Tuttunniarnissamut umimmanniarnissamullu pisassiissutit piffissaliussallu – Ukiuunera 2025

Ukiuunerani 2025-mi tuttunniarnissamut umimmanniarnissamullu piffissaliussat, tuttutassiissutit kiisalu umimmattassiissutit aalajangerneqartut matumuuna nalunaarutigineqarput.

Tuttut

1. Aqutsiveqarfik Qaanaaq: Piniarfinni Inglefield Land-imi, Prudhoe Land-imi aamma Kangerluarsorujummi piffissami 1. januaarimiit 30. apriili ilanngullugu aasaanerani ukiaaneranilu 2024-mi pisarinngitsuukkanik nuussinikkut ukiuunerani tuttunniartoqassaaq.
2. Piniarfik Nuussuaq: Piniarfimmi Nuussuaq-mi piffissami 8. februaarimiit 28. februaari ilanngullugu qimussimik tuttunniarneq ingerlanneqassaaq pisassat 100-iullutik.
3. Kangaatsiap aqutsiveqarfiani Atarnup Nunaa: Piffissami 10. februaarimiit 2. martsi ilanngullugu qimussimik tuttunniarneq ingerlanneqassaaq pisassat 100-iullutik.
4. Piniarfiit sinneri: Piniarfinni sinnerini ukiuunerani tuttunniartoqassanngilaq.
   
   Ilanngussami tunngavilersuutit takukkit.

Umimmaat

5. Aqutsiveqarfik Maniitsoq: Piniarfik 1-imi qimussertartunut allatigullu assartuutinik motoorilinnik atuiffiunngitsumik ukiuunerani 2025-mi killilimmik inuussutissarsiutigalugu sunngiffimmilu umimmanniarneq 15. februaarimiit 28. februaari ilanngullugu sapaatip akunnerini marlunni ingerlassaaq. Piniarfik 1-mi 50-nik umimmattassiisoqarpoq.
6. Aqutsiveqarfik Maniitsoq: Piniarfik 3-mi assartuutinik motoorilinnik piniarfimmut piniarfimmiillu assartuutitut atuiffigeqqusaasumik ukiuunerani 2025-mi killilimmik inuussutissarsiutigalugu umimmanniarneq 1. februaarimiit 14. februaari ilanngullugu sapaatip akunnerini marlunni ingerlassaaq. Piniarfik 3-mi 200-nik umimmattassiisoqarpoq. Piniarfik 2-mi aamma Piniarfik 4-mi ukiuunerani umimmanniartoqassanngilaq.
7. Aqutsiveqarfik Sisimiut: Ukiuunerani 2025-mi 1. februaarimiit 14. februaari ilanngullugu killilimmik umimmanniartoqassaaq. Aqutsiveqarfik Sisimiunut pisassat 100-iupput aqutsiveqarfimmullu Kangaatsiamut pisassat 50-iullutik.
8. Umimmaqarfik Naternaq: Aasaanerani aamma ukiaanerani 2024-mi aqutsiveqarfinnut umimmattassanit pisarinngitsuukkat kommunikkaartumik ukiuuneranut 2025-mi piniarnissamut nuunneqarput piffissami 10. februaarimiit 9. martsi ilanngullugu ingerlanneqartussamut. Kommune Qeqertalimmut umimmattassat 36-iupput Avannaata Kommunullu umimmattassat marluupput.
9. Umimmaqarfik Ivittuut: Ukiuunerani umimmanniartoqassanngilaq.
10. Umimmaqarfik Sigguk: Ukiuunerani umimmanniartoqassanngilaq.
11. Umimmaqarfik Nanortalik: Ukiuunerani umimmanniartoqassanngilaq.
12. Aqutsiveqarfik Ittoqqortoormiit: Ukiuunerani umimmanniarneq 1. martsimiit 31. martsi ilanngullugu ingerlassaaq umimmattassiissutillu 60-iupput.
13. Umimmaat Paamiut eqqaanut nuunneqarsimasut aamma umimmaat Nuup Kangerluanut ingerlaarnikut eqqissisimatitaapput.
    
    
Ilanngussami tunngavilersuutit takukkit.

Ulloq naallugu inunnik paaqqinnittarfiit - Sociale institutioner
Ukiuni kingullerni ingammik Qeqqata Kommuneaniit ulloq naallugu inunnik paaqqinnittarfiit piniakkanik killilersukkanik nunameersunik qinnuteqartarnerat (aasakkut/ukiakkut ukiukkullu) annertusiartuinnarsimavoq kommuneni annertuumik suliakkiisoqartarluni. APN aamma Qeqqata Kommunea ukioq 2022-mi isumaqatigiissuteqarput inatsimmi periarfissaasoq najoqqutanik aalajangersimasunik aallaaveqartumik kommunemiit aqunneqassasoq pisassiissutaareersut iluanni. Taamaattumik qinnuteqaatit kommunemut ingerlanneqartassapput.

APN-imiit erseqqissaatigineqarpoq qamuteralannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, umimmannillu malersuinermi piniarnermilu atornissaat inerteqqutaammat. Assartuutit motoorillit umimmannut uumasunut minnerpaamik 500 meterinik ungasissuseqassapput.


Ilanngussaq I: Pisassiissutinut il.il. tunngavilersuutit

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani tuttunut Piniarfik 1-11.

Ilanngussaq 3: Kalaallit Nunaanni umimmaqatigiit.

Ilanngussaq 4: Maniitsup Aqutsiveqarfiani umimmannut Piniarfik 1, 2, 3 aamma 4.

Ilanngussaq 5: Umimmaqarfik Sisimiut kommunip aalajangersagai ilanngullugit.

Ilanngussaq 6: Umimmaqarfik Naternaq.

Ilanngussaq 7: Tuttoqarfik Nuussuaq.



Sukumiinerusumik paasisaqarusuttoqassappat immikkoortortaqarfimmi pisortamut Amalie Jessen-imut saaffiginnittoqarsinnaavoq, e-mail: amalie@nanoq.gl