Nunatsinni imminut pilersornissamut periusissiat siullersaat siunissami imminut pilersornerulernissamut toqqammaviussaaq

Assit: Sarah Woodall, Aningaaq R. Carlsen, Visit Greenland, Lisa Germany, Visit Greenland, Maja Trolle, Visit Greenland, Sergei Gapon, Visit Greenland

Innuttaasut amerlanerusut inuussutissanik najukkaneersunik pitsaasunik, peqqinnartunik najukkameersunillu pissarsisinnaassapput. Tassungalu ilanngullugu innuttaasut amerlanerusut inuussutissanik pilersuinerup isumannaassusia pitsaanerusoq atugarilissavaat nunatsinni tunisassiat aqqutigalugit. Tamannaavorlu ”Kalaallit Nunaanni Imminut pilersornissamut periusissiaq 2025-2030”-mi Naalakkersuisut ullumikkut saqqummersitaanni anguniagaasoq. ”Kalaallit Nunaanni Imminut pilersornissamut periusissiaq 2025-2030” nunatta oqaluttuarisaanerani imminut pilersornissamut periusissiat siullersaraat.

Imminut pilersornerulernissamut periusissiaq ”Kalaallit Nunaanni Imminut pilersornissamut periusissiaq 2025-2030” Naalakkersuisut tamanut saqqummiuteqqammerpaat. Naalakkersuisut imminut pilersornissamut periusissiaq atorlugu inuussutissalerinermut suliassaqarfiup iluani imminut pilersorsinnaanerup annertusarnissaanut nunatut unammilligassarisavut oqaluuserisassanngortillugillu aaqqiissuteqarfiginiarpaat. Inuussutissalerinermut suliassaqarfiup iluani imminut pilersorsinnaanerup pitsanngorsarneqarneratigut annertusarneqarneratigullu Naalakkersuisut inuussutissanik tunisassiornermut sunniuteqarnerusussamut najukkanilu tunngaveqarnerusumut sinaakkutissanik pitsaanerusunik pilersitsiniarput. Sinaakkusiussallu taakku inuussutissanik najukkaneersunik pissarsisinnaanermik pitsaanerulersitsissapput, suliffissanik amerlanerusunik pilersitsissallutik nunatsinnilu piujuartitsinissaq tunngavigalugu ineriartortitsinissamut tapersersuissallutik.

”Kalaallit Nunaata imminut pilersorsinnaanerusup ineriartortinneqarnissaa Naalakkersuisunit qinigaaffimmi matumani politikkikkut annertuumik pingaartinneqarpoq. Imminullu pilersornissamut suliassaqarfik aamma siunissami salliutinneqartariaqarpoq. Taamaattumik tulluusimaarpunga imminut pilersornissamut periusissiamik saqqummiussisinnaagama, innuttaasut amerlanerusut inuussutissanik maani nunatsinni naatitanik, katersukkanik tunisassiarineqartunillu pissarsisinnaanerisa pitsaanerulersinnissaanut toqqammaviusussamik. Imminut pilersornissamut periusissiaq nioqqutissanik avataanit eqqussukkanik pisariaqartitsinitta annikillisinnissaanut, suliffissanik nutaanik pilersitsinissamut aammalu piujuartitsinissamik siuarsaanissamut tunngavoq. Kulturikkulli kingornussatsinnik ileqqutoqqatsinnillu pisuussutitta pinngortitamut nerisarisartakkatsinnullu attuumassuteqarluinnartut isumannaarneqarnissaat Naalakkersuisut aamma pingaartippaat”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq oqarpoq nangillunilu:

”Naalakkersuisut imminut pilersornissamut periusissiaq atorlugu nammineq pisuussutitta atorluarneqarnerunissaat qulakkeerumavaat, taamaaliornikkut inuussutissat najukkaneersut pisiniarfinni amerlaneruleqqullugit, taamatullu angerlarsimaffimmi nerisassiarineqartussanngorlugit. Imminut pilersornissamut periusissiaq anguniagaqarfiulluarpoq, aatsaallu piviusumik atorneqarsinnaassalluni inuiaqatigiinnit tamanit pimoorussinermik aammalu piumassusermik takutitsisoqarpat. Inuiaqatigiinnik imminut pilersornerusunik pilersitsinissaq ataatsimoorluni suliassaavoq, aamma oqartussat, tunisassiortut atuisartullu qaninnerusumik suleqatigiinnissaat pisariaqarpoq. Ataatsimooqatigiillutami nukittuffigisagullu aallaavigalugit inuiaqatigiit piujuartitsinissamik tunngaveqartut imminnullu pilersornerusut pilersissinnaavagut”, Naalakkersuisoq Kalistat Lund naggasiivoq.

Periusissiaq Kalaallit Nunaanni imminut pilersornerulernissamut suliniutaasut arlallit ilagaat
Naalakkersuisut suliniutit inuussutissanik imminut pilersorsinnaanitsinnik annertusaasussat imminut pilersornissamut periusissiami ukkatariniarlugit toqqarpaat. Tamannalu pilersaarusiornikkut immikkut ukkatarineqarpoq nunatut avataaneersunik eqqussuinissamik sivisuumik pisariaqartitsisimanerput nassuerutigalugu. Taamatullu aalajangertoqarneranut aamma pissutaasoq tassaavoq nalitsinni nunarsuaq nalorninartorsiorfiummat, silap pissusia allanngoriartormat pilersuinerillu akornuserneqapallassinnaasarmata. Taamaattumik inuiaqatigiittut inuussutissanik pisuussutinik pissarsiarisinnaasatsinnik pitsaanerusumik atuilernissarput pingaaruteqarluinnarpoq.

