Canadap Kalaallit Nunaanni konsulatimik ammaanissaminut kissaateqarnera Vivian Motzfeldtip nuannaarugaa

Canadap nunanut allanut ministeriata Mélanie Joly-p, decemberip 9-ani 2024 Canadap Issittumi Nunanut Allanut Periusissiaa saqqummiuppaa, tassani Canadap Issittumi ingerlatsineranut tunaartalersuisoqarpoq.  

Issittumi nunat, tassani Kalaallit Nunaat Kunngeqarfik Danmarkilu ilanngullugit, akornanni suleqatigiinnissap pingaaruteqarnera periusissiami siullertut oqariartuutigineqarpoq. Tamanna suliaqarfinni, ilisimatusarnermi teknologimilu, sila pissusaata allanngoriartornera, kulturi, nunap inuiisa attaveqaqatigiinnerat, nunat tunniussassai, niuerneq atortulersuutillu aallaavigalugit imminut napatittumik ineriartorneq, illersornissaq sillimaniarnerlu aammalu Issittup eqqissisimaffiullunilu patajaatsuunissaata suleqatigiissutiginissaa. Issittoq issittumi nunat iliuuseqarfigissagaat, tamannali Issittumi nunap inuii suleqatigalugit ingerlanneqassasoq naqissuserneqassasoq. 

Ilaatigut Nuummi Canadamiut konsulatiannik ammaanikkut Kalaallit Nunaannik suleqateqarnertik annertusarniarpaat. Aammattaaq Kalaallit Nunaata nunanut allanut, sillimaniarnermut illersornissamullu periusissiaanni nutaami kalaallit Ottawami sinniisoqarfimmik ammaaniarnerat Naalakkersuisunit ilimasaarutigineqarnikuuvoq. Nunallu illugiillutik Canadap Kalaallit Nunaatalu akornanni suleqatigiinnerup annertusarnissaannik isumaqatigiissutigaat. 
Taamatuttaaq Canada Anchorage, Alaskami konsulatimik ammaaniarpoq, aammalu Canadap Issittumi aallartitassaanik siullermeersumik toqqaasoqassaaq, taassumalu issittumi attaveqaqatigiinneq, tassunga ilanngullugit Canadami nunap inuii nunallu immikkoortui avannarpasissumiittut suliassarissavai. Tassanissaaq naatsorsuutigineqarpoq issittumi aallartitaq Canadap avannaani allaffeqarnissaa. 

Naalakkersuisoq Vivian Motzfeldt ima oqaaseqarpoq: 
”Naalakkersuisut sinnerlugit Canadap naalakkersuisui aammalu Nunanut Allanut Ministeri Mélanie Jolyp Canadap Issittumi Nunanut Allanut Periusissiaanik saqqummiusseqqammerneranni pilluaqqujumavakka. Atuarlugu pissanganarpoq, Canadamiullu Nuummi konsulateqalernissaannut tikilluaqqusinissatsinnut qilanaarpugut, taamatuttaaq 2028-mi Ottawami kalaallit sinniisoqarfissaata ammanissaanut qilanaaqaagut. Ukiuni aggersuni Canadap Kalaallit Nunaatalu illugiillutik attaveqaqatigiinnerata ineriartorteqqissavarput. Canadamiut tungaannit issittumi siammasissumik suleqatigiinnerup annertuumik pingaartinneqarnera qiimmaallannarpoq. Pingaartumik nunat sanilerisat suleqatiginissaat, tamannalu Kalaallit Nunaannit tapersersorparput, tamanna aamma Kalaallit Nunaata nunanut allanut, sillimaniarnermut illersornissamullu periusissiaanni atuarneqarsinnaavoq.”

Ilanngulluguttaaq periusissiami nunap inuiisa aqutsisuisa akornanni paasissutissanik avitseqatigiinnissaq, taamatullu issittumi nunat assigiimmik pingaartitalinnut pingaartinneqarpoq. Taamatullu Issittumi Siunnersuisooqatigiinnut aningaasaliisarnerup annertusinissaanut kissaateqartoqarnera, taamalillunilu suleqatigiinnerup annertusarnissaa kissaatigineqarpoq. 

Attavissaq: Ineqi Kielsen, +299 58 73 31