. januaari 2025.

Titartaanermik unammisitsinermut siunertarineqartoq tassaavoq, meeqqat aamma inuusuttuaqqat siunissamik, arlaannaannulluunniit imigassamit aalakoornartortalimmit ajoquserfiunngitsumik eqqarsaatersorlutillu takorluuisinnissaat. Imigassap aalakoornartortallip kingunerisartagai, aamma siunissamik toqqissisimanartumik pilersitsinissamut periarfissat pillugit meeqqat titartagaat aqqutigalugit oqaloqatigiittarnerit siuarsarneqarnissaat unammisitsinermut suleqatigiinnit kissaatigineqarpoq.

Unammisitsineq atorlugu ilinniartitsisut atuartuutitik peqatigalugit imigassaq aalakoornartortalik oqaluuseralugu aallartitsinissaannik atuarfiit aamma atuartut peqatiserineqarput.

Titartakkanik nassiunneqartunik nalilersuinermi isumassarsiaq aamma pinngorartitsisinnaanikkut suliarineqarnerat naliliisunit isiginiarneqassapput. Immikkoortuni tamani ajugaasunik toqqaasoqassaaq: Nukarlerni-, akullerni- aamma angajullerni. Ajugaasut klasseqatigiinni atugassanik 3.000 kr.-nik akissarsisinneqassapput.

Imigassaq aalakoornartortalik pillugu ilisimatusarnermik tunngavilimmit ukiunut arlalinnut politikkimut innersuussutinut atatillugu titartakkat saqqummersinneqassapput.

Unammisitsineq pillugu annertunerusumik uani paasisaqarit.


Paasissutissanik arlaqarnerusunik pissarsiniarlutit naalakkersuisup allattaa Nivé Lynge Biilmann e-mailimut: nilb@nanoq.gl imaluunniit oqarasuaammut: +299 34 52 84-imut attaveqarfigiuk.