AtuartigukSinerissap qanittuani aalisakkat 2025-mut pisassiissutigineqartut aalajangerneqarput
Nassiussisuuvoq: Aalisarnermut Piniarnermullu Naalakkersuisoqarfik
Naalakkersuisut sinerissap qanittuani 2025-mi aalisagartassat decembarip 16-ianni 2024-mi aalajangerpaat.
Qalerallit
Aqutsiveqarfik 47
Qalerallit pillugit aqutsinissamut pilersaarut nutaaq naapertorlugu qaleralinniarneq allaffissornikkut 2025-mi ingerlanneqassaaq, aqutsinermut pilersaarut januaarip aallaqqaataani 2025-mi atuutilissalluni.
Aqutsiveqarfik 47-mut tamarmut pisassatut siunnersuutigineqartut 5 procentinik ilaneqarput. Aqutsiveqarfik Qeqertarsuup Tunuanut pisassatut siunnersuutigineqartut 19 procentinik ilaneqarput, taamaattorli aqutsiveqarfimmut Uummannamut pisassatut siunnersuutigineqartut 9,3 procentinik ikileriarput Upernavimmut 4,4 procentinik ikileriarlutik.
PNNP tunngavigalugu aalisarnissamut aqutsiveqarfinnut Qeqertarsuup Tunuanut, Uummannamut aamma Upernavimmut pisassiissutigineqartut umiatsiaararsortunut aalisariutinullu 6 meterinut anginernut agguaaseriaaseq tunngavigineqassaaq.
Umiatsiaararsortut paggatassanik pisassinneqassapput . PNNP tunngavigalugu pisassat aamma paggatassiissutit agguarneri Kalaallit Nunaanni Aalisarnermut Piniarnermullu Nakkutilliisoqarfiup nittartagaani gfjk.gl sapaatip akunneri tamaasa takuneqarsinnaassapput.
Nunatta sinnerani
Aqutsiveqarfinnut Sisimiut-Maniitsoq, Nuuk, Paamiut-Qaqortoq aamma Tunu pisassatut siunnersuutigineqartut allanngortinneqanngillat, aamma pisassat allanngortinneqaratik.
Saarulliit
Saarullinnut aqutsinermut pilersaarut naapertorlugu allaffissornikkut 2025-mi ingerlatsisoqassaaq. Ilisimatuussutsikkut misissuinerup takutippaa saarulleqatigiit assigiinngitsut sisamat suffisartut, taakku nunatta imartaani akuliussuuttarlutik. Tunumi saarulleqatigeeqarpoq sinerissallu qanittuani saarulleqatigiit assigiinngitsut marlulluullutik kiisalu kitaani ataatsimik saarulleqatigeeqarluni.
Saarulleqatigiit assigiinngitsut marluk Nuup avannaaniipput Nuullu kujataaniillutik. 2025-mi saarullittassatut siunnersuutigineqartut 4.455 tonsiupput, siorna 3.095 tonsiusut – amerleriaataat 44 procentiulluni.
Nunatsinnut tamarmut saarullittassiissutaapput. 2025-mut saarullittassiissutigineqartut 27.572 tonsiullutik 2024-mi saarullittassiissutinit ikileriaataat 7 procentiulluni. Taakkunanit sunngiffimmi aalisartut 2.000 tonsit tunitsivinnut tunisinnaasaattut pisassiissutigineqarput.
Saarullittassiissutinut aalajangersaarnermi periuseq atorneqartoq saarullimmut aqutsinissamik pilersaarusioqatigiit isumaqatigiipput kisitseriaaseq aalajangersimasoq atorlugu pisassiissutif aalajangerneqassasut. Kisitseriaatsimi saarullittat ilisimatuussutsikkullu siunnersuineq tunngavigineqarput tassanilu siunertaavoq pisassiissutit ikiliartortinneqassasut ilisimatuussutsikkut siunnersuinermut naapertusarneqassallutik.
Saattuat
Saattuarniarneq saattuanut aqutsinermut pilersaarutit naapertorlugu allaffissornikkut 2025-mi ingerlanneqassaaq. Aqutsiveqarfiit tallimat pisassat amerlassusissaannik siunnersuusiorfigineqassapput. Aqutsiveqarfinni amerlanerni pisassatut siunnersuutigineqartut ikileriartinneqarput. Kitaani saattuat allaffissornikkut aqunneqassapput aqutsinissamut pilersaarut naapertorlugu, aqutsinissamut pilersaarummi aalajangersarneqarluni immikkoortoq 1-imi saattuartassiissutigineqartut sumiiffinnilu marlunni pisassiissutissatut siunnersuutigineqartut naapertorneqassasut. Immikkoortoq 3-mi sumiiffinni pingasuni aqutsinissamut pilersaarummi aalajangersarneqarluni pisassiissutigineqartut naleqqussarneqassasut, 2025-mi ikiliartuaarlutik. Saattuat 2024-mut pisassiissutigineqartunut sanilliullugit 2025-mi pisassat 415 tonsinik ikinnerussapput.
Sinerissap qanittuani aalisagartassiissutigineqartut Naalakkersuisut.gl-imi atuarneqarsinnaapput.
Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl