AtuartigukPeqqissutsimut Naalakkersuisup Qeqertarsuarmi najugaqartunik oqaloqateqarneq pitsanngorsarpaa
Nassiussisuuvoq: Peqqissutsimut Naalakkersuisoqarfik
Peqqissutsimut Naalakkersuisoq, Agathe Fontain, decembarimi 2024-mi Qeqertarsuarmut tikeraarpoq, tassani innuttaasunik, peqqinnissaqarfimmi aamma peqqissaanermik suliaqartunik oqaloqateqarnerup pitsanngorsarneqarnissaa kiisalu peqqinnissaq pillugu isumaqatigiissummut aammalu ukiunut arlalinnut ilisimatusarnermik tunngaveqartumik imigassamut politikkimut innersuussutinik suliaqarneq pillugu ilisimasanik siammarterinissaq siunertarineqarput.
Tikeraarnermi decembarip aappaannit tallimaata tungaanut Naalakkersuisup peqqissaavimmi, kigutileriffimmi aamma utoqqaat illuanni sulisut naapippai. Naalakkersuisumit tikeraarneqarneq pingaaruteqartorujussuusoq sulisunit oqaatigineqarpoq. Tamatuma saniatigut innuttaasunik ataatsimiititsisoqarpoq, tassani peqqinnissaq pillugu isumaqatigiissut aamma peqqinnissaqarfimmi suliniutaasussat saqqummiunneqarput. Ataatsimiititsinermilu aamma ukiunut arlalinnut ilisimatusarnermik tunngaveqartumik imigassamut politikkimut innersuussutinik suliaqarneq pillugu paasissutissiisoqarpoq.
Agathe Fontain oqarpoq:
“Innuttaasut aamma peqqinnissaqarfimmi sulisut unammilligassaat aamma misilittagaat pitsaasut tusarniarlugit qanimut naapissallugit pingaaruteqarpoq. Peqqinnissaq pillugu isumaqatigiissummi suliniutit pitsaanerpaamik qanoq atulersissinnaanerlugit toqqaannarnerusumik paasititsivoq.”
Innuttaasunik ataatsimiititsineq atorluarneqarsinnaasunik siunnersuuteqarfiuvoq. Pingaartumik meeqqanut inuusuttunullu sammisumik pinaveersaartitsisoqarnerunissaanik aamma peqqinnerulersitsiniarnerunissaq erseqqissarneqarput. Meeqqat inuusuttullu siunissami pitsaanerusunik peqqinnarnerusumillu periarfissinniarlugit, meeqqat atuarfianni siusinaartumik suliniuteqarnerit pingaaruteqarnerat peqataasut oqariartuutigaat. Toqqagassanut peqqinnartunut aamma sunngiffimmi sammisassanut tapersersuisoqarnerunissaa aamma ujartorneqarpoq, taamaalillutik meeqqat inuusuttullu pitsaanerusumik inuunerminnik aallartitsisinnaassammata.
Naalakkersuisup Qeqertarsuarmut tikeraarnerata najukkami inuiaqatigiit toqqaannartumik oqaloqatiginissaannut pingaassutsimik erseqqissaavoq. Misilittakkat aamma siunnersuutit avitseqatigiissutigineqartut Naalakkersuisut peqqinnissaqarfimmi sullissinermik aamma nuna tamakkerlugu atukkanik suliaqarnerannut pitsanngorsaanermik suliaqarnerannut tapertaassapput.
Annertunerusumik paasisaqarusukkuit una attavigiuk: Naalakkersuisoqarfimmi pisortaq, Nike Berthelsen, E-mail: nike@nanoq.gl, Oqarasuaat: +299 346690
