AtuartigukKujataanut ikiorsiissuteqartoqalerpoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Aasaanerani sikorsuaqarnera patsisaalluni Naalakkersuisut ikiorsiissutitigut Kujataanut maanna ikiorsiissuteqarsinnaalernerat, Inatsisartut Aningaasaqarnermut Akileraartarnermullu Ataatsimiititaliaata decembarip 30-ani akuersissutigaat.
Sikorsuaqarneratigut Kujataani ingerlatsisut 2024-mi isertitassatigut annertuumik annaasaqarsimasut ikiorserlugit, suliaq maanna naammassineqarsinnaalerpoq.
Ikiorsiissuteqarnissap akuersissutigineqarnera Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisup Naaja H. Nathanielsenip nuannaarutigaa, imalu oqarluni:
”Naggataatigut suliaq kissaatigisamik inerneqarmat tuallappunga. Naalakkersuisut isumaqartuarsimapput Kujataani ingerlatsisut eqqugaasut ikiorneqarnissaminnik pisariaqartitsisut, taakkuinnaat pinnagit aammali inuussutissarsiutit, neqeroorutigineqartartullu allanngorarnissaannut qulakkeerinnissutitut. Inuussutissarsiummik naqqanit ineriartortitsinissaq imaannaanngissinnaammat, siuariartornerup uninnginnissaa Naalakkersuisut pingaartippaat.”
Naalakkersuisut Nalik Ventures A/S qinnuigaat, Innovation South Greenland suleqatigalugu ikiorsiissutinik aqutsitsissasut.
Ikiorsiissutinit ikiorserneqassagaanni, 2024-mi januaarimit septembarip tungaanut kaaviiaartitat 2023-mi januaarimit septembarip tungaanut kaaviiaartissimasanut sanilliullugit minnerpaamik 20%-inik ikileriarsimasut ingerlatsisut uppernarsarsinnaassavaat. Ingerlatsisut nutaat tamarmik immikkut naliliiffigineqassapput.
Kujataanut ikiorsiissutissat pillugit suliami suleqataasimasut tamaasa Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup qutsavigai.
30.12.2024-mit ikiorsiissutinik qinnuteqarit uunga:
Nalik Ventures, mailimut nalik@nalik.gl imaluunniit oqarasuaammut 701020