Kommune Kujalliup 100 mio. kr-t tikillugit taarsigassarsisinnaanermut qinnuteqaataa Aningaasaqarnermut akileraartarnermullu Naalakkersuisup akueraa

Kommune Kujallermit sukumiisumik qinnuteqartoqarnera tunuliaqutaralugu, kommunip 100 mio. kr-t angullugit taarsigassarsisinnaanermut qinnuteqarsinnaanera Aningaasaqarnermut Akileraartarnermullu Naalakkersuisup Erik Jensenip akueraa. Aalajangerneq kommunip nukinginnartumik aningaasanik tigoriaannaatiminik nukittorsaanissamik pisariaqartitsineranik tunuliaqutaqartumik pivoq, immikkullu ittumik aningaasaqarnikkut ilungersunartorsiutit passunneqarnerannut ikorfartuutit eqqarsaatigineqarluni.

Kommune Kujalliup qinnuteqaataa annertuutigut atugassarititaasutut aalajangersakkanut naapertuuttumillu ilimagineqarsinnaasunut naammassinnittoq, Aningaasaqarnermut Akileraartarnermullu Naalakkersuisoqarfik naliliivoq. Akuersissutip ilaatigut annertusisamik nakkutilliineq taarsigassarsianullu piffissami aalajangersimasumi taarsersuinissaq malitsigai. Kommunip aningaasaqarnikkut inissisimaneranik ingerlaavartumik nalunaaruteqartarnissaq piumasaqaatigineqarpoq, tassani aningaasat tigoriaannaat, tassani aningaasat tigoriaannaat aallunneqarnerat, taarsigassarsianik akilersuutit kiisalu missingersuutinik nalimmassaanerit ilanngullugit.

Aningaasaqarnermut Akileraartarnermullu Naalakkersuisoq Erik Jensen ima oqaaseqarpoq:
"Kommune Kujalliup piffissami sivisuumi aningaasaqarnikkut ilungersunartorsiornera akueraarput. Kommunip siunissami piujuartitsisumik aningaasaqarnikkut ineriartorsinnaanerata qularnaarnissaanut siunnerfeqartumik sulisinnaanngornera maannakkut pingaarnerpaavoq.”

Kommune Kujalliup taarsigassarsiniarsinnaanermut akuersissummik iluaquteqarluni ukiuni aggersuni aaqqissuussaanikkut nalimmassaanernik pisariaqartunik aallartitsillunilu, aningaasaqarnikkut aqutsinermik piginnaasanik nukittorsaanernik atuutsitsilersinnaanermik qularnaarinissaa, Naalakkersuisut naatsorsuutigaat.

Paasissutissat erseqqinnerusut pillugit, attavigiuk:

Aningaasaqarnermut Akileraartarnermullu Naalakkersuisoqarfik, Niels Kristian Skou (Aningaasaqarnermut Naalakkersuisoqarfik) Toqq/direkte 345177 nisk@nanoq.gl