Kalaallit Nunaanni puigortunngornermut nittartagaq siulleq www.usi.gl maanna ammarpoq

Naalakkersuisut ullumikkut Kalaallit Nunaanni puigortunngornermut nittartagaq siulleq www.usi.gl ammarpaat, puigortunngortunut, qanigisaannut aamma paaqqutarinnittunut qarasaasiakkut puigortunngorneq pillugu ilisimasanik pingaarutilinnik katersuiffik. Nittartagaq Naalakkersuisut Utoqqaat pillugit Periusissiaannut ilaatillugu ineriartortinneqarpoq.

Puigortunngornerup Kalaallit Nunaanni ilaqutariit amerliartuinnartut kalluarpai, aamma ilisimasanik sakkussanillu pisariaqartitsineq annertoqaaq. Maannakkut kikkulluunniit www.usi.gl atorlugu puigortunngorneq pillugu isumalluutinik assigiinngitsorpassuarnik akeqanngitsumik pissarsisinnaalerput. Nittartakkami puigortunngorneq pillugu ulluinnarni iliuuseqarfiginissaanut ilaatigut ersiutit pillugit ilitsersuutit ilisimasallu, paaqqutarinninneq aamma iliuusissanik toqqaanissamut alakkaasoqarsinnaavoq.

”Ilaqutariit tamarmik puigortunngornermik eqqugaasinnaapput. Taamaattumik puigortunngorneq pillugu pitsaanerusumik iliuuseqarfiginissaanut paasinissaanullu inuit tamarmik periarfissaqalernissaat pingaaruteqarpoq. Puigortunngorneq nappaataavoq, pingaartumik qanigisanut sakkortusinnaasoq, aamma Naalakkersuisut neriuutigaat, qanigisanut asasaminnik ikiuinissamut ilisimasat tapersersuinerlu pillugit atorfissaqartitaannik usi.gl oqilisaassisinnaassasoq. Puigortunngornermut nittartagaq utoqqaat pillugit paaqqutarinninnermik isumassuinermillu sulinitsinni angusaavoq pingaaruteqartoq. Taamaattumik nittartakkap aamma kommunini ulluinnarni puigortunngorneq pillugu iliuuseqarnissamut suliamut ilisimasallit ilisimasanik sakkussanillu tunniussissaaq,” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, oqaaseqarpoq.

Nittartakkami pingaarnerpaat tassaapput filmimik takusassiat naatsut tallimat, Kalaallit Nunaanni puigortunngornermik ilisimasalik misilittagartoorlu, Rosamarie Elsner, peqatigalugu suliarineqartut, taanna ukiuni qulikkuutaani arlalinni utoqqarnik puigortunngornermillu suliaqarpoq. Ilaatigut puigortunngorneq sunaanersoq, qanoq ililluni siusissukkut ersiutit paasineqarsinnaanersut, aamma puigortunngornermik eqqugaasoq qanoq tapersersorneqassanersoq nassuiarpai. Rosamarie paaqqutarinnittunik puigortunngornermillu ataqatigiissaarisunik ilinniartitsiniarluni Kalaallit Nunaat tamakkerlugu angalasarpoq, maannakkullu nittartakkami takusassiatigut ilisimasani nalilerneqarsinnaanngitsut pillugit avitseqatigaluta.

Nittartagaq atortussanik nutaanik annertusarneqartuassaaq, taamaalilluni qanigisanut paaqqutarinnittunullu pingaarutilimmik sakkussatut atorneqarsinnaalluni. Ullumikkut nittartagaq www.usi.gl alakkaruk puigortunngornerlu pillugu ilisimasanik pingaarutilinnik pissarsillutit.

Attaveqarfissaq
Annertunerusumik paasisaqarniaruit attaveqarfigiuk naalakkersuisup allattaa Helene S. Pedersen e-mailikkut: hspd@nanoq.gl imaluunniit oqarasuaatikkut + 299 34 56 11