AtuartigukNunatta kitaani Tunumilu raajanut 2025-mi TAC aalajangerneqarpoq
Nassiussisuuvoq: Aalisarnermut Piniarnermullu Naalakkersuisoqarfik
Naalakkersuisut novembarip 28-anni 2024-mi aalajangerput kitaani raajanut 2025-mut TAC 83.125 tonsiussasoq Tunumilu 7.550 tonsiussalluni.
Kitaani raajartassatut innersuussutigineqartut 80.000 tonsiupput. Taakku 2024-mut innersuussutigineqartunut sanilliullugit 15.000-nik ikinnerupput. 2023-mut aamma 2024-mut innersuussutigineqartut aamma 15.000 tonsinik ikileriarput.
Taamaalilluni raajartassatut innersuussutigineqartut ukiuni kingullerni marlunni 30.000 tonsinik ikileriarput.
Kitaani raajanut aqutsinissamut pilersaarut naapertorlugu TAC ukiumiit ukiumut amerlanerpaamik 12,5 procentinik allanngortinneqarsinnaavoq.
Aqutsinissamut pilersaarummi matumani ukiumut pisani toqusinnaassutsip tamarmiusup siunissamut ungasinnerusumut raajanik atorluaanerup qaffasinnerpaaffianit qaffasinnerunnginnissaa anguniarneqarpoq.
Pineqartut ataatsikkut naammassineqarsinnaanngimmata aalisarnermik inuussutissarsiuteqartut peqatigalugit aalajangerneqarpoq siunissamut ungasinnerusumut raajanik atorluaanerup qaffasinnerpaaffia anguniarneqassasoq. Taamaalilluni TAC aalajangerneqarpoq anguniarneqartut naapertorlugit.
TAC-mit raajat agguarneqassapput EU-mut 2.431 tonsit raajat pisassiissutigineqassallutik, takuuk EU-mik aalisarneq pillugu isumaqatigiissummut tapiliussaq. Raajartassiissutinit Canadamut aamma ukiut tamaasa raajartassiisoqartarpoq, kitaani raajartassiissutit ilaannik amerlanngitsunik pisassiisoqartarluni.
Pisassiinermi nunatta kitaani raajarniarnermut aqutsinermut pilersaarummi naatsorsueriaatsimut allassimasut naapertorlugit raajartassiisoqartarpoq.
Tunumi raajartassiissutit innersuussutigineqartut 1.000 tonsiupput. 2024-mut innersuussutigineqartunit 1.500 tonsinik ikinnerupput.
Tunumi EU 4.150 tonsit pisassiissutaapput, takuuk EU-mik aalisarneq pillugu isumaqatigiissummut tapiliussaq. Pisassiissutigineqartut Naalakkersuisut.gl-mi atuarneqarsinnaavoq.
Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl