Naalakkersuisut 2025-mi Nuummi Frelsens Hærip ammasarfii annertusisat akileraat

2024-p ilaani H.J. Rinkip Aqqutaani Williams Cafemi Frelsens Hærip atugarliortunut aamma angerlarsimaffeqanngitsunut neqeroorutaa Naalakkersuisut tapersersorpaat, taamaalillunilu ukiumi qaammatini issinnerpaani cafe ulluni amerlanerni ammatinneqassaaq. Tapersersuineq 2025-mi nangissaaq.

Angerlarsimaffeqanngitsut qaammatini issinnerpaani taakkunani atugarliornerat annertunerusarpoq. Taamaattumik 2025-mi Williams Cafemi Frelsens Hærip neqeroorutaanik Naalakkersuisut tapersersuipput, taamaalillutik ammasarfiit annertusisinneqassallutik, taamaalillunilu ataasinngornerit aamma tallimanngornerit tamaasa immikkut ittumik nal. 11-15-imi ammatitsisoqartassalluni. Tamatuma saniatigut ileqqorisatut ammasarfik nal. akunneranik ataatsimik sivitsorneqassaaq, taamaalilluni Williams Cafe nal. 9-15-imi ammasalissalluni.

”Williams Cafemi suliaqarnermik tapersersugaqarsinnaanertik Naalakkersuisut assorsuaq nuannaarutigaat. 2024-mi tapersersuinerup ajoraluartumik takutippaa neqeroorutaasumik annertuumik pisariaqartitsisoqartoq. Taamaattumik 2025-mi Frelsens Hærimut tapersersuineq ingerlateqqipparput. Atugarliortutsinnut aamma angerlarsimaffeqanngitsunut Frelsens Hæri suliamik angisuumik ingerlataqarpoq. Tapersersuineq atugarliortunut ullup ingerlanerani sumiiffissarsisitsivoq. Inuit kissassariartorsinnaapput, aammalu nerisassaqartarpoq, minnerunngitsumillu pisariaqartinneqassagaangat uffarsinnaasarput,” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq Jess Svane oqarpoq, nangillunilu:
”Taamaattorli Frelsens Hærimi suliaqarnerup kisimiitissinnaannginnerata erseqqissaaviginissaa pingaartuuvoq. Angerlarsimaffeqanngitsunut ataatsimut isiginnittumik suliaqartoqassaaaq. Sooruna angerlarsimaffeqarunnaarnerannik aperisariaqarpagut, aammalu sapinngisamik pitsaanerpaamik qanoq uagut inuiaqatigiittut ikiuiniarluta iliuuseqarsinnaanerput apeqqutigisariaqarparput. Inuup tamarmiusup suliaqarfiunissaa Naalakkersuisutut upperaara, pineqartup inissiamik amigaateqarnera, suliffeqannginnera, imaluunniit atornerluinera isiginiaannarnagit. Suut tamarmik imminnut atasuupput, aammalu inuup inuuneranik suussusersisitsipput.”

Ammasarfiup nalaani tamarmi nerisassat, kiisalu kaffip tiillu saniatigut internetsimut akeqanngitsumik attaveqarpoq, uffarnissamut periarfissaqarpoq, atisanik errorsisoqarsinnaallunilu panersiisoqarsinnaavoq, Inuttut imminnut sammisinnaapput (akuttunngitsukkut nallukattanik inukkannertalimmik). Tamakku saniatigut aamma inuit pisariaqartitarisinnaasaannik qulaajaaniarnermut, taakkununngalu ikiuinissamut tunngatillugit oqaloqatiginninnernik neqerooruteqartoqarpoq.

Frelsens Hærimi korpslederi, Nathanael Munch oqarpoq: ”Naalakkersuisut tapersersuinerat nuannaarutigaarput. Kikkut tamarmik Frelsens Hærimut tikilluaqqusaapput, tapersersuinerullu ulluni amerlanerni inunnik suli amerlanerusunik ikiuinissamut periarfissippaatigut. Tungitsinnit neqeroorutigisatsinnik piumasaqartoqarnera 2024-mi tapersersuinerup qularutissaanngitsumik takutippaa.”

Naalakkersuisut tapersersuinerat piffissami 1. januar 2025-mit 31. marts tikillugu ilanngullugulu ammasarfinnik allisaavoq (sap. akunneri 13-it), kiisalu 2025-mi piffissamit 1. oktoberimit 31. decemberi tikillugu aamma ilanngullugu (sap. akunneri 13-it).



Attavik
Erseqqinnerusunik paasissutissarsiornermi attavigisassaq tassaavoq naalakkersuisup allattaa Helene S. Pedersen, e-mailikkut: hspd@nanoq.gl imaluunniit oq. + 299 34 56 11.