AtuartigukUmiarsualiviit pillugit inatsimmut nalunaarutissaq nutaaq namminersorlutik inuussutissarsiortut umiarsualivinni atortulersuutinik pilersitsinissaannut ajornannginnerulersitsissaaq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Nuannaarutigeqaarput Ineqarnermut Attaveqaasersuutinullu Naalakkersuisup Hans Peter Poulsenip maanna Umiarsualiviit pillugit Inatsisartut inatsisaanniit umiarsualiviit atortulersuutitallit imartallillu mininneqarnissaat pillugu nalunaarut atuuttussanngormat nalunaarutigisinnaanngormagu.
Tamanna isumaqarpoq puttasuliat aallaaviatigut umiarsualiviit pillugit inatsimmi aalajangersakkaniit mininneqartussaasut. Ineqarnermut Attaveqaasersuutinullu Naalakkersuisoq Hans Peter Poulsen ima oqarpoq:
”Inuussutissarsiortunut sapinngisamik atugassarititat pitsaanerpaat pilersinnissaat uannut pingaaruteqarpoq. Suliffeqarfippassuarnut tikiffiusinnaasunut periarfissaqarnissaq pingaaruteqartorujussuuvoq. Taamaammallu assut nuannaarutigaara Naalakkersuisut ataatsimoorluta nalunaarutissaq nutaaq pillugu isumaqatigiissimagatta, taannalu umiarsualivinni atortulersuutit assigiinngitsut arlallit pilersinneranni allaffissornikkut oqimaatsorsiornermut oqinnerulersitsisinnaavoq.”
Nalunaarutissamut toqqammavissaq inuussutissarsiortut oqaloqatigineranni inissinneqarpoq. Umiarsualiviit pillugit inatsimmi aalajangersakkat ilaanneeriarlutik ingasattajaarnertut oqaatigineqarsinnaasut inuussutissarsiortut erseqqissumik oqaatigisimavaat. Naalakkersuisut inuussutissarsiortut isiginninnerannut isumaqataapput, taamaammallu umiarsualivinni atortulersuutit ilaat umiarsualiviit pillugit inatsimmi aalajangersakkaniit mininneqarput. Tamatuma assersuutigalugu kingunerisussaassavaa puttasuliat 100 meterinik naannerusut Naalakkersuisut akuersiteqqaarnagit sanaartorneqarsinnaassasut, tassalu nunaminertamik tunineqarsimagunik inatsisinillu eqqortitsigunik aamma.
Oqaloqatigiinnermi umiarsualiviit pillugit inatsimmi unamminartunik paasisaqartoqarpoq, tamakkualu inuussutissarsiortut ineriartornissamut akornutaasutut isigivaat. Nalunaarutip suliarinerata nalaani inuussutissarsiortut tusaaniarneqarsimapput, inuussutissarsiortullu kissaataat umiarsualiviit pillugit inatsimmi inatsisitigut sinaakkutaasut iluanni akueriniarneqarsimapput.
Naalakkersuisut umiarsualivinnut suliassaqarfiup aaqqissuussiffigeqqinnissaata suli pisariaqarneranut ilisimaarinnipput, periarfissarlu manna iluatsillugu tusarniaanermut peqataasimasut ilanngussisimanerannut qujaniarlutik. Inuussutissarsiortut kissaataat nalunaarummi akuerineqarsinnaanngitsut inatsisissamik piareersaataasumik sulinissami ilanngunneqarumaarput.
Paasisaqarnerorusunnermi Ineqarnermut Attaveqaasersuutinullu Naalakkersuisoqarfik box909@nanoq.gl-mut attavigiuk.