Nuummi sarfaaruttoornerup aammaarluta takutippaatigut sarfamik pilersuinerup isumannaallisarnissaa qanoq pingaartittariaqartigigipput

Akunnerup naanerani Nuummi sivisuumik sarfaaruttooqqanerup nalaani innuttaasut paasinnilluarnerat naammagittarnerallu pillugu Naalakkersuisunit qutsavigerusuppavut. Kiisalu sarfaaruttoornerup kinguneri annikillisarniarlugit suliffeqarfiit, pisortat ingerlatsivii oqartussaqarfiillu annertuumik pilertortumillu iliuuseqarnerat pillugu Naalakkersuisunit nersunngitsoorsinnaanngilavut. Assingusumik pisoqarnissaa pinngitsoorniarlugu, taamalu sarfamik pilersuinerput suli annerusumik isumannaallisarumallugu politikkikkut suliniutissat suliniutillu ingerlareersut Naalakkersuisunit suliassatsinni salliutinniarpavut.

Utoqqarmiut Kangerluarsunguanni erngup nukinganik innaallagissiorfimmiit sarfap aqqutaata kittorarnera Nuummi 28. december aallartilluni akunnerup naaneranut atasumik sivisuumik sarfaaruttooqqanermut pissutaavoq. Sarfaaruttoornerup aammaarluni takutippaatigut nunatsinni sarfamik pilersuineq suli annerusumik isumannaallisarneqarsinnaasoq, taamaammallu pilersuinitta suli annerusumik isumannaallisarnissaa pillugu ilungersornerusariaqartugut.

”Sivisuumik sarfaaruttooqqanerput soorunami ajuusaarnanngitsuunngilaq. Nunatsinni sarfamik pilersuinerup isumannaassusia ingerlatsitsinitsinnut isumannaallisaanitsinnnullu pingaaruteqarluinnaqqissaarami sumilluunniit imaaliinnarluni ajutoortussaatinneqassanngilaq. Pisoq ilungersunarluinnartutut Naalakkersuisunit isigineqarmat qularutigineqassanngilaq. Tamatumalu peqatigisaanik pisuni taama ittuni inuiaqatigiittut ataatsimoorsinnaassuserput assorsuaq ajuusoorutigaara. Timersortarfiit kialaarfinngortinneqarput, suliffeqarfiit namminersortut ammarput pisortanillu suleqateqarlutik inuussutissat allallu pisariaqartut pisariaqartitsinerpaanit pissarsiarineqarsinnaaqqullugit, innuttaasullu inuiaqatigiinnut ikiuukkumallutik sarfamik atuivallaarnaveesaarput. Politiit oqartussanik allanik peqateqarlutik sarfaaruttooqqanerup nalaani piareersimapput pisut sillimaffiginiarlugit. Misigivungalu Politiit, aamma Nunatsinni Upalungaarsimasut, Kommuneqarfik Sermersooq kiisalu Nukissiorfiit pitsavimmik paasissutissiisartut taavalu inuiaqatigiit innuttaasullu paasissutissanik pingaarutilinnik ingerlaavartumik tuniorartuarlugit. Innuttaasut, suliffeqarfiit, pisortallu oqartussaqarfii sulilluarnerannut, paasinninnerannut, inoroorsarnerannut, minnerunngitsumillu iliuuseqarumassusiannut minitaqarnanga qutsavigerusuppakka”,

Pilersuineq nalorninartorsiorfiussanngippat nutartigassatigut kinguaattooqqaneq annikillisarneqassaaq
Nukissiorfiit ’imminut nammattussanngorlugit’ aningaasatigut ingerlanneqarput. Ingerlaaseq taanna naapertorlugu Nukissiorfiit piginnittuminnut iluanaarutinik tunioraasussaanngillat, aammali innuttaasunik pilersuinerminni annaasaqartussaanatik. Tamatuma paarlattuanik nunatsinni tamarmi pilersuinermi ingerlatsinermut attassinermullu aningaasartuutit Nukissiorfiit imermut innaallagissamullu akiliisitsisarnermikkut nammassavaat. Kisiannili Nukissiorfiit ukiuni kingullerni tallimani kaaviiaartitsinerat pillugu paasissutissatigut takuneqarsinnaavoq imermut innaallagissamullu akiliisitsisarnermi aningaasartuutit isertitallu oqimaaqatigiinngitsut. Aningaasartuutit isertitallu oqimaaqatigiinnginnerisa kingunerisaanik Nukissiorfiit maskiinanik, atortorissaarutinik pilersuinermilu aaqqissuussinernik naammattumik aserfallatsaaliisinnaasimanngillat. Taamaammat Naalakkersuisut qinigaaffimmi matumani politikkikkut pingaarnersiuisarsimapput aalajangiisarsimallutillu Nukissiorfiit nutartigassatigut kinguaattoorutaannik annikillisaaniutaasunik kiisalu sarfamik pilersuinerup patajaannerulernissaannik qularnaarisussanik.

”Sarfaaruttoornerup erseqqilluinnartumik takutippaa ukiuni aggersuni qassiini akinik ingerlaavartumik qaffaasarnissamik aalajangerneq eqqortuusimasoq – aammalu suli eqqortuusoq. Nukissiorfiit aningaasatigut oqimaaqatigiissumik ingerlanissaa kiisalu nutartigassanik pisariaqarnerpaanik suliaqartarnissarput aalajangiisuulluinnarpoq. 2023-imiit akinik ingerlaavartumik qaffaasoqartarsimavoq. Akinik qaffaasoqartanngippat Nukissiorfiit nuna tamakkerlugu aningaasaliisarnissaminnik aammaarlutik kinguartitsisariaqassapput. Taamaattoqassappat qamittoornissaq ilimanarnerulissaaq nunalu tamakkerlugu pilersuisinnaassuseq nalorninartorsiorfiulissalluni. Tamanna ilumuuissumik soorunami pinngitsoortinniartariaqarparput akunnerup naanerani misigisatsitut misigisaqaqqeqqunata”,

”Sarfaaruttoornerup takutippaanga 2021-mi sarfaaruttoorneq tamatta ilinniarfigisimagipput. Maluginiakkakka naapertorlugit kikkut tamarmik taamanernit sillimanerupput. Piareersaatit eqqarsaatigalugit oqaatigerusuppara innaallagissiutinik sillimmataasunik qaammatit tamaasa aallartitsisarneq Nukissiorfiit suleriaasiannut nalinginnaasumut ilaammat. Nukissiorfiit taamaaliortarput innaallagissiutit atortariaqalissagaluarunik piareersimanersut paasiniarlugit. Taamaammat oqaatigissavara innaallagissiutip kingulliup aallartikkuminaannera sumiginnaanermik patsiseqanngimmat, teknikkikkullu ajornartorsiutinik aaqqinneqartunilli pissuteqarmat.”,

Pilersuineq patajaatsuutikkumallugu politikkikkut iliuuserisassat aallarnerneqarput
Nuup eqqaani Utoqqarmiut Kangerluarsunnguanni kiisalu Tasiilami erngup nukinganik nukissiorfinnik alliliinikkut kiisalu Qasigiannguit Aasiaallu pilersorneqarnissaannut nutaanik angisuunik innaallagissiorfiliornikkut, Tasiilami Qorlortorsuarmilu erngup nukinganik nukissiorfiit allilernerisigut kiisalu Narsami Tasermi innaallagissiorfiliornikkut nunatsinni pilersuinermik isumannaallisaanertik ukiuni aggersuni Naalakkersuisut nangissavaat.

”Erngup nukinganik nukissiorfinnik alliliisoqarnera nutaanilluunniit sanasoqarnera apeqqutaatinnagu innaallagissiutinik sillimmateqarnerup qanoq pisariaqarluinnartiginera 2024-mi decembarip ulluisa 28-ianni Nuummi pisup takutippaa. Ukiup qanoq ilinera apeqqutaatinnagu innaallagiassaqarlutalu, imissaqarluta kiassarsinnaanissarput allaqqunneqarsinnaanngilluinnarpoq”, Naalakkersuisoq Kalistat Lund naggasiivoq.

Attavissaq
Paasissutissat sukumiinerusut pissarsiariniarlugit attaviguuk naalakkersuisup allattaa Manasse Berthelsen oqarasuaatikkut.: 34 56 03/54 88 68 imaluunniit e-mailikkut: pan@nanoq.gl.