Innuttaasut nipaat nunami namminermi silap pissusianut periusissiamut ilaatinneqarput

Naalakkersuisut nunami namminermi silap pissusianut periusissiaq suliaralugu aallartippaat. Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund nunatsinni silap pissusia pillugu sammisaqartitsiniarpoq, taamaalillunilu innuttaasut silap pissusiani allannguutit pillugit misigisatik, aammalu silap pissusianut naleqqussaanermut silallu pissusiani allanngoriartornermut unitsitsiniarluni suliniutinut isummatik saqqummiussinnaassavaat. Tamanna silap pissusia pillugu sammisaqartitsinermut, 1. oktobarimi Tasiilami, Sermiligaami, Kuummiuni aamma Kulusummi ingerlanneqartumut ilassutigalugu aaqqissuunneqarpoq.

Naalakkersuisut Parisimi Isumaqatigiissummut ilaalernerup kingunerisaanik nunami namminermi silap pissusianut periusissiaq suliaralugu aallartippaat. Nunami namminermi silap pissusianut periusissiaq nunami namminermi silap pissusianut suliniutitsinni anguniakkanik suliniutinillu pingaarnernik imaqassaaq, aammalu nunatsinni ineriartortitsinissamut periarfissanik aallussiffiussalluni.

Naalakkersuisuniit innuttaasut, silap pissusiata allannguutaannit misigisaat aamma silap pissusianut aaqqiissutissanut isumaat siunnerfigalugit akuutinneqassapput. Taamaattumik Naalakkersuisoq Kalistat Lund nunatsinni nunaqarfinnut illoqarfinnullu tikeraaqattaarpoq, innuttaasut, inuiaqatigiinni inuinnaat najukkanilu sullissisut allat periusissiamut ilanngussinnaasaannik katersuilluni. Silap pissusia pillugu sammisaqartitsinerni silap pissusiata allannguutai, aammalu Parisimi Isumaqatigiissummut ilaalernerup kingunerisassai suunersut pillugit saqqummiussisoqartassaaq.

Tasiilami, Sermiligaami, Kuummiuni aamma Kulusummi silap pissusia pillugu sammisaqartitsinerup siulliup naammassereernerani, silap pissusia pillugu sammisaqartitsineq tulleq ulluni piffissanilu ukunani Nuummi ingerlanneqassaaq:

• Nuuk: 16. decembari 2024, nal. 18:45-21:00, Katersortarfimmi (kalaallisut ingerlanneqassaaq).
• Nuuk: 17. decembari 2024, nal. 18:45-21:00, Katersortarfimmi (danskisut ingerlanneqassaaq).

”Innuttaasut nunami namminermi silap pissusianut periusissiamut ilanngussassaat naleqartorujussuupput iluarisimaarneqarlutillu. Innuttaasut nunatsinni silap pissusianut naleqqussarnermi pinaveersaartitsinermilu misigisaat siunnersuutaallu nunatsinni silap pissusianut periusissiatsinni aallaaviussapput. Nuummi innuttaasut tusarnaarnissaannut, aammalu silap pissusianut suliniutissatut siunnersuutissaannik tusagaqarnissannut qilanaarpunga. Kikkut tamarmik tusaaneqarnissaat akuersaarneqarnissaallu, aammalu iliuusissat aaqqiissutissallu atorlugit naapinneqarnissaat qulakkiissavarput. Aaqqiissutissani iliuusissanilu inuit, silap pissusiata allannguutaasa kingunerinit toqqaannartumik sunnerneqartut aallaavigineqassapput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.


Annertunerusumik paasisaqarusunnermi Naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.