Juullimut pilluaqqussut

Naalakkersuisut siulittaasuata juullimut ukioq manna pilluaqqussutaa 28-nik ukiulimmit Malu Langemit qalipagaavoq.

- Malup piviusorpalaartumik qalipaatigissumillu qalipaariaaseqarnera alutornaqaaq. Qalipaatinik atuilluartarnera juullip qalipaatigissup isumaatulli ippoq, Múte Bourup Egede
oqarpoq.

Qalipakkami meeqqat marluk ikinngutigiit Malu Langep qalipassimavai. Juulliaqqami qanilaarneq, pakkutaarneq pilluarnermillu tunisineq tunniussani anginerpaasoq qalipaasup ersersinniarpaa.

Qalipaasoq, eqqumiitsuliortoq Uummannami peroriartorpoq, 2018-imilu 
Eqqumiitsuliornermik Ilinniarfimmi naammassivoq, ukioq mannalu Aarhus Kunstakademimi ilinnialersimalluni Danmarkimi najugaqarpoq.

- Meeqqat atuarfianni 9. klassemi atuarlunga qalipaaffissiamut qalipaaneq misilittaqqaartalerpara, taamanili qalipaaneq nuannaralugu pimoorullugu aallartippara, Malu Lange oqarpoq.