Silap pissusia pillugu Nuummi unnussiuaaqatigiinnermi innuttaasut akornanni aallussisoqarluartoq

Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, Nuummi decembarip 16-iani 17-ianilu 2024-mi silap pissusia pillugu unnussiuaaqatigiissitsivoq. Silap pissusia pillugu unnussiuaartitsinerit nuna tamakkerlugu ingerlanneqarput innuttaasut silap pissusiata allanngoriartornerinik nalaattagaat aammalu silap pissusianut naleqqussarnissamut silallu pissusianut nalimmassarnissamut suliniutissanut isumaat ukkataralugit akuutinniarlugit. Innuttaasut silap pissusianut iliuusissatut siunnersuutaat nunami namminermi silap pissusianut periusissiassamut ilanngunneqassapput.

Naalakkersuisut nunami namminermi silap pissusianut periusissiamik suliaqarneq aallartippaat. Silap pissusianut periusissiaq nunami namminermi silap pissusianut suliniuteqarnitsinni pingaarnertigut siunnerfissanik suliniutissanillu imaqassaaq aammalu nunatsinni ineriartortitsinissamut periarfissat ukkatarineqassallutik. Ilisimatusartoq Pinngortitaleriffimmeersoq Sascha Schiøtt Naalakkersuisoq Kalistat Lund peqatigalugu silap pissusia pillugu unnussiuaartitsinerni peqataavoq, silap pissusiata allannguutai aamma najukkami inuiaqatigiinnut kingunerisaat pillugit innuttaasut oqaloqatiginiarlugit.

”Aaqqiissutissani, silap pissusiata allanngornerinut pisariaqartinneqartuni, inuit silap pissusiata allannguutaasa kingunerinit toqqaannartumik sunnerneqartut aallaavigineqassapput. Taamaattumik aamma innuttaasut taama pimoorussitiginerat tunniussaqartiginerallu kingumut pissarsiaqarfigilluarpara – tamatumuuna Nuummi. Innuttaasut silap pissusianut iliuusissatut siunnersuutaat ilisimasaallu nalituut nunami namminermi silap pissusianut periusissiap suliarineqarneranut pingaaruteqarput. Silap pissusia pillugu unnussiuaartitsinerit maannamut Tasiilami, Sermiligaami, Kuummiuni, Kulusummi Nuummilu ingerlatereerpagut. Nunatsinnilu sumiiffiit allat tikeraarnissaannut qilanaarpunga. Silap pissusia pillugu unnussiuaartitsinitta erseqqilluinnartumik takutippaat silap pissusiata allannguutai – taakkununngalu aaqqiissutissat – inuppassuarnit pingaartinneqartupilussuusut”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

”Innuttaasut pimoorussilluarnerisa misilittagaasalu nunami namminermi silap pissusianut periusissiap suliarineqarneranut toqqaannartumik tunniussaqarnerat misigalugu pissarsiaqarnarpoq. Oqaluttuat aaqqiissutissallu unnussiuaartitsinerni tusakkagut najukkani unammilligassanik paasiuminarnerulersitsiinnaratik aamma najukkani inuiaqatigiit pisuussutaasa ilisimasaasalu aaqqiissutissanut ilanngullugit eqqarsaatiginissaannut periarfissanik tunniussaqarput. Oqaloqatigiinnerup pingaarutillip nunatsinni sumiiffinni allani ingerlateqqinnissaanut qilanaarpunga”, Ilisimatooq Pinngortitaleriffimmeersoq Sascha Schiøtt oqarpoq.

Nunami namminermi silap pissusianut periusissiamut alloriarnissap tullissaa tassaavoq silap pissusia pillugu nunatta sinnerani unnussiuaartitsinissat
Innuttaasut silap pissusiata allanngoriartornerini nalaattagaat aammalu silap pissusianut aaqqiissutissanut isumaat ukkataralugit akuutinneqarnissaat Naalakkersuisut qitiutippaat. Tamanna eqimattani sulinerni ineriartortuartussani pissaaq, tassani innuttaasut ataatsimoorlutik silap pissusiata allanngoriartornerini nalaattakkatik oqallisigissallugit aammalu silap pissusianut suliniutissanut siunnersuuteqassallutik. Taamaattumik Naalakkersuisup Kalistat Lundip innuttaasut, inuiaqatigiit allallu najukkani suliaqartuusut periusissiamut ilassutissaannik katersiniarluni nunatsinni illoqarfiit nunaqarfiillu tikeraassavai.

Silap pissusia pillugu unnussiuaartitsinernut tullernut sumiiffissat, ullut piffissallu www.naalakkersuisut.gl-ikkut tusagassiorfinnut nalunaarutikkoortumik allagarsiissutigineqassapput aammalu Facebookikkut allagarsiissutigineqassallutik.

Silap pissusia pillugu Nuummi unnussiuaartitsinernit naammasseqqammersunit assilisat uani takuneqarsinnaapput.

Attaveqarfissaq
Paasissutissanik amerlanerusunik piniarnermi attaveqarfigineqassaaq naalakkersuisup allattaa Manasse Berthelsen oqar.: 34 56 03/54 88 68-imut imaluunniit e-mail: pan@nanoq.gl.