Inuussutissanik pisuussutit silarsuarmi pitsaanerpaat ilaat pigivagut, taakkuli pisiniarfinni takussaavallaanngillat. Naalakkersuisut imminut pilersornissamut periusissiaq atorlugu innuttaasut nuna tamakkerlugu inuussutissanik nammineq pigisatsinnik amerlanerusunik neqeroorfigineqarnissaannut sinaakkutissanik pitsaanerusunik pilersitsiniarput.

”Kalaallit Nunaanni Imminut pilersornissamut periusissiaq 2025-2030” Naalakkersuisut imminut pilersornermut suliassaqarfimmi suliniutit ukiuni kingulliunerusuni aallartitaasa ilagiinnarpaat. Naalakkersuisut aamma anguniagaraat malitseqartitsiffiusumik imminut pilersornissamut periusissiamik suliaqartoqassasoq, inuussutissanik imminut pilersorsinnaanitta annertusarnissaanik ukkataqaannarani aamma pisariaqartitanik allanik, ajornartorsiutaasunik periarfissanillu, soorlu sanaartukkanik, atortussianik nukissamillu pilersuinermik ukkataqarfiusussamik.

”Kalaallit Nunaanni Imminut pilersornissamut periusissiaq 2025-2030” ugguuna pissarsineqarsinnaavoq.

”Kalaallit Nunaanni Imminut pilersornissamut periusissiaq 2025-2030” anguniakkat anguniakkallu immikkoortui

Aallutassaq 1: Naalakkersuisut oqartussatut

Anguniagaq 1: Inuussutissanik tunisassiornermi akimmiffissanik piiaaneq aamma Kalaallit Nunaanni inuussutissanik inuussutissarsiuteqarnermut sinaakkutissanik nukittorsaaneq
Anguniakkani immikkoortoq 1: Assartuussinermut tapiissuteqartarnermi iluaqutissanik ajoqutissanik misissuineq
Anguniakkani immikkoortoq 2: Kommunit inuussutissarsiornermut siunnersuisoqatigiivinik inuussutissarsiutinillu ineriartortitsinermut ingerlatseqatigiiffiinik nukittorsaaneq
Anguniakkani immikkoortoq 3: Inuussutissalerinermi, nunalerinermi, imminut pilersornermi niuernikkullu piginnaaneqarfiit pillugit ilinniartitaanernik pitsanngorsaaneq
Anguniakkani immikkoortoq 4: Inuussutissanik tunisassiortunut aallarnisarnermut tapiissuteqarnissamut imaluunniit inuussutissarsiutinik siuarsaanermut akikillisaanissamut periarfissanik misissuineq

Anguniagaq 2: Najukkani inuussutissanik tunisassiornerit piujuarnissaannik peqqinnartuunissaannillu siuarsaaneq
Anguniakkani immikkoortoq 5: Nerisaqariaatsinut najoqqutassanik nutaanik pilersitsineq
Anguniakkani immikkoortoq 6: Kalaallit nerisassanut nalunaaqutsiisarnissaannut periarfissanik misissuineq
Anguniakkani immikkoortoq 7: Najukkani aalisakkanik tunisassiortarnernik nukittorsaaneq

Aallutassaq 2: Naalakkersuisut atugassiisutut

Anguniagaq 3: Suleqatigiinneq saqqumilaartitsinerlu aqqutigalugit imminut pilersornermik nukittorsaaneq
Anguniakkani immikkoortoq 8: Niuertut, tunisassiortut aallarniisartullu akornanni qanittumik suleqatigiinnissamut atugassiisarnerit
Anguniakkani immikkoortoq 9: Kalaalimernit saqqumilaarnissaat periarfissinniarlugu kalaallit nerisaqarnermi kulturianni inuit sunniuteqarluarsinnaasut akornanni suleqatigiinnissamik pilersitsisarnerit atugassiisarnerillu

Anguniagaq 4: Kalaalimernit najukkaneersut pillugit ilisimasaqarnermik atuinermillu siuarsaaneq
Anguniakkani immikkoortoq 10: Kalaaliminernik najukkaneersunik atuinissamut ilisimasanik siammarterineq
Anguniakkani immikkoortoq 11: Kalaalimernit najukkaneersut tunisassiortullu pillugit allattuiffimmik annertuumik ineriartortitsineq
Anguniakkani immikkoortoq 12: Nerisassiassanik najukkaneersunik atuinermut innuttaasunik akuutitsinissaq pillugu paasititsiniaaneq

Paasissutissanik amerlanerusunik piniarnermi attaveqarfigineqassaaq naalakkersuisup allattaa Manasse Berthelsen oqar.: 34 56 03/54 88 68-imut imaluunniit e-mail: pan@nanoq.gl